സംസ്ഥാനത്ത് കോവിഡ് ബാധിച്ച് ഇന്ന് ഇതുവരെ 10 പേര്‍ മരിച്ചു. ഇതില്‍ നാലു പേരും തിരുവനന്തപുരം ജില്ലയില്‍ നിന്നുള്ളവരാണ്. രോഗവ്യാപനത്തിനൊപ്പം മരണനിരക്ക്ും ഉയരുന്നത് ആശങ്ക വര്‍ധിക്കുന്നു. തിരുവനന്തപുരത്തിന് പുറമേ തൃശൂര്‍, വയനാട്, കണ്ണൂര്‍, ആലപ്പുഴ, പത്തനംതിട്ട ജില്ലകളിലുള്ളവരാണ് മരണപ്പെട്ടവര്‍. ചിറയിന്‍കീഴ് സ്വദേശി രമാദേവി (68), പരവൂര്‍ സ്വാദേശി കമലമ്മ (76), പൂജപ്പുര സെന്‍ട്രല്‍ ജയിലിലെ വിചാരണ തടവുകാരനായ കിളിമാനൂര്‍ സ്വദേശി മണികണ്ഠന്‍ (72) വെട്ടൂര്‍ സ്വദേശി മഹദ് (48) എന്നിവരാണ് തിരുവനന്തപുരത്ത് മരിച്ച മറ്റ് നാലു പേര്‍.

പൂജപ്പുര ജയിലില്‍ ആദ്യം കോവിഡ് സ്ഥിരീകരിച്ചത് മണികണഠനായിരുന്നു. ആസ്മ രോഗിയായിരുന്നു ഇയാള്‍. തിരുവനന്തപുരം മെഡിക്കല്‍ കോളേജില്‍ ചികിത്സയിലായിരുന്നു. ചിറയിന്‍കീഴ് സ്വദേശിനി രമാദേവി ഇന്നലെയാണ് മരിച്ചത്. പരവൂര്‍ സ്വാദേശി കമലമ്മയുടെ ആന്റിജന്‍ പരിശോധന ഫലം നെഗറ്റീവ് ആയതിനെ തുടര്‍ന്ന് മൃതദേഹം ബന്ധുക്കള്‍ക്ക് വിട്ടു നല്‍കി. മൃതദേഹം സംസ്‌കരിച്ചു. പിന്നീട് വന്ന ആര്‍ടിപിസി പരിശോധന ഫലം പോസറ്റീവാവുകയായിരുന്നു. വെട്ടൂര്‍ സ്വദേശി മഹദ് പ്രമേഹ രോഗിയായിരുന്നു. തിരുവനന്തപുരം മെഡിക്കല്‍ കോളേജില്‍ ഇന്ന് രാവിലെയായിരുന്നു മരണം.

കൊടുങ്ങല്ലൂര്‍ സ്വദേശി ശാരദ (70) അമല ആശുപത്രിയില്‍ ചികിത്സയിലിരിക്കെയാണ് മരിച്ചത്. പത്തനംതിട്ട കോന്നി സ്വദേശിനി ഷബര്‍ബാന്‍(54) കോട്ടയം മെഡിക്കല്‍ കോളേജിലാണ് മരിച്ചത്. വ്യക്ക അസുഖ ബാധിതയായിരുന്നു. മരിക്കുന്നതിന് മണിക്കൂറുകള്‍ക്ക് മുമ്പ് ട്രൂനാറ്റ് പരിശോധനയിലൂടെയാണ് കൊവിഡ് സ്ഥിരീകരിച്ചത്. ഇവരുടെ വീട്ടില്‍ രണ്ട് പേര്‍ക്ക് മുമ്പ് കൊവിഡ് പൊസീറ്റിവായിരുന്നു.

ആലപ്പുഴ പത്തിയൂര്‍ സ്വദേശി സദാനന്ദന്‍ ആലപ്പുഴ മെഡിക്കല്‍ കോളേജില്‍ മരിച്ചു. വൃക്കരോഗിയായിരുന്നു. വയനാട് വാളാട് സ്വദേശി ആലി മാനന്തവാടി ജില്ലാ ആശുപത്രിയില്‍ മരിച്ചു. അര്‍ബുദ രോഗിയായിരുന്നു. മലപ്പുറം പരപ്പനങ്ങാടി സ്വദേശിനി ഫാത്തിമ മഞ്ചേരി മെഡിക്കല്‍ കോളേജ് ആശുപത്രിയില്‍ മരിച്ചു. കണ്ണൂര്‍ കെ കണ്ണപുരം സ്വദേശി എലിയത്ത് കൃഷ്ണനും കൊവിഡ് ബാധിച്ചു മരിച്ചു. 78 വയസായിരുന്നു. വീട്ടില്‍ കുഴഞ്ഞ് വീണതിനെ തുടര്‍ന്ന് സ്വകാര്യ ആശുപത്രിയില്‍ ചികിത്സയില്‍ ഇരിക്കെയാണ് കൊവിഡ് സ്ഥിരീകരിച്ചത്. ഇന്നലെ പരിയാരത്തേക്ക് മാറ്റിയെങ്കിലും വൈകീട്ടോടെ മരിച്ചു.

പൂജപ്പുര സെന്‍ട്രല്‍ ജയിലില്‍ തടവുകാരന്‍ കോവിഡ് ബാധിച്ച് മരിച്ച വിചാരണ തടവുകാരനാണ് മണികണ്ഠന്‍. നാലു ദിവസം മുന്‍പാണ് കോവിഡ് സ്ഥിരീകരിച്ചതിനെ തുടര്‍ന്ന് ചികിത്സയില്‍ പ്രവേശിപ്പിച്ചത്. ദേഹാസ്വാസ്ഥ്യത്തെ തുടര്‍ന്ന് കുഴഞ്ഞ് വീണതോടെയാണ് ഇദ്ദേഹത്തെ ആശുപത്രിയില്‍ പ്രവേശിപ്പിച്ചത്. തുടര്‍ന്ന് നടത്തിയ പരിശോധനയിലാണ് കോവിഡ് സ്ഥിരീകരിച്ചത്. വാര്‍ധക്യസഹജമായ അസുഖങ്ങള്‍ ഉണ്ടായിരുന്നു എന്നാണ് വിവരം. ഒന്നര വര്‍ഷമായി ജയിലില്‍ കഴിയുന്ന മണികണ്ഠന് എവിടെനിന്നാണ് കോവിഡ് ബാധിച്ചതെന്ന് വ്യക്തമല്ല.
മണികണ്ഠന് കോവിഡ് സ്ഥിരീകരിച്ചതിനു പിന്നാലെ തടവുകാരിലും ജയില്‍ ജീവനക്കാരിലും നടത്തിയ പരിശോധനയില്‍ 217 പേര്‍ക്ക് കോവിഡ് സ്ഥിരീകരിച്ചിരുന്നു. ഇതിന് പുറമേ ഇന്ന് 145 പേര്‍ക്കു കൂടി ജയിലില്‍ രോഗം സ്ഥിതികരിച്ചു. ഇവരെ പൂജപ്പുര ജയിലില്‍ തന്നെ ഒരുക്കിയിരിക്കുന്ന പ്രത്യേക ചികിത്സാ കേന്ദ്രത്തിലാണ് പ്രവേശിപ്പിച്ചിരിക്കുന്നത്.