വിവാഹ തട്ടിപ്പുകാരുടെ നിരവധി വാര്‍ത്തകള്‍ മിക്ക ദിവസവും നമ്മളെ തേടിയെത്താറുണ്ട് . ഇപ്പോഴിതാ അഞ്ചാം വിവാഹത്തിനു തയാറെടുക്കുന്നതിനിടെ അന്‍പതുകാരന്‍ പിടിയില്യോരിക്കുന്നു .ഇയാളുടെ നാലാം ഭാര്യയുടെ പരാതിയിലാണ് അറസ്‌ററ് . കൊല്ലം ഉമയനല്ലൂര്‍ കിളിത്തട്ടില്‍ വീട്ടില്‍ മുഹമ്മദ് റഷീദ് (50) ആണു പിടിയിലായത്. അഞ്ചാമത്തെ വിവാഹത്തിനായി ചിങ്ങോലിയിലെ യുവതിയുടെ വീട്ടില്‍ എത്തിയപ്പോഴാണു കരീലക്കുളങ്ങര പൊലീസ് ഇയാളെ അറസ്റ്റ് ചെയ്തത്. റഷീദിന്റെ നാലാമത്തെ ഭാര്യയായ തൃശൂര്‍ ചാവക്കാട് വടക്കേക്കാട് സ്വാദേശിയായ യുവതിയാണു പരാതി നല്‍കിയത്.

ഒന്നര വര്‍ഷം മുമ്പ് ഇവരെ വിവാഹം ചെയ്ത റഷീദ് എട്ടു പവന്‍ ആഭരണങ്ങളും 70,000 രൂപയുമായി മുങ്ങിയിരുന്നു. ഇതു സംബന്ധിച്ചു വടക്കേക്കാട് പൊലീസ് സ്റ്റേഷനിലെ കേസിലാണ് അറസ്റ്റ്.
പെരിന്തല്‍മണ്ണയില്‍ ബിസിനസാണെന്നാണ് ഈ യുവതിയെയും വീട്ടുകാരെയും ഇയാള്‍ വിശ്വസിപ്പിച്ചിരുന്നത്.

ഇയാളുടെ നീക്കങ്ങള്‍ അറിഞ്ഞ യുവതി ചിങ്ങോലിയില്‍ എത്തുകയായിരുന്നു. തുടര്‍ന്നു കരീലക്കുളങ്ങര സ്റ്റേഷനില്‍ എത്തി നേരിട്ടു പരാതി നല്‍കി. കൊട്ടിയം സ്വദേശിയെ ആദ്യം വിവാഹം ചെയ്ത ഇയാള്‍ പെരിന്തല്‍മണ്ണ, കോഴിക്കോട്, ചാവക്കാട് എന്നിവടങ്ങളില്‍ നിന്നും വിവാഹം കഴിച്ചിട്ടുണ്ട്.

ഓണ്‍ലൈന്‍ വിവാഹ സൈറ്റുകളിലും മറ്റും പരതിയാണ് ഇയാള്‍ നിര്‍ധന കുടുംബങ്ങളിലെ സ്ത്രീകളെ തട്ടിപ്പില്‍പ്പെടുത്തിയിരുന്നത്. പണം തട്ടിയ ശേഷം നിസാര വഴക്കുകള്‍ ഉണ്ടാക്കി പോവുകയാണ് ഇയാളുടെ പതിവെന്നു പൊലീസ് പറഞ്ഞു. വസ്തു കച്ചവടക്കാരന്‍, തുണി ബിസിനസ്, ലോറി ഉടമ, ഡ്രൈവര്‍ തുടങ്ങിയ പല ജോലികള്‍ പറഞ്ഞായിരുന്നു തട്ടിപ്പ്. കൊല്ലത്ത് ലോറി ഡ്രൈവറാണെന്നു പറഞ്ഞാണ് ഇയാള്‍ അഞ്ചാം വിവാഹത്തിന് ഒരുങ്ങിയത്.
പെരിന്തല്‍മണ്ണ, കോഴിക്കോട്, ചാവക്കാട് എന്നിവിടങ്ങളിലും വിവാഹത്തട്ടിപ്പു നടത്തി. ആദ്യ വിവാഹം നിയമപരമായി ഒഴിഞ്ഞെന്നാണ് പ്രതി എല്ലായിടത്തും പറഞ്ഞിട്ടുള്ളതെന്നാണ് പോലീസിന് വിവരം ലഭിച്ചിരിക്കുന്നത്.
മുന്‍വിവാഹങ്ങളുമായി ബന്ധപ്പട്ട് ഇയാളുടെ പേരില്‍ കേസുകളുണ്ടെന്നും പൊലീസ് പറഞ്ഞു. കരീലക്കുളങ്ങര സിഐ എസ്.എല്‍. അനില്‍കുമാറിന്റെ നിര്‍ദ്ദേശാനുസരണം എസ്‌ഐ സഞ്ജീവ്കുമാറിന്റെ നേതൃത്വത്തിലുള്ള പൊലീസ് സംഘമാണു പ്രതിയെ അറസ്റ്റ് ചെയ്തത്. ഇയാളെ വടക്കേക്കാട് പൊലീസിന് കൈമാറി.