ഇരുമുടികെട്ടുമായി ശബരിമലയില്‍ പോയ സുരേന്ദ്രനെ പൊലീസുകാര്‍ പൊക്കി അകത്തിട്ടത് 21 ദിവസമാണ്. പോരാത്തതിന് അടുത്തകാലത്ത് തുറന്ന് കിടന്ന സെക്രട്ടറിയേറ്റില്‍ കയറിയതിന് അറസ്റ്റ് ചെയ്യുകയും ചെയ്തു. ആ പോലീസുകാര്‍ക്ക് സുരേന്ദ്രനോട് സ്‌നേഹം കൂടിയിരിക്കുകയാണ്. എന്തിന് ഇപ്പോള്‍ സല്യൂട്ടടിക്കാനും റെഡി. സിബിഐ വന്നതോടെയാണ് കേരളത്തില്‍ സുരേന്ദ്രന്റെ വിലയറിഞ്ഞത്.

സംസ്ഥാന ഇന്റലിജന്‍സിന്റെ നിര്‍ദേശ പ്രകാരം ബി.ജെ.പി. സംസ്ഥാന പ്രസിഡന്റ് കെ.സുരേന്ദ്രന് എക്‌സ് കാറ്റഗറി സുരക്ഷ ഒരുക്കാന്‍ പൊലീസ് തീരുമാനിച്ചിരിക്കുന്നത്. എന്നാല്‍, അത് ആവശ്യമില്ലെന്ന നിലപാടിലാണ് സുരേന്ദ്രന്‍.

ഇന്റലിജന്‍സ് എ.ഡി.ജി.പിയുടെ നിര്‍ദ്ദേശ പ്രകാരം കോഴിക്കോട് റൂറല്‍ പൊലീസ് ചീഫ് ഡോ. എ.ശ്രീനിവാസാണ് സുരക്ഷ ഒരുക്കാന്‍ തയ്യാറായത്. ലൈഫ് മിഷന്‍, സ്വര്‍ണ കള്ളക്കടത്ത് കേസുകളിലെ അന്വേഷണം മുറുകുമ്പോള്‍ സി.പി.എം അണികള്‍ പ്രകോപിതരായി ക്രമസമാധാന പ്രശ്‌നം സൃഷ്ടിക്കുമെന്ന് ആശങ്കയുണ്ട്. എന്നാല്‍, തനിക്ക് പൊലീസിനേക്കാള്‍ വിശ്വാസം ജനങ്ങളിലാണെന്ന് സുരേന്ദ്രന്‍ വ്യക്തമാക്കി. 2019 മുതല്‍ കെ.സുരേന്ദ്രന് സുരക്ഷാ ഭീഷണി ഉണ്ടെന്നാണ് റൂറല്‍ പൊലീസ് മേധാവി പറയുന്നത്. അന്ന് ഗണ്‍മാനെ അനുവദിക്കാന്‍ തയ്യാറായെങ്കിലും സുരേന്ദ്രന്‍ സ്വീകരിച്ചില്ല.

അതേസമയം പോലീസുകാരെ ഞെട്ടിപ്പിച്ച തീരുമാനമാണ് സുരേന്ദ്രന്‍ എടുത്തത്. സാധാരണ പാര്‍ട്ടി പ്രവര്‍ത്തകര്‍ക്കില്ലാത്ത സുരക്ഷ തനിക്കാവശ്യമില്ലെന്ന് ബി.ജെ.പി സംസ്ഥാന പ്രസിഡന്റ് കെ.സുരേന്ദ്രന്‍ പറഞ്ഞു. തനിക്ക് സുരക്ഷ നല്‍കാനുള്ള പൊലീസ് നിര്‍ദ്ദേശത്തെക്കുറിച്ച് പ്രതികരിക്കുകയായിരുന്നു അദ്ദേഹം. ഒരുഭാഗത്ത് ഭീഷണിയും അത് കഴിഞ്ഞ് സുരക്ഷയും ആവശ്യമില്ലെന്ന് മുഖ്യമന്ത്രിയെ വ്യംഗ്യമായി പരാമര്‍ശിച്ച് അദ്ദേഹം പറഞ്ഞു. 2019 ആഗസ്റ്റ് 30ലെ ആഭ്യന്തര വകുപ്പ് ഉത്തരവ് പ്രകാരം എക്‌സ് കാറ്റഗറി സുരക്ഷയാണ് നല്‍കേണ്ടത്.

