ചിലർ ആപത്തിൽ അകപ്പെടാറുണ്ട്. എന്നാൽ അവർ അത്ഭുതകരമായി ആ ആപത്തിൽ നിന്ന് രക്ഷപ്പെടും. മരണം മുഖാമുഖം കാണുന്ന നിമിഷങ്ങളിലും സഹായമായി ഒരുകൈ എത്തുന്നതിന് പലരും പലരീതിയിലും വ്യാഖ്യാനിക്കും. ഇവിടെ ഇതാ മരണത്തെ മുഖാമുഖം കണ്ടിട്ടും അത്ഭുതകരമായി രക്ഷപ്പെട്ടിരിക്കുകയാണ് ഒരാൾ.

അദ്ദേഹത്തിന് രക്ഷകനായത് മറ്റൊരാളുടെ സമയോചിതമായ ഇടപെടൽ. നെഞ്ചിടിപ്പ് കൂട്ടുന്ന നിമിഷങ്ങൾ നൽകുന്ന വാർത്തയാണ് ഇപ്പോൾ പുറത്തു വരുന്നത്. സംഭവം ഇങ്ങനെയാണ്. കെട്ടിടത്തിൽ നിന്നും തലകറങ്ങി താഴേക്ക് വീഴുകയായിരുന്നു ബാബു.

താഴെ ആകട്ടെ വൈദ്യുതി കമ്പികളും ഉണ്ടായിരുന്നു. രണ്ട് ആപത്തുകളുടെ ഇടയിൽ നിന്നും അത്ഭുതകരമായി അദ്ദേഹത്തെ മറ്റൊരു ബാബുവിന്റെ കരങ്ങൾ രക്ഷിക്കുകയായിരുന്നു.

കെട്ടിടത്തിന്റെ ഒന്നാം നിലയിൽനിന്നു തലകറങ്ങി വീണ ആളെ കാലി‍ൽ പിടിച്ചു രക്ഷപ്പെടുത്തുകയായിരുന്നു. ഈ തൊഴിലാളിക്ക് അഭിനന്ദന പ്രവാഹമാണ് ഇപ്പോൾ വന്നു കൊണ്ടിരിക്കുന്നത്. വടകര കേരള ബാങ്കിന്റെ ശാഖ കെട്ടിടത്തിന്റെ ഒന്നാം നിലയിലെ വരാന്തയിൽ നിൽക്കുമ്പോൾ ആയിരുന്നു താഴേക്കു പതിച്ചത്.

അരൂർ ഹരിത വയൽ ബിനു നിലയത്തിൽ ബിനു എന്ന ബാബു(38)വിനെയാണ് സമീപത്തു നിൽക്കുകയായിരുന്ന കീഴൽ യുപി സ്കൂളിനു സമീപം തയ്യിൽ മീത്തൽ ബാബുരാജ് (45) രക്ഷിച്ചത്. കെട്ടിടത്തിനു താഴെ വൈദ്യുതകമ്പി ഉൾപ്പെടെയുണ്ടായിരുന്നു. താഴേക്കു വീണിരുന്നെങ്കില്‍ വൻ അപകടം സംഭവിക്കുമായിരുന്നു.

തൊഴിലാളികളായ ഇരുവരും ക്ഷേമനിധി അടയ്ക്കാനാണ് ബാങ്കിൽ എത്തിയത്. ഊഴം കാത്ത് ബാങ്ക് വരാന്തയിൽ നിൽക്കുമ്പോൾ ബിനു പെട്ടെന്ന് കെട്ടിടത്തിന്റെ കൈവരിയും കടന്ന് പിറകിലേക്കു വീഴുകയായിരുന്നു.

പെട്ടെന്ന് ബിനുവിന്റെ കാലിന്മേൽ പിടിത്തം കിട്ടിയ ബാബുരാജ് കൈവരിയോട് കാൽ ചേർത്തു പിടിച്ച് നിന്നു. തുടർന്നു മറ്റുള്ളവരെ സഹായത്തിനായി വിളിച്ചു. അപ്പോഴേക്കും ബാങ്കിൽ എത്തിയവരും ജീവനക്കാരും സെക്യൂരിറ്റി ജീവനക്കാരനും ഓടിയെത്തി ബിനുവിനെ പിടിച്ച് ഉയർത്തി വരാന്തയിൽ കിടത്തി.

നേരത്തെ യുഎൽസിസിഎസിലെ ജീവനക്കാരനായിരുന്നു ബിനു. നിർമാണ തൊഴിലാളിയാണ് രക്ഷപ്പെടുത്തിയ ബാബുരാജ്. ആശുപത്രിയിൽ പ്രഥമശുശ്രൂഷയ്ക്ക് ശേഷം ബിനുവിനെ വീട്ടിലേക്ക് വിട്ടു.

തക്ക സമയത്ത് ഒരാളെ രക്ഷിക്കാൻ കഴിഞ്ഞതിലുള്ള സന്തോഷത്തിലാണ് ബാബുരാജ്. ബിനു വീഴുന്നതിന്റെയും ബാബുരാജ് രക്ഷിക്കുന്നതിന്റെയും സിസിടിവി ദൃശ്യം സമൂഹമാധ്യമങ്ങളിൽ വൈറൽ ആയി.