ലൈഫ് മിഷന്‍ അഴിമതിയില്‍ മുഖ്യമന്ത്രിക്ക് പങ്കുണ്ടെന്ന കാര്യത്തില്‍ സി.പി.എമ്മിന് അറിവുണ്ട്. അതുകൊണ്ടു തന്നെ സി.ബി.ഐ അന്വേ,ണം മുഖ്യമന്ത്രിയിലേക്ക് എത്തുമെന്ന കാര്യത്തില്‍ സി.പി.എമ്മിന് വ്യക്തമായി അറിയാമെന്നും ബി.ജെ.പി അധ്യക്ഷന്‍ കെ സുരേന്ദ്രന്‍ പറഞ്ഞു. ഈ സാഹചര്യത്തിലാണ് സി.പി.എം സി.ബി.ഐ അന്വേഷണത്തെ എതിര്‍ക്കുന്നതെന്നും അദ്ദേഹം പറഞ്ഞു. കോണ്‍ഗ്രസും ബിജെപിയും ചേര്‍ന്ന് എല്‍ഡിഎഫ് ഭരണത്തെ അട്ടിമറിക്കാന്‍ ശ്രമിക്കുന്നു എന്ന സിപിഎം വാദം തടിതപ്പാനുള്ള ശ്രമം മാത്രമാണ്. സിപിഎം വാദം നിലനില്‍ക്കില്ല. ലൈഫ് മിഷന്‍ അഴിമതി നീളുന്നത് മുഖ്യമന്ത്രിയിലേക്കാണ്. മുഖ്യമന്ത്രിയും മന്ത്രിമാരും ഉന്നതരും കുടുങ്ങും എന്നുറപ്പ് ഉള്ളത് കൊണ്ടാണ് അന്വേഷണത്തെ സിപിഎം എതിര്‍ക്കുന്നത്. ഇത് തടയാനാണ് കോണ്‍ഗ്രസ്സ് ബിജെപി ബന്ധം ആരോപിക്കുന്നതെന്നും സുരേന്ദ്രന്‍ പറഞ്ഞു.

ലൈഫ് മിഷനിലെ സിബിഐ അന്വേഷണം സംബന്ധിച്ചുള്ള സിപിഎമ്മിന്റെ പ്രതികരണം എല്ലാ ജനാധിപത്യ മര്യാദകളും ലംഘിക്കുന്നതാണ്. സിബിഐ എഫ്‌ഐആര്‍ രജിസ്റ്റര്‍ ചെയ്തതിന് ശേഷം മാത്രമാണ് താന്‍ ഇത് സംബന്ധിച്ചു പരസ്യ പ്രതികരണം നടത്തുന്നത്. 24ന് എഫ്‌ഐആര്‍ രജിസ്റ്റര്‍ ചെയ്തു, 25നാണ് താന്‍ ഇതിനെ പറ്റി പറയുന്നത്. മധ്യമപ്രവര്‍ത്തകരില്‍ നിന്ന് ലഭിച്ച വിവരത്തിന്റെ അടിസ്ഥാനത്തില്‍ ആയിരുന്നു തന്റെ പ്രതികരണം. മന്ത്രിമാര്‍ക്കോ ഉദ്യോഗസ്ഥര്‍ക്കോ ഒരു പങ്കും ഇല്ലെന്ന് സര്‍ക്കാര്‍ പറയുന്ന കേസ് വിജിലന്‍സ് അന്വേഷിക്കുന്നതിന് എന്തിനാണ്. ലൈഫ് മിഷനിലെ അഴിമതി മുഖ്യമന്ത്രിയുടെ മാധ്യമ ഉപദേഷ്ടാവും ധനമന്ത്രിയും തന്നെ അംഗീകരിച്ചതാണ്. സര്‍ക്കാര്‍ തന്നെ അംഗീകരിച്ച അഴിമതി കേസാണ് ഇത്. സിബിഐ അന്വേഷണം അട്ടിമറിക്കാന്‍ ആണ് വിജിലന്‍സ് അന്വേഷണം. സിബിഐ വരുമെന്ന് ഉറപ്പായപ്പോള്‍ ആണ് വിജിലന്‍സ് സര്‍ക്കാര്‍ അന്വേഷണം പ്രഖ്യാപിക്കുന്നത്. അന്വേഷണത്തിന്റെ പ്രാഥമിക ഘട്ടത്തില്‍ ഒരിക്കലും സെക്രട്ടേറിയറ്റില്‍ നിന്ന് ഫയലുകള്‍ വിജിലസിന് ശേഖരിക്കാനാവില്ല. സര്‍ക്കാര്‍ പച്ചക്കള്ളം പറയുന്നു, പാര്‍ട്ടി അതിനെ ന്യായീകരിക്കുന്നു.

ശിവശങ്കരനും സ്വപ്‌നയും വിദേശ യാത്ര നടത്തിയതിന് ശേഷം കേരളത്തിലേക്ക് പണം ഒഴുകിയിട്ടുണ്ട്. വടക്കാഞ്ചേരി ലൈഫ് മിഷന്‍ പദ്ധതിക്ക് വേണ്ടി പണം വന്ന ബാങ്ക് അക്കൗണ്ടിലേക്ക് വേറെ പണവും വന്നിട്ടുണ്ട്. ഇക്കാര്യങ്ങള്‍ എല്ലാം അന്വേഷിക്കേണ്ടി വരും. അഴിമതി പണത്തിന്റെ ഒരു പങ്ക് സിപിഎമ്മിനും ലഭിച്ചെന്ന് സംശയിക്കുന്നു. മകന് എതിരായ കേസില്‍ മറുപടി പറയാന്‍ കോടിയേരി ബാലകൃഷ്ണന് ധാര്‍മിക ഉത്തരവാദിത്തം ഉണ്ട്. മാസങ്ങള്‍ മാത്രം ആയുസ്സ് ഉള്ള പിണറായി സര്‍ക്കാരിനെ അട്ടിമറിക്കാന്‍ ഒരു ശ്രമവും ഇല്ല. പക്ഷേ യു വി ജോസിനെ സംരക്ഷിക്കാനുള്ള നീക്കങ്ങള്‍ പാടില്ല. രാഷ്ട്രീയ ആവശ്യങ്ങള്‍ക്ക് ഉദ്യോഗസ്ഥര്‍ ചട്ടുകം ആകരുത്. കോണ്‍ഗ്രസിന് ഈ കേസില്‍ ഉള്ള താത്പര്യം വരും ദിവസങ്ങളില്‍ കുറയും. വിദേശ നാണയ വിനിമയ ചട്ടം ലംഘിച്ചതിന് നേരത്തെ സംസ്ഥാനത്ത് സമാന നടപടി ഉണ്ടായിട്ടുണ്ട്. ഉമ്മന്‍ ചാണ്ടി സര്‍ക്കാരിന്റെ കാലത്തായിരുന്നു പരാതിക്കാസ്പദമായ സംഭവം. വുഡ് ആന്‍ഡ് ആഡ് എന്ന സ്ഥാപനവുമായി ബന്ധപ്പെട്ടായിരുന്നു പരാതി. ഈ സംഭവത്തില്‍ വിജിലന്‍സ് അന്വേഷണം പര്യാപ്തമല്ലെന്നും സിബിഐ അന്വേഷണമാകാമെന്നും നിലപാടെടുത്തത് പിണറായി സര്‍ക്കാരാണെന്നും സുരേന്ദ്രന്‍ പറഞ്ഞു.