ഒറ്റദിവസം പെയ്ത മഴയില് കോഴിക്കോട് വെള്ളത്തിനടിയില്.. കക്കൂസ് മാലിന്യമടക്കം റോഡിലൊഴുകി ...
ഒറ്റ ദിവസം പെയ്ത മഴയില് കോഴിക്കോട് മാവൂര് റോഡും പരിസരവും വെള്ളത്തിലായി. മാവൂര്റോഡ്, പുതിയ ബസ്റ്റാന്ഡ് പരിസരം, സ്റ്റേഡിയം ജംഗ്ഷന്, ശ്രീകണേ്ഠശ്വരം റോഡ് എന്നിവിടങ്ങളില് മുട്ടോളം ഉയരത്തിലാണ് വെള്ളം കെട്ടികിടന്നത്. സ്റ്റേഡിയം ജംഗ്ഷനിലെ പല കടകളിലേക്കും വെള്ളം കയറിയിട്ടുണ്ട്. മാവൂര് റോഡിലെ കടകളിലും സമാനമായ അവസ്ഥയാണുള്ളത്. പുലര്ച്ചെ മുതലാണ് ജില്ലയുടെ വിവിധ മേഖലകളില് മഴ ശക്തി പ്രാപിച്ചത്. അരമണിക്കൂര് തുടര്ച്ചയായി മഴപെയ്തതോടെ നഗരം വെള്ളക്കെട്ടിലായി. ഇതോടെ ഗതാഗതവും ഭാഗികമായി തടസപ്പെട്ടു. വലിയ വാഹനങ്ങളല്ലാതെ ഓട്ടോറിക്ഷകള്ക്കും ഇരുചക്രവാഹനങ്ങള്ക്കും നഗരത്തിലെ പ്രധാന റോഡുകളില് കൂടി പോലും പോകാന് പറ്റാത്ത വിധം വെള്ളമുയര്ന്നിരുന്നു.
ഓരോ മഴക്കാലത്തും റോഡുകള് വെട്ടിപ്പൊളിച്ചും കലുങ്കുകള് പുനര്നിര്മിച്ചും കോര്പറേഷന് കരാറുകാര് പേരിന് ചില പുനരുദ്ധാരണ പ്രവര്ത്തനങ്ങള് നടത്താറുണ്ടെങ്കിലും വെള്ളപ്പൊക്കത്തിന് ഇത്തവണയും മാറ്റമുണ്ടായില്ല. രാവിലെ ഒന്നര മണിക്കൂറോളം തുടര്ച്ചയായി പെയ്ത മഴ നഗരത്തെ പൂര്ണമായും വെള്ളത്തിനടിയിലാക്കി. വെള്ളപ്പൊക്കം. പല കെട്ടിടങ്ങളുടെയും പാര്ക്കിംഗ് പ്രദേശം വെള്ളത്തില് മുങ്ങിപ്പോയി. ഒപ്പം സ്വകാര്യ സ്ഥാപനങ്ങളില് നിന്നുള്ള കക്കൂസ് മാലിന്യം പോലും മാവൂര്റോഡിലെ ഓടകളിലേക്ക് ഒഴുകി വന്ന് മഴവെള്ളത്തിനൊപ്പം കലര്ന്നു. പാവമണി റോഡ്, സ്റ്റേഡിയം ജംഗ്ഷന് എന്നിവിടങ്ങളിലെ വെള്ളക്കെട്ട് നഗരത്തിന്റെ തീരാശാപമാണ്. പലയിടങ്ങളിലും കടകള്ക്കുള്ളിലേക്ക് വെള്ളം കയറിയതോടെ മണിക്കൂറുകളോളം കട പൂട്ടിയിടേണ്ടിയും വന്നു.
സെന്ട്രല് മാര്ക്കറ്റും വലിയങ്ങാടിയുമടങ്ങുന്ന നഗരത്തിന്റെ ഹൃദയ ഭാഗങ്ങളെല്ലാം വെള്ളക്കെട്ടില് പെട്ടു. പലയിടത്തും മാലിന്യം കുന്നുകൂടി കിടക്കുന്നത് പലകുറി അറിയിച്ചിട്ടും കോര്പറേഷന് അധികൃതര് തിരിഞ്ഞ് നോക്കാത്തതാണ് പ്രശ്നം ഇത്രത്തോളം വഷളാവാന് കാരണമെന്ന് നഗരവാസികള് ചൂണ്ടിക്കാട്ടുന്നു. ചീഞ്ഞ മീനിന്റെയും ഇറച്ചിയുടേയുമെല്ലാം അവശിഷിടങ്ങളാണ് മഴവെള്ളത്തിനൊപ്പം റോഡിലേക്ക് ഒഴുകി വന്നത്. ഇത് വലിയ ആരോഗ്യ ഭീഷണിയുമാണുണ്ടാക്കുന്നത്.
https://www.facebook.com/Malayalivartha