യുവാവിനെ ഗുണ്ടാസംഘം തട്ടികൊണ്ടുപോയി കൊലപ്പെടുത്തിയത് സംഘാംഗത്തെ മര്‍ദിക്കുന്ന ദൃശ്യങ്ങള്‍ക്ക് ലൈക്കും കമന്റും നല്‍കിയതിന്റെ പ്രതികാരമെന്ന് പൊലീസ്. കൃത്യമായ ആസൂത്രണത്തോടെ നടപ്പിലാക്കിയ കൊലപാതകത്തിലെ അഞ്ച് പ്രതികളെയും പിടികൂടി.

ജോമോന്റെ കൂട്ടാളി പുല്‍ച്ചാടി ലുധീഷിനെ എതിര്‍ സംഘം മര്‍ദ്ദിച്ച ദൃശ്യത്തിന് ഷാന്‍ ബാബു ലൈക്കും കമന്റും ഇട്ടതാണ് കൊല്ലാന്‍ പ്രകോപനമായതെന്നാണ് പൊലീസ് പറയുന്നത്. കൊല്ലാന്‍ വേണ്ടി തന്നെയാണ് തട്ടിക്കൊണ്ട് പോയത്. കൊലപാതക സംഘത്തിലെ നാല് പേരും നിരവധി ക്രിമിനല്‍ കേസുകളില്‍ പ്രതികളാണ്.

ജോമോന്‍ ഉള്‍പ്പെട്ട ഗുണ്ടാസംഘത്തിന്റെ തലവന്‍ മണര്‍കാട് സ്വദേശി ലുധീഷ് ഉള്‍പ്പെടെ അഞ്ചുപേരാണ് കേസിലെ പ്രതികള്‍. കഴിഞ്ഞ ഒക്ടോബറില്‍ ലുധീഷിനെ തൃശൂരില്‍ എത്തിച്ച് മറ്റൊരു ഗുണ്ടയായ സൂര്യന്റെ സംഘം മര്‍ദ്ദിച്ചിരുന്നു.

മര്‍ദ്ദനം ചിത്രീകരിച്ച് സമൂഹ്യമാധ്യത്തില്‍ പോസ്റ്റ് ചെയ്തു. ഈ പോസ്റ്റില്‍ ഷാന്‍ ബാബു ലൈക്കും കമന്റും നല്‍കിയതാണ് ജോമോന്റെ പകയ്ക്ക് കാരണമെന്നാണ് എസ്പി ഡി ശില്‍പ പറയുന്നത്. കേസില്‍ പൊലീസിന് വീഴ്ച പറ്റിയിട്ടില്ലെന്ന് എസ്പി വിശദീകരിച്ചു.