രണ്ടാമത് അന്താരാഷ്ട്ര കുട്ടി ചലച്ചിത്രമേളയ്ക്ക് ആരംഭം; കുഞ്ഞുങ്ങളെ അടിമകളെ പോലെ കാണുകയും അവര്ക്ക് നേരെ അക്രമം അഴിച്ചുവിടുകയും ചെയ്യുന്ന പ്രവണത വര്ദ്ധിച്ചവരുന്നതായി മന്ത്രി കെ.കെ ഷൈലജ
തിരുവനന്തപുരം: കുഞ്ഞുങ്ങളെ അടിമകളെ പോലെ കാണുകയും അവര്ക്ക് നേരെ അക്രമം അഴിച്ചുവിടുകയും ചെയ്യുന്ന പ്രവണത സമൂഹത്തില് വര്ദ്ധിച്ചുവരുകയാണെന്ന് വനിതാ ശിശുവികസന വകുപ്പ് മന്ത്രി കെ.കെ ഷൈലജ. ഇതിനെതിരെ സാമൂഹ്യമായ മാറ്റം ഉണ്ടാവണമെന്നും മന്ത്രി ആവശ്യപ്പെട്ടു. സംസ്ഥാന ശിശുക്ഷേമസമിതിയുടെ ആഭിമുഖ്യത്തില് നടത്തുന്ന രണ്ടാമത് അന്താരാഷ്ട്ര ബാല ചലച്ചിത്രമേള ടാഗോര് തിയേറ്ററില് ഉദ്ഘാടനം ചെയ്യുകയായിരുന്നു മന്ത്രി. ഉയര്ന്ന സാംസ്കാരിക മൂല്യമുള്ള കേരളത്തില് കുട്ടികള്ക്ക് നേരെ അതിക്രമങ്ങളുണ്ടാകുന്നത് അസഹനീയമായ രീതിയില് വര്ദ്ധിച്ചിരിക്കുകയാണ്. നിലവിലുള്ള നിയമങ്ങള് ഉപയോഗിച്ച് ഇതിനെ നേരിടണമെന്നും മന്ത്രി ആഹ്വാനം ചെയ്തു.
കുഞ്ഞുമനസ്സുകളെ ഏറ്റവും കൂടുതല് സ്വാധീനിക്കാന് ദൃശ്യമാധ്യമങ്ങള്ക്ക് കഴിയും. സിനിമയും ടി.വി പരിപാടികളും കേവലം വിനോദ ഉപാധികള് മാത്രമല്ല, മനുഷ്യമനസ്സിനെ നന്നാക്കിയെടുക്കാനും ഇവയ്ക്ക് കഴിയും. അതിഭാവുകത്വം സിനിമയുടെ ഭാഗമാണ്. അത് അവതരിപ്പിക്കുമ്പോഴും ജീവിതമൂല്യങ്ങള് പറയാന് കഴിയണം. അതിന് ശ്രദ്ധിക്കണം. സാംസ്കാരികലോകം അക്കാര്യങ്ങളില് ഇടപെടണമെന്നും മന്ത്രി ആവശ്യപ്പെട്ടു. ശരീരംകൊണ്ടും ശബ്ദം കൊണ്ടും സിനിമകളില് ആസുരത കാണിക്കുന്നത് വര്ദ്ദിച്ചുവരുകയാണ്. സിനിമകളില് പ്രതികാരം കാണിക്കുന്നത് നല്ലതാണ്. പക്ഷെ, അത് ആസുരമായാല് യുവതലമുറയെ വഴിതെറ്റിക്കും. നമ്മുടെ സിനിമകളുടെ സെന്സര്ഷിപ്പ് നന്നായി നടപ്പാക്കുന്നില്ല. വിവേകമുള്ളവര് സെന്സര് ബോര്ഡില് ഉണ്ടാകണം. അശഌലം കൂടുന്നു. അത് നഗ്നത മാത്രമല്ല. ബന്ഡിറ്റ് ക്വീന് എന്ന സിനിമയില് ഒരു സ്ത്രീയെ നഗ്നമായി കാണിക്കുന്നുണ്ട്. അത് പക്ഷെ അശഌലമായി പ്രേക്ഷകന് തോന്നില്ലെന്നും മന്ത്രി പറഞ്ഞു. അതിനാല് ഈ ചലച്ചിത്രമേളയിലൂടെ കുട്ടികളില് നല്ല ആസ്വാദന ശീലം വളര്ത്തിയെടുക്കാനാവണമെന്നും മന്ത്രി പറഞ്ഞു.
ചടങ്ങില് ദേവസ്വം, ടൂറിസം വകുപ്പ് മന്ത്രി കടകംപള്ളിസുരേന്ദ്രന് അധ്യക്ഷനായിരുന്നു. ശിശുക്ഷേമസമിതി ജനറല് സെക്രട്ടറി അഡ്വ. എസ്.പി ദീപക് സ്വാഗതം പറഞ്ഞു. സ്വാഗതസംഘം ചെയര്മാന് എം.മുകേഷ് എം.എല്.എ ആമുഖപ്രഭാഷണം നടത്തി. മേയര് വി.കെ പ്രശാന്ത്, കെ.ടി.ഡി.സി ചെയര്മാന് എം. വിജയകുമാര്, ഫിലിം പ്രോഗ്രാമര് മോണിക്കവാഹി, ചില്ഡ്രന്സ് ഫിലിം സൊസൈറ്റി ഓഫ് ഇന്ത്യ സി.ഇ.ഒ പ്രശാന്ത് പത്രേബ്, സംവിധായകന് ടി.കെ രാജീവ് കുമാര്, നടന് സുധീര് കരമന, നടി ഐശ്വര്യാ ലക്ഷ്മി, നടന് നീരജ് മാധവ്, മികച്ച ബാലനടിക്കുള്ള സംസ്ഥാന അവാര്ഡ് കിട്ടിയ അഭിനി ആദി, കുട്ടികളുടെ പ്രധാനമന്ത്രി ദേവകി ഡി.എസ്, ശിശുക്ഷേമസമിതി ട്രഷറര് ജി. രാധാകൃഷ്ണന്, വൈസ്പ്രസിഡന്റ് അഴീക്കോടന് ചന്ദ്രന്, ജോയിന്റ് സെക്രട്ടറി പി.എസ് ഭാരതി, എക്സിക്യൂട്ടീവ് അംഗങ്ങളായ എം.കെ പശുപതി, ഒ.എം ബാലകൃഷ്ണന്, ആര് രാജു എന്നിവര് സംസാരിച്ചു. സംസ്ഥാന ശിശിക്ഷേമ സമിതി, ചലച്ചിത്ര അക്കാദമി, കെ.എഫ്.ഡി.സി എന്നിവയുടെ സഹകരണത്തോടെയാണ് മേള സംഘടിപ്പിക്കുന്നത്.
https://www.facebook.com/Malayalivartha
