സ്പ്രിംഗ്‌ളര്‍ ഇടപാടില്‍ കേരള സി പി എമ്മിന്റെ വിശദീകരണം സീതാറാം യച്ചൂരി തള്ളിയതോടെ കേന്ദ്രനേതൃത്വം പിണറായിക്ക് എതിരാണെന്ന് വ്യക്തമായി

യച്ചൂരി തന്റെ ന്യായവാദങ്ങള്‍ തള്ളിയതിന് പിന്നാലെ എസ്. രാമചന്ദ്രന്‍ പിള്ളയെ ഇറക്കി പിണറായി തന്റെ ഭാഗം ന്യായീകരിക്കുകയും ചെയ്തു.

പ്രകാശ് കാരാട്ട്, എസ് ആര്‍ പി തുടങ്ങിയ നേതാക്കള്‍ പിണറായി പക്ഷക്കാരാണ്. എന്നാല്‍ ബംഗാള്‍ ഘടകം ഉള്‍പ്പെടെയുള്ളവര്‍ യച്ചൂരിയെ പൂര്‍ണമായി പിന്തുണക്കുന്നു. എം എ ബേബിയെ പോലുള്ള പി.ബി അംഗങ്ങളും യച്ചൂരിക്കൊപ്പമാണ്. കോടിയേരി ആരോഗ്യപരമായ കാരണങ്ങളാല്‍ അശക്തനാണ്.

പിണറായിയെ സ്റ്റാന്റില്‍ പിടിക്കാന്‍ കാത്തിരിക്കുന്ന സീതാറാം യച്ചൂരി അതിനുള്ള ശ്രമങ്ങള്‍ മുമ്പേ തുടങ്ങിയിരുന്നു.

സി പി എം പോളിറ്റ് ബ്യൂറോ, കേന്ദ്ര കമ്മിറ്റി എന്നിവിടങ്ങളിലെ പ്രായ പരിധി 75 വയസാക്കിയത് അതിന്റെ സൂചനയാണ്. 2021 ല്‍ നടക്കുന്ന പാര്‍ട്ടി കോണ്‍ഗ്രസില്‍ ഇക്കാര്യം തീരുമാനിക്കും. കേന്ദ്രകമ്മിറ്റിയില്‍ നിന്നും പിണറായിയെ പുറത്താക്കാനാണ് നീക്കം. ഇളവ് കിട്ടിയാല്‍ ഇതില്‍ മാറ്റം വരാം. എന്നാല്‍ അതിനുള്ള സാധ്യത ഇന്നത്തെ രാഷ്ട്രീയ കാലാവസ്ഥയില്‍ തീരെ കുറവാണ്.

2021 ല്‍ കേരള നിയമസഭയിലേക്ക് നടക്കുന്ന പൊതു തെരഞ്ഞടുപ്പില്‍ ഇന്നത്തെ രാഷ്ട്രീയ സ്ഥിതി തുടരുകയാണെങ്കില്‍ പിണറായിയുടെ സര്‍ക്കാരിന്റെ ഭാവി പറയാനാവില്ല.

പിണറായിയെ വെട്ടുക എന്ന ലക്ഷ്യത്തോടെ സീതാറാം യച്ചൂരി രൂപം കൊടുത്ത ഡിസൈനാണ് പിബിയിലെ പ്രായപരിധി. പിണറായി മാത്രമാണ് യച്ചൂരിയെ എതിര്‍ത്ത് സംസാരിക്കാന്‍ കരുത്തുള്ളതായി പി.ബിയിലുള്ളത്. കാരാട്ട് ഉണ്ടെങ്കിലും അദ്ദേഹം സമവായ നിലപാടാണ് സ്വീകരിക്കാറുള്ളത്. ബേബിയെ പി ബി. അംഗമാക്കി കേരളത്തില്‍ നിന്നും കടത്തിയത് പിണറായിയാണ്. 67 വയസ് മാത്രമുള്ള യച്ചൂരിക്ക് ഇനിയും 8 വര്‍ഷം കൂടി മുന്നിലുണ്ട് .

യച്ചൂരിയെ കോണ്‍ഗ്രസ് ടിക്കറ്റില്‍ രാജ്യസഭയില്‍ അയക്കാനുള്ള നീക്കം തടഞ്ഞത് പിണറായിയാണ്. യച്ചൂരിയെ രാജ്യസഭയില്‍ അയക്കുക എന്നത് സോണിയാ ഗാന്ധിയുടെ താത്പര്യമായിരുന്നു. മോദിയുടെ നയങ്ങള്‍ക്കെതിരെ ശക്തമായി സംസാരിക്കാന്‍ യച്ചുരിക്ക് കഴിയുമെന്ന പ്രതീക്ഷയിലായിരുന്നു സോണിയയുടെ ശ്രമം. എന്നാല്‍ യച്ചൂരി കോണ്‍ഗ്രസിന്റെ ചെലവില്‍ രാജ്യസഭയിലേക്ക് പോകേണ്ടെന്ന് പിണറായി തീരുമാനിച്ചു. ഇതിനെ തുടര്‍ന്ന് യച്ചൂരി പിന്‍മാറി. അതോടെ പിണറായിയും യച്ചൂരിയും പൂര്‍ണമായി തെറ്റി. പാര്‍ട്ടി സെക്രട്ടറി പാര്‍ലെമെന്റ് അംഗമാകുന്നത് പാര്‍ട്ടിയുടെ പ്രവര്‍ത്തനത്തെ ബാധിക്കുമെന്നാണ് പിണറായി അന്ന് പറഞ്ഞത്. കേരളത്തില്‍ നിന്നും വീരേന്ദ്രകുമാറിന്റെ ഒഴിവില്‍ യച്ചൂരിയെ രാജ്യസഭയില്‍ അയക്കാമായിരുന്നു.എന്നാല്‍ അത് സംഭവിക്കാതിരിക്കാനാണ് വീരന്‍ ഇടതു മുന്നണിയിലേക്ക് വന്നപ്പോള്‍ തന്നെ പിണറായി അദ്ദേഹത്തെ രാജ്യസഭയിലേക്ക് അയച്ചത്.

പ്രകാശ് കാരാട്ടിന്റെ സ്വന്തം ആള്‍ എന്നാണ് പിണറായി അറിയപ്പെടുന്നത്. എസ്. രാമചന്ദ്രന്‍ പിള്ളയും പിണറായിയുടെ അടുപ്പക്കാരനാണ്. പിണറായി ഇവരുടെ ഗ്രൂപ്പിലാണ് ഉള്ളത്. ഇതില്‍ പിള്ള അടുത്ത പാര്‍ട്ടി കോണ്‍ഗ്രസില്‍ ഔട്ടാകും. അതോടെ കാരാട്ടിന്റെ ചിറകരിയും.

പാര്‍ലമെന്റില്‍ 19 സീറ്റില്‍ തോറ്റതോടെ പിണറായിക്ക് ഡല്‍ഹിയിലുണ്ടായിരുന്ന ഇമേജ് പൂര്‍ണമായും ഇല്ലാതായിട്ടുണ്ട്. അതിന് പുറകെയാണ് ഡാറ്റ വിവാദം ഉണ്ടായത്. ഇതും 2021 ലെ തീരുമാനത്തില്‍ പ്രതിഫലിച്ചേക്കാം.