രാത്രി സ്‌കൂട്ടറില്‍ സഞ്ചരിക്കവെ കണ്ണില്‍ മുളകുപൊടി വിതറി യാത്രക്കാരനില്‍ നിന്നും മോഷ്ടാക്കള്‍ 1,80 ,000 രൂപ കവര്‍ന്നതായി പരാതി . തിങ്കളാഴ്ച രാത്രി എട്ടരയോടെ തിക്കോടി പാലൂരില്‍ മുതിരക്കാല്‍ മുക്കില്‍ എരവത്ത് താഴെ കുനി സത്യന്റെ (50) പക്കലുണ്ടായിരുന്ന പണമാണ് മോക്ഷണ സംഘം തട്ടിപ്പറിച്ചത്.

വീട്ടിലേക്ക് പണവുമായി വരുന്ന വഴി അരിവാള്‍ മുക്കിന് സമീപത്തെ തെരുവുവിളക്കുകള്‍ കത്താത്ത ഭാഗത്താണ് സംഭവം നടന്നത്. ആള്‍ത്താമസമില്ലാത്ത വീട്ടുപറമ്ബില്‍ നിന്നും മാസ്‌ക് ധരിച്ച മോഷ്ടാക്കളായ രണ്ട് പേര്‍ പൊടുന്നനെ സത്യന്റെ സമീപത്തേക്ക് ചാടി വീഴുകയായിരുന്നു .
സത്യന്റെ കഴുത്തില്‍ പിടിമിറുക്കിയ മോക്ഷണ സംഘം ഇദ്ദേഹം ധരിച്ച ട്രൗസറിന്റെ പോക്കറ്റില്‍ സൂക്ഷിച്ച പണം കവര്‍ന്നതെന്നാണ് ??പൊലീസിന് നല്‍കിയ മൊഴിയില്‍ പറയുന്നത്.പെയിന്റിംങ് തൊഴിലാളിയായ സത്യന്‍ നടത്തുന്ന കുറിയുടെ പണം സുഹൃത്തുക്കളില്‍ നിന്ന് ശേഖരിച്ച് വരവെയാണ് തുക അപഹരിക്കപ്പെട്ടത്. സംഭവത്തെ തുടര്‍ന്ന് വഴിയാത്രക്കാരുടെ സഹായത്തോടെ വീട്ടുകാരെ ബന്ധപ്പെട്ട ശേഷം കൊയിലാണ്ടി താലൂക്ക് ആശുപത്രിയില്‍ ചികിത്സ തേടുകയും ശേഷം പയ്യോളി പൊലീസില്‍ പരാതി നല്‍കുകയുമായിരുന്നു .വിരലടയാള വിദഗ്ദ്ധരും , പോലീസ് നായയും , ഫോറന്‍സിക് സംഘവും സ്ഥലത്തെത്തി തെളിവുകള്‍ ശേഖരിച്ചിട്ടുണ്ട് . ആക്രമിക്കപ്പെട്ട സ്ഥലത്തും , സ്‌കൂട്ടറില്‍ സൂക്ഷിച്ച ഹെല്‍മെറ്റിലും മുളകുപൊടി കണ്ടെത്തിയിട്ടുണ്ട്.