രണ്ടുസായുധ പൊലീസുകാരുടെ സംരക്ഷണമാണ് എക്‌സ് കാറ്റഗറിയില്‍ ഉണ്ടാവുക. ഇപ്പോഴത്തെ രാഷ്ട്രീയ സംഭവവികാസങ്ങളുടെ അടിസ്ഥാനത്തില്‍ സുരേന്ദ്രന് വ്യക്തിപരമായ സുരക്ഷ നല്‍കേണ്ടത് അത്യാവശ്യമാണെന്നാണ് എ.ഡി.ജി.പി (ഇന്റലിജന്‍സ്) കോഴിക്കോട് റൂറല്‍ എസ്.പിക്ക് നിര്‍ദ്ദേശം നല്‍കിയത്. വിവാദമായ സ്വര്‍ണക്കള്ളക്കടത്ത് കേസ് ഉയര്‍ത്തിക്കൊണ്ടുവരികയും അതിനായി നിരവധി പ്രക്ഷോഭങ്ങള്‍ക്ക് നേതൃത്വം നല്‍കുകയും ചെയ്തതോടെ രാഷ്ട്രീയ ശത്രുക്കളുടെ ആക്രമണ സാദ്ധ്യതയുണ്ടെന്നാണ് രഹസ്യാന്വേഷണ ഏജന്‍സികളുടെ വിലയിരുത്തല്‍.

അതേസമയം സിബിഐ വന്നതോടെ തന്റെ പിന്നാലെ ചുറ്റിത്തിരിഞ്ഞ് നീക്കം അറിയാനാണ് ശ്രമമെന്നാണ് സുരേന്ദ്രന്‍ കരുതുന്നത്. അതിനായി തല വച്ചുകൊടുക്കേണ്ട കാര്യമില്ല.

കേരള പൊലീസിന്റെ കോഴിക്കോട് റൂറല്‍ ജില്ലാ പരിധിയില്‍ വരുന്ന ഉള്ള്യേരി സ്വദേശിയാണ് കെ.സുരേന്ദ്രന്‍. നേരത്തെ ബി.ജെ.പി സംസ്ഥാന പ്രസിഡന്റായിരിക്കേ കുമ്മനം രാജശേഖരനും സുരക്ഷ അനുവദിച്ചിരുന്നു.

സര്‍ക്കാരിനെതിരെ ശക്തമായ ആരോപണമാണ് സുരേന്ദ്രന്‍ ഉന്നയിക്കുന്നത്. ലൈഫ് പദ്ധതി തട്ടിപ്പ് വിജിലന്‍സ് അന്വേഷിക്കാനുള്ള സംസ്ഥാന സര്‍ക്കാര്‍ തീരുമാനം കേന്ദ്ര ഏജന്‍സികളുടെ അന്വേഷണം അട്ടിമറിക്കാനാണെന്ന് സുരേന്ദ്രന്‍ പറഞ്ഞു. കേസില്‍ കേന്ദ്ര ഏജന്‍സികള്‍ വിശദമായ അന്വേഷണം നടത്തുമ്പോള്‍ വിജിലന്‍സിനെ ഇറക്കുന്നത് അഴിമതിക്കാരെ രക്ഷിക്കാനാണ്. ലൈഫ് പദ്ധതിയില്‍ കമ്മീഷന്‍ ലഭിച്ചത് മുഖ്യമന്ത്രിയുടെ കുടുംബത്തിനാണെന്ന ആരോപണം നിലനില്‍ക്കെ മുഖ്യമന്ത്രി നേരിട്ട് ഇടപ്പെട്ട് വിജിലന്‍സ് അന്വേഷണം നടത്തുന്നത് ദുരൂഹമാണെന്നും സുരേന്ദ്രന്‍ ആരോപിച്ചു.