ബിജെപി സംസ്ഥാന പ്രസിഡന്റ് കെ. സുരേന്ദ്രന്‍ ഇന്ന് പത്രിക നാമനിര്‍ദേശ പത്രിക സമര്‍പ്പിക്കും. മഞ്ചേശ്വരത്താണ് സുരേന്ദ്രന്‍ ബിജെപി സ്ഥാനാര്‍ത്ഥിയായി മത്സരിക്കുന്നത്. 2016 ല്‍ നഷ്ടമായ മഞ്ചേശ്വരം കീഴടക്കാനാണ് ഇത്തവണ സുരേന്ദ്രന്റെ പരിശ്രമം.

രണ്ടു മണ്ഡലങ്ങളില്‍ മത്സരിക്കുന്നതിന്റെ തിരക്ക് പരിഹരിക്കുന്നതിനായി വിപുലമായ ഒരുക്കങ്ങളാണ് പാര്‍ട്ടി തയ്യാറാക്കിയിരിക്കുന്നത്.പ്രമുഖരെ അടക്കം എത്തിച്ച് പ്രചാരണം കൊഴുപ്പിക്കുന്നതിനൊപ്പം സ്ഥാനാര്‍ത്ഥി പരമാവധി വോട്ടര്‍മാരെ നേരില്‍ കാണുന്നതിനും പ്രാധാന്യം നല്‍കും.

മഞ്ചേശ്വരത്ത് ഇത്തവണ അനുകൂലമായ സാഹചര്യമാണുള്ളതെന്ന് സുരേന്ദ്രന്‍ വിലയിരുത്തുന്നു. രണ്ടു മണ്ഡലങ്ങളിലെ സ്ഥാനാര്‍ത്ഥിത്വം പ്രചാരണത്തെ ബാധിക്കില്ലെന്നുമാണ് സുരേന്ദ്രന്റെ കണക്കുകൂട്ടല്‍.

എല്‍.ഡി.എഫിലും യു.ഡി.എഫിലും ശക്തമായ അടിയൊഴുക്കുകളുടെ കാലമാണ് വരാന്‍ പോകുന്നതെന്ന് സുരേന്ദ്രന്‍ പറഞ്ഞു.35 സീറ്റ് നേടിയാല്‍ സംസ്ഥാന ഭരണം ബിജെപി നേടുമെന്ന മുന്‍ നിലപാടില്‍ ഉറച്ചു തന്നെയാണ് സുരേന്ദ്രന്‍ കളത്തിലിറങ്ങിയിരിക്കുന്നത്.

അതേസമയം രണ്ട് മണ്ഡലങ്ങളില്‍ മത്സരിക്കുക എന്നത് ഇന്ത്യയില്‍ പുതിയ കാര്യമല്ല. സംസ്ഥാനത്തും പുതിയ കാര്യമല്ല. പ്രമുഖരായ പല നേതാക്കളും രണ്ട് മണ്ഡലങ്ങളില്‍ മത്സരിച്ചിട്ടുണ്ട്. ദേശീയ തലത്തിലും ആളുകള്‍ രണ്ട് മണ്ഡലങ്ങളില്‍ മത്സരിക്കുന്നുണ്ട്. രണ്ട് മണ്ഡലങ്ങളില്‍ അത് തെറ്റായി കാണേണ്ട കാര്യമില്ലെന്നും കെ. സുരേന്ദ്രന്‍ പറഞ്ഞു.

ഇ. ശ്രീധരനെപ്പോലെ വിവിധ മേഖലയില്‍ കഴിവ് തെളിയിച്ച പ്രഗത്ഭരുടെ പട്ടികയാണ് പുറത്തിറക്കിയതെന്നും സുരേന്ദ്രന്‍ പറഞ്ഞു. പല ജനറല്‍ സീറ്റുകളിലും പട്ടികജാതി- പട്ടികവര്‍ഗ സമൂഹത്തില്‍പ്പെട്ട പ്രമുഖരായിട്ടുള്ള ആളുകളെ നിര്‍ത്തിയിട്ടുണ്ട്. സ്ത്രീകള്‍ക്കും മതന്യൂനപക്ഷങ്ങള്‍ക്ക് വലിയ പ്രാധാന്യം നല്‍കിയിട്ടുണ്ട്.

എട്ട് ക്രിസ്ത്യന്‍ സ്ഥാനാര്‍ഥികളേയും രണ്ട് മുസ്ലീം സ്ഥാനാര്‍ഥികളേയും സ്ഥാനാര്‍ഥിപട്ടികയില്‍ ഉള്‍പ്പെടുത്തിയിട്ടുണ്ടെന്നും സുരേന്ദ്രന്‍ കുട്ടിച്ചേര്‍ത്തു.