ആശങ്കപ്പെടേണ്ടതില്ലെന്നും ബ്ലാക്ക് ഫംഗസ് ഒരാളില് നിന്ന് മറ്റൊരാളിലേക്ക് പകരുന്ന രോഗമല്ലെന്നും മുഖ്യമന്ത്രി
മലപ്പുറത്ത് ബ്ലാക്ക് ഫംഗസ് റിപ്പോര്ട്ട് ചെയ്യപ്പെട്ട സാഹചര്യത്തില് ജനങ്ങള്ക്കിടയില് ആശങ്കകള് ഉയരുന്നുണ്ടെന്നും ഒരാളില് നിന്നും മറ്റൊരാളിലേക്ക് പകരുന്ന രോഗമല്ലിതെന്നും മുഖ്യമന്ത്രി പിണറായി വിജയന്. അതിനാല് രോഗബാധിക്കുന്നവര്ക്ക് ആവശ്യമായ ചികിത്സയും സഹായവും നല്കാന് മറ്റുള്ളവര് തയ്യാറാകണമെന്ന് മുഖ്യമന്ത്രി ആവശ്യപ്പെട്ടു.
മഹാരാഷ്ട്രയില് ഈ രോഗം റിപ്പോര്ട്ട് ചെയ്യപ്പെട്ടപ്പോള് തന്നെ കേരളം അതിനെതിരെ ജാഗ്രത ആരംഭിച്ചിരുന്നു. നിലവില് സംസ്ഥാനത്ത് 15 കേസുകളാണ് റിപ്പോര്ട്ട് ചെയ്തിരിക്കുന്നത്. കോവിഡ് രോഗികളില് ചികിത്സയില് രക്തത്തിലെ ഗ്ലൂക്കോസ് നില കൃത്യമായി നിലനിര്ത്തുന്നതിനാവശ്യമായ മാനദണ്ഡങ്ങള് ചികിത്സാ പ്രോട്ടോക്കോളില് ഉള്പ്പെടുത്തിയ ആദ്യത്തെ സംസ്ഥാനമാണ് കേരളം. കോവിഡ് മറ്റു പല സംസ്ഥാനങ്ങളില് ബ്ലാക്ക് ഫംഗസ് കേസുകള് വ്യാപകമായി റിപ്പോര്ട്ട് ചെയ്യപ്പെട്ട സാഹചര്യത്തില് നമ്മുടെ ജാഗ്രതയും കൂടുതല് ശക്തമാക്കാനുള്ള നടപടികള് സ്വീകരിക്കേണ്ടതാണ്. പ്രമേഹ രോഗമുള്ളവര് ഈ സമയത്ത് കൂടുതല് ശ്രദ്ധയോടെ രോഗത്തെ ചികിത്സിക്കണം. കോവിഡ് ബാധിച്ച പ്രമേഹ രോഗികള് പ്രത്യേക ശ്രദ്ധ പുലര്ത്തണം. നിര്ദേശങ്ങള്ക്കായി ഇസഞ്ജീവനി സോഫ്റ്റ്വെയര് വഴി ഡോക്ടര്മാരുമായി ബന്ധപ്പെടാമെന്നും മുഖ്യമന്ത്രി പറഞ്ഞു.
സ്റ്റിറോയിഡുകള് കോവിഡ് കാലത്ത് ജീവന് രക്ഷാ മരുന്നുകള് ആണെന്നും ഡോക്ടര്മാരുടെ നിര്ദ്ദേശപ്രകാരം മാത്രമേ സ്റ്റിറോയിഡുകള് ഉപയോഗിക്കാവു എന്നും മുഖ്യമന്ത്രി പറഞ്ഞു. ശക്തമായ തലവേദന, കണ്ണുകള്ക്കും ചുറ്റും ശക്തമായ വേദന, കാഴ്ച മങ്ങുക, മൂക്കില് നിന്നും കറുപ്പ് നിറത്തിലുള്ള ദ്രവം പുറത്തുവരിക എന്നിവയാണ് രോഗ ലക്ഷണങ്ങള്. ഡോക്ടര്മാര് നല്കുന്ന നിര്ദേശങ്ങള് കൃത്യമായി പാലിക്കണമെന്നും മുഖ്യമന്ത്രി പറഞ്ഞു.
https://www.facebook.com/Malayalivartha
