എഴാം ക്ലാസ് വരെ പരീക്ഷ ഒഴിവായല്ലോ എന്നു കരുതിയിരിക്കുന്ന കുട്ടികളെ തേടി പരീക്ഷ പടിവാതില്ക്കലെത്തുന്നു... മാതാപിതാക്കളുടെ മേല്നോട്ടത്തിലാകും പരീക്ഷ
എഴാം ക്ലാസ് വരെ പരീക്ഷ ഒഴിവായല്ലോ എന്നു കരുതിയിരിക്കുന്ന കുട്ടികളെ തേടി പരീക്ഷ പടിവാതില്ക്കലെത്തുന്നു.. കൊറോണ ബാധയെത്തുടര്ന്ന് ഏഴുവരെ ക്ലാസുകളിലെ കുട്ടികളുടെ പരീക്ഷ ഒഴിവാക്കി എല്ലാവര്ക്കും അടുത്ത ക്ലാസുകളിലേക്ക് പ്രവേശനം ഉറപ്പിച്ചിരുന്നതാണെങ്കിലും തയ്യാറാക്കിയ ചോദ്യപ്പേപ്പറുകള് പാഴാക്കാന് വയ്യാതെ എന്തുചെയ്യുമെന്ന ആശങ്കയിലായി സ്കൂളുകള്. അപ്പോഴാണ് ചില മാനേജ്മെന്റുകള് ചോദ്യക്കടലാസുകള് എന്തുകൊണ്ട് വീടുകളിലെത്തിച്ചൂകൂടാ എന്നാലോചിച്ചത്. ചില സ്കൂളുകള് അതിനുള്ള ഒരുക്കത്തിലാണ്. സി.ബി.എസ്.ഇ., എയ്ഡഡ് സ്കൂളുകളിലാണ് അറിയിപ്പുകള് ലഭിച്ചത്. മാനേജ്മെന്റുകളുടെ തീരുമാനപ്രകാരമാണിത്.
സ്കൂളിലെത്തി ചോദ്യപ്പേപ്പറുകള് മാതാപിതാക്കള് കൈപ്പറ്റണം. ഉത്തരങ്ങള് വീട്ടിലിരുന്ന് എഴുതിയശേഷം ഉത്തരക്കടലാസുകള് നിശ്ചിതദിവസത്തില് തിരികെ സ്കൂളിലെത്തിക്കണം. തുടര്ന്ന് അധ്യാപകര് വിലയിരുത്തിയശേഷം റിസള്ട്ട് അറിയിക്കും. ഓണ്ലൈനായും ചില സ്കൂളുകളില് ചോദ്യപ്പേപ്പറുകള് നല്കുന്നുണ്ട്. ഓരോദിവസവും ഓരോ വിഷയം വീതമാണ് എഴുതേണ്ടത്.
രാവിലെ സ്കൂള് തുടങ്ങുന്ന സമയത്ത് വാട്സാപ്പിലേക്ക് സ്കൂള് വെബ്സൈറ്റ് ലിങ്ക് ലഭിക്കും. ഇതിലൂടെ ചോദ്യപ്പേപ്പറുകള് കണ്ടെത്തി പ്രിന്റ് എടുത്ത് കുട്ടികള്ക്ക് നല്കാം. പരീക്ഷ നടത്തുക രക്ഷിതാക്കളുടെ മേല്നോട്ടത്തിലാകും. രക്ഷിതാവിനും കുട്ടിക്കും സൗകര്യമാകും വിധമുള്ള സമയം തിരഞ്ഞെടുക്കാം. പരീക്ഷയ്ക്കു ശേഷം ഉത്തരക്കടലാസുകള് മാതാപിതാക്കള് സൂക്ഷിക്കണം.
എല്ലാ പരീക്ഷയും കഴിഞ്ഞ് ഉത്തരക്കടലാസുകള് സ്കൂളിലെത്തിക്കണം. വിദ്യാര്ഥികള്ക്ക് അവധി പ്രഖ്യാപിച്ചെങ്കിലും അധ്യാപകര്ക്ക് ഈ ദിനങ്ങള് പ്രവൃത്തിദിനങ്ങളാണ്.
https://www.facebook.com/Malayalivartha