മത്സ്യത്തൊഴിലാളികളെ പെരുവഴിയിലാക്കിയിട്ട് വിഴിഞ്ഞം പദ്ധതി നടപ്പിലാക്കാന്‍ സമ്മതിക്കില്ലെന്ന് തിരുവനന്തപുരം രൂപത. അങ്ങനെ രൂപത പരസ്യമായി വിഴിഞ്ഞം പദ്ധതിക്കെതിരെ രംഗത്തെത്തി. പദ്ധതിക്ക് എതിരായ ഇടയലേഖനം ഇന്ന് പള്ളികളില്‍ വായിച്ചു.
തീരദേശ ജനതയെ വെല്ലുവിളിച്ചുകൊണ്ട് പദ്ധതി നടപ്പിലാക്കാന്‍ അനുവദിക്കില്ലെന്ന് ആര്‍ച്ച് ബിഷപ്പ് ഡോ. സൂസപാക്യം പുറത്തിറക്കിയ ഇടയലേഖനത്തില്‍ മുന്നറിയിപ്പ് നല്‍കുന്നു. ഇന്ന് രാവിലെ സഭയുടെ കീഴിലുള്ള 82 പള്ളികളില്‍ രാവിലെ വിശുദ്ധ കുര്‍ബാനയ്ക്ക് ശേഷമാണ് ഇത് വായിച്ചത്. ഇടയലേഖനത്തിന്റെ പൂര്‍ണ രൂപം ഇന്നലെ ബിഷപ്പ് ഹൗസില്‍ നിന്ന് മാദ്ധ്യമങ്ങള്‍ക്ക് കൈമാറിയിരുന്നു.
തുറമുഖം വരുന്നതോടെ തൊഴിലും ഭൂമിയും നഷ്ടമാകുന്ന അടിമലത്തുറ മുതല്‍ പൊഴിയൂര്‍ വരെയുള്ള അര ലക്ഷത്തോളം മത്സ്യത്തൊഴിലാളികളുടെ പുനരധിവാസപാക്കേജ് വിഴിഞ്ഞം പദ്ധതിയില്‍ ഉള്‍പ്പെടുത്തണമെന്നാണ് സഭയുടെ പ്രധാന ആവശ്യം.
വിഴിഞ്ഞം കടലില്‍ വന്‍ പുലിമുട്ടുകളും വാര്‍ഫുകളും വരുമ്പോള്‍ വേളി വരെ കനത്ത കടലാക്രമണം ഉണ്ടാകുമെന്നും പൊഴിയൂര്‍ വരെയുള്ള 32 ഗ്രാമങ്ങളിലെ മത്സ്യത്തൊഴിലാളികള്‍ക്ക് മീന്‍പിടിച്ച് ഉപജീവനത്തിനുള്ള സാദ്ധ്യത ഇല്ലാതാകുമെന്നുമാണ് സഭയുടെ ആശങ്കയെന്ന് ബിഷപ്പ് സൂസപാക്യത്തിന്റെ ഓഫീസില്‍ നിന്ന് അറിയിച്ചു.
അഞ്ചു തെങ്ങില്‍ പുലിമുട്ട് സ്ഥാപിച്ചപ്പോള്‍ പൂന്തുറ, പനത്തുറ ഭാഗങ്ങളില്‍ ഉണ്ടായ വന്‍ കടലാക്രമണം ഉദാഹരണമായി സഭ ചൂണ്ടിക്കാട്ടി. വിഴിഞ്ഞവുമായി ബന്ധപ്പെട്ട പരിസ്ഥിതി ആഘാത പഠന റിപ്പോര്‍ട്ടില്‍ ഇക്കാര്യം പരാമര്‍ശിച്ചിട്ടുണ്ടെങ്കിലും സര്‍ക്കാര്‍ അത് രഹസ്യമായി സൂക്ഷിക്കുകയാണ്. സഭയുടെ ആശങ്ക പലവട്ടം സര്‍ക്കാരിനെ അറിയിച്ചെങ്കിലും അനുകൂല സമീപനമുണ്ടായില്ലെന്നും ലേഖനത്തില്‍ പറയുന്നു.
തിരുവനന്തപുരം എയര്‍പോര്‍ട്ടിനും, തുമ്പ നിലയത്തിനും വേണ്ടി രൂപതയുടെ അത്രയും ത്യാഗം സഹിച്ചവര്‍ ഇല്ലെന്നും ഇടയലേഖനത്തില്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha