ആധാര്‍ ഇല്ലാത്തവരും എടുക്കാനാവാത്തവരുമായവര്‍ക്ക് പ്രത്യേക അനുമതിയോടെ കേരളത്തില്‍ റേഷന്‍ കാര്‍ഡ് നല്‍കി. ആധാര്‍ റേഷന്‍കാര്‍ഡുമായി ബന്ധിപ്പിക്കാത്തതിന്റെ പേരില്‍ ദേശീയതലത്തില്‍ മൂന്നുകോടി റേഷന്‍കാര്‍ഡുകള്‍ റദ്ദാക്കിയ സാഹചര്യത്തിലാണ് കേരളം പ്രത്യേക പരിഗണന അര്‍ഹിക്കുന്നവര്‍ക്ക് കാര്‍ഡ് നല്‍കിയത്.

കിടപ്പുരോഗികള്‍, ഭിന്നശേഷിക്കാര്‍, മാനസിക വൈകല്യമുള്ളവര്‍, ബയോമെട്രിക് രേഖകള്‍ തെളിയാത്തവര്‍ എന്നിവരടക്കം ആധാര്‍ എടുക്കാനാവാത്തവര്‍ക്ക് സിവില്‍ സപ്ലൈസ് ഡയറക്ടറേറ്റ് വഴിയാണ് കാര്‍ഡ് നല്‍കിയിത്. ഇത്തരത്തില്‍ അമ്ബതോളം കാര്‍ഡുകളാണ് വിതരണം ചെയ്തത്.



ഈ സംവിധാനം ദുരുപയോഗം ചെയ്യാതിരിക്കാനാണ് സിവില്‍ സപ്ലൈസ് ഡയറക്ടറേറ്റ് നേരിട്ട് സംസ്ഥാനതലത്തില്‍ കാര്‍ഡ് നല്‍കിയത്.

അപേക്ഷകളുമായെത്തുന്ന, പ്രത്യേക പരിഗണന അര്‍ഹിക്കുന്നവരുടെ വിവരങ്ങള്‍ താലൂക്ക് സപ്ലൈ ഓഫിസര്‍ പരിശോധിച്ച് അന്വേഷണ റിപ്പോര്‍ട്ട് സിവില്‍ സപ്ലൈസ് ഡയറക്ടര്‍ക്ക് നല്‍കുകയാണ് ചെയ്യുക.



ഡയറക്ടര്‍ ഇക്കാര്യം പരിശോധിച്ച് ബോധ്യപ്പെടുന്നതോടെ ഓണ്‍ലൈന്‍ റേഷന്‍ കാര്‍ഡിനായി നാഷനല്‍ ഇന്‍ഫര്‍മാറ്റിക്‌സ് സെന്റര്‍ (എന്‍.ഐ.സി) രൂപകല്‍പന ചെയ്ത വെബ് പോര്‍ട്ടലില്‍ അപേക്ഷകന് അനുസരിച്ച ആപ്ലിക്കേഷന്‍ ജനറേറ്റ് ചെയ്യപ്പെടും.ഇതോടെ ആധാര്‍ ഇല്ലാതെ മുന്നോട്ടുപോകാനാവാത്ത സാഹചര്യം പോര്‍ട്ടലില്‍നിന്ന് ഒഴിവാകും. തുടര്‍ന്ന് താലൂക്ക് സപ്ലൈ ഓഫിസുകള്‍ കേന്ദ്രീകരിച്ച് ഇത്തരക്കാര്‍ക്ക് റേഷന്‍ കാര്‍ഡ് നല്‍കുന്നതുമായി ബന്ധപ്പെട്ട നടപടികള്‍ സ്വീകരിക്കാനാവും.

ആധാറുമായി ബന്ധിപ്പിക്കാത്തിന്റെ പേരില്‍ കേരളത്തില്‍ ആര്‍ക്കും റേഷന്‍ തടയുകയോ കാര്‍ഡ് റദ്ദാക്കുകയോ ചെയ്തിട്ടില്ലെന്ന് പൊതുവിതരണ വകുപ്പ് അധികൃതര്‍ വ്യക്തമാക്കി. കേരളത്തിലെ റേഷന്‍കാര്‍ഡ് അംഗങ്ങളില്‍ 95.25 ശതമാനം ആധാറുമായി ബന്ധിപ്പിച്ചു കഴിഞ്ഞു.

3,56,76,984 പേരില്‍ 3,39,82,325 അംഗങ്ങളുടെ ആധാറാണ് ബന്ധിപ്പിച്ചത്. ഇതില്‍തന്നെ ഗുണഭോക്താക്കളായ അന്ത്യോദയ, മുന്‍ഗണന വിഭാഗത്തില്‍പെട്ട അംഗങ്ങളില്‍ 96 ശതമാനവും ആധാര്‍ ബന്ധിപ്പിച്ചു. ബാക്കിയുള്ളവരില്‍ അധിക അംഗങ്ങളും നേരത്തേ പറഞ്ഞ കാരണങ്ങളാല്‍ ബന്ധിപ്പിക്കാന്‍ കഴിയാത്തവരാണ്.