സംസ്ഥാനത്ത് ട്രോളിങ് നിരോധനം ജൂൺ 9 മുതൽ ആരംഭിക്കുമെന്ന് റിപ്പോർട്ട്. ജൂലൈ 31വരെയാണ് നിരോധനം നിലനിൽക്കുക എന്നാണ് അറിയാൻ കഴിയുന്നത്. മന്ത്രി സജി ചെറിയാൻ്റെ അധ്യക്ഷതയിൽ ചേർന്ന യോഗത്തിലാണ് ഇത്തരത്തിൽ തീരുമാനം കൈക്കൊണ്ടിരിക്കുന്നത്. ഇതോടെ ഇത്തവണത്തെ ട്രോളിങ് നിരോധനം 52 ദിവസം നീണ്ട് നിൽക്കുമെന്ന കാര്യമാണ് വ്യക്തമായിരിക്കുന്നത്.

അതോടൊപ്പം തന്നെ ഇതിന് മുൻപായി തന്നെ അന്യസംസ്ഥാന ബോട്ടുകൾ കേരള തീരം വിട്ടു പോകുന്നതിന് ബന്ധപ്പെട്ട തീരദേശ കളക്ടർമാർ നിർദേശം നൽകണമെന്ന് മന്ത്രി നിർദേശിക്കുകയുണ്ടായി. എല്ലാ തീരദേശ ജില്ലകളിലും24 മണിക്കൂറും പ്രവർത്തിക്കുന്ന ഫിഷറീസ് കൺട്രോൾ റൂമുകൾ മെയ് പതിനഞ്ച് മുതൽ പ്രവർത്തനം ആരംഭിച്ചിരിക്കുന്നത്. ട്രോളിങ് നിരോധനം നിലവിലുള്ള കാലയളവിൽ ട്രോളിങ് ബോട്ടിൽ തൊഴിലെടുക്കുന്ന മത്സ്യത്തൊഴിലാളികൾക്ക് അവയെ ആശ്രയിച്ച് ഉപജീവനം കണ്ടെത്തുന്ന അനുബന്ധത്തൊഴിലാളികൾക്കും അനുവദിക്കുന്ന സൗജന്യ റേഷൻ വിതരണം ഊർജിതമാക്കുമെന്ന് മന്ത്രി വ്യക്തമാക്കുകയുണ്ടായി.

അതോടൊപ്പം തന്നെ ജൂൺ ഒമ്പതിന് വൈകുന്നേരത്തോടെ തന്നെ ട്രോളിങ് ബോട്ടുകൾ സുരക്ഷിതമായ സ്ഥലത്തേക്ക് മാറ്റിയിടാൻ മറൈൻ എൻ ഫോഴ്സ്‌മെൻ്റും കോസ്റ്റൽ പോലീസും ഉറപ്പാക്കേണ്ടതാണ്. നിരോധനം ലംഘിക്കുന്ന ബോട്ടുകൾക്കെതിരെ കർശന നിയമനടപടി സ്വീകരിക്കണമെന്ന് നിർദേശവും നൽകിയിട്ടുണ്ട്. ട്രോളിങ് നിരോധന കാലയളവിൽ ഇൻബോർഡ് വള്ളങ്ങൾക്കൊപ്പം ഒരു കാരിയർ വള്ളം മാത്രമേ അനുവദിക്കുകയുള്ളു.

നിരോധന കാലയളവിൽ തന്നെ കടലിൽ രക്ഷാപ്രവർത്തനങ്ങൾ വേണ്ടിവരുമ്പോൾ ഫിഷറീസ് വകുപ്പ് മറൈൻ എൻ ഫോഴ്സ്‌മെൻ്റ്, കോസ്റ്റൽ പോലീസ് എന്നിവ ഏകോപനത്തോടെ പ്രവർത്തിക്കണം എന്നാണ് നിർദ്ദേശം നൽകിയിരിക്കുന്നത്. അടിയന്തര സാഹചര്യമുണ്ടായാൽ ഇന്ത്യൻ നേവി, ഇന്ത്യൻ കോസ്റ്റ് ഗാർഡ് എന്നിവർ സജ്ജമായിരിക്കണമെന്നും നിർദേശം നൽകിയിട്ടുണ്ട്.

കൂടാതെ കടൽ സുരക്ഷയുടെയും തീര സുരക്ഷയുടെയും ഭാഗമായി കടലിൽ പോകുന്ന എല്ലാ മത്സ്യത്തൊഴിലാളികൾക്കും ബയോമെട്രിക് ഐ.ഡി / ആധാർ കാർഡ്, ലൈഫ് ജാകറ്റ് എന്നിവ കരുതിയിട്ടുണ്ടെന്ന് ഉറപ്പാക്കേണ്ടതാണ്. ഏകീകൃത കളർ കോഡിങ് നടത്തിയിട്ടില്ലാത്ത ബോട്ടുകൾ ട്രോളിങ് നിരോധന കാലയളവിൽ തന്നെ അടിയന്തരമായി കളർ കോഡിങ് നടത്തണമെന്നും യോഗം തീരുമാനിക്കുകയും ചെയ്തിട്ടുണ്ട്. സംസ്ഥാനത്ത് ട്രോളിങ് നിരോധനം നിലവിൽ വരുന്നതോടെ മീൻ വിപണിയിൽ വില ഉയരുമെന്ന് വ്യക്തമായിരിക്കുകയാണ്.