ഫഹദ് ഫാസില്‍ ചിത്രത്തെ പ്രശംസിച്ച് ബോളിവുഡ് താരം രണ്‍ബീര്‍ കപൂര്‍. ഫഹദ് ഫാസില്‍ ചിത്രം ആവേശം തിയറ്ററുകളില്‍ വിജയകരമായി പ്രദര്‍ശനം തുടരുന്നു. ചിത്രത്തെ പ്രശംസിച്ച് പ്രേക്ഷകര്‍ മാത്രമല്ല സിനിമ താരങ്ങളും രംഗത്തെത്തി. ഇപ്പോഴിതാ സോഷ്യല്‍ മീഡിയയില്‍ ഇടംപിടിക്കുന്നത് ഫഹദിനെക്കുറിച്ച് ബോളിവുഡ് താരം രണ്‍ബീര്‍ കപൂര്‍ പറഞ്ഞ വാക്കുകളാണ്.

'ഫഹദ് ഉഗ്രന്‍ നടനാണ്. അദ്ദേഹത്തിന്റെ പുഷ്പ, സൂപ്പര്‍ ഡീലക്‌സ് തുടങ്ങിയ ചിത്രങ്ങള്‍ കണ്ടു. ഒരു അഭിനേതാവ് എന്ന നിലയില്‍ അദ്ദേഹത്തോടൊപ്പം പ്രവര്‍ത്തിക്കാനുള്ള അവസരത്തിനായി ഞാന്‍ കാത്തിരിക്കുന്നു.

ഫഹദിന്റേത് അസാധാരണ പ്രകടനമാണ് .വളരെ സൂക്ഷ്മവും വേറിട്ട ശൈലിയിലുള്ള അഭിനയം. അത് അവന്റെ കണ്ണുകളില്‍ കാണാനാകും. ആ കഥാപാത്രം എന്താണ് ചിന്തിക്കുന്നത്, അനുഭവിക്കുന്നത് എന്നെല്ലാം അദ്ദേഹത്തെിന്റെ കണ്ണുകളില്‍ വ്യക്തമാണ്. അതിഗംഭീര നടനാണ്'- എന്നാണ് രണ്‍ബീര്‍ പറഞ്ഞത്.

രോമാഞ്ചത്തിന് ശേഷം ജിത്തു മാധവന്‍ സംവിധാനം ചെയ്ത ചിത്രമാണ് 'ആവേശം'. ഏപ്രില്‍ 11 ന് തിയറ്ററുകളിലെത്തിയ ചിത്രം ഇതിനോടകം ( 22 ദിവസ) 74.10 കോടിയാണ് ഇന്ത്യയില്‍ നിന്ന് നേടിയിരിക്കുന്നത്. ആഗോള ബോക്‌സോഫീസില്‍ 150 കോടിയിലേക്ക് അടുക്കുകയാണ് ചിത്രം.

അന്‍വര്‍ റഷീദ് എന്റര്‍ടൈന്‍മെന്റ്സിന്റെ ബാനറില്‍ അന്‍വര്‍ റഷീദും ഫഹദ് ഫാസില്‍ ആന്‍ഡ് ഫ്രണ്ട്സിന്റെ ബാനറില്‍ നസ്രിയ നസീമും ചേര്‍ന്നാണ് 'ആവേശം' നിര്‍മിച്ചിരിക്കുന്നത്.