നടന്‍ ധര്‍മജന്‍ ബോള്‍ഗാട്ടിയുടെ ഉടമസ്ഥതയിലുള്ള ധര്‍മൂസ് ഫിഷ് ഹബ്ബില്‍ നിന്ന് പഴകിയ മീന്‍ കണ്ടെടുത്തു. കോട്ടയം കഞ്ഞിക്കുഴിയില്‍ പ്രവര്‍ത്തിക്കുന്ന സ്ഥാപനത്തില്‍ നിന്നാണ് 200 കിലോ പഴകിയ മത്സ്യം പിടിച്ചെടുത്തത്.

ഓപ്പറേഷന്‍ മത്സ്യയുടെ ഭാഗമായാണ് കോട്ടയം കഞ്ഞിക്കുഴിയില്‍ ഭക്ഷ്യ സുരക്ഷാ വകുപ്പിന്റെ റെയ്ഡ് നടന്നത്. തുടര്‍ന്ന് ധര്‍മ്മൂസ് ഫിഷ് ഹബില്‍ നിന്ന് പിടിച്ചെടുത്തത് ദിവസങ്ങള്‍ പഴക്കമുള്ള ചീഞ്ഞ മീനായിരുന്നു. ഇന്നലെ രാവിലെ നടന്ന റെയ്ഡിലാണ് പഴകിയ മത്സ്യം പിടിച്ചെടുത്തത്. എന്നാല്‍ ഈ സ്ഥാപനത്തിന് നേരെ നേരത്തെയും ഇത്തരത്തിലുള്ള പരാതികള്‍ ഉയര്‍ന്നിട്ടുണ്ട്.

ഇവിടെ നിന്നും വാങ്ങുന്ന മത്സ്യം ചീഞ്ഞതാണന്നും ദുര്‍ഗന്ധം വമിക്കുന്നുണ്ടെന്നും ജനങ്ങള്‍ നേരത്തെയും പലതവണ പരാതിപ്പെട്ടിരുന്നു. തുടര്‍ന്നാണ് റെയ്ഡ് നടത്തിയത്. റെയ്ഡിന് ശേഷം പിടിച്ചെടുത്ത പഴകിയ മീന്‍ ഭക്ഷ്യ സുരക്ഷ വകുപ്പ് നശിപ്പിക്കുകയും ശേഷം സ്ഥാപനത്തിന് പിഴയടക്കാന്‍ നോട്ടീസ് നല്‍കുകയും ചെയ്തിട്ടുണ്ട്.

അതേസമയം മറ്റുള്ള ഫിഷ് മാര്‍ക്കറ്റിലും മീന്‍ കച്ചവടക്കാരും വില്‍ക്കുന്നതിന്റെ ഇരട്ടി തുകക്കാണ് ധര്‍മ്മജന്റെ സ്ഥാപനം വില്‍പന നടത്തുന്നത് എന്നുള്ള ആക്ഷേപവും ഉയരുന്നുണ്ട്. മാത്രമല്ല ഇത്രയും വിലക്ക് മീന്‍ വില്‍ക്കുമ്പോള്‍ അതിന്റെ ഗുണനിലവാരമെങ്കിലും നോക്കിക്കൂടെ എന്നാണ് റെയ്ഡിന് ശേഷം പലരും ചോദിക്കുന്നത്.

എന്നാല്‍ റെയ്ഡിന് പിന്നാലെ പ്രതികരണവുമായി താരം രംഗത്ത് വന്നിരുന്നു. തന്റെ സ്ഥാപനം പഴകിയ മത്സ്യം വില്‍ക്കാറില്ല എന്നും സംഭവത്തില്‍ ഫ്രാഞ്ചൈസിയുടെ പേര് വെച്ച് മറ്റ് ചിലരാണ് ഇത്തരത്തില്‍ വില്‍പന നടത്തുന്നത് എന്നുമാണ് നടന്‍ പ്രമുഖ മാധ്യമത്തോട് പറഞ്ഞത്. ധര്‍മ്മൂസ് ഫിഷ് ഹബ്ബ് എത്തിക്കാത്ത മീനും ഫ്രാഞ്ചൈസിയുടെ പേര് വെച്ച് ചിലര്‍ വില്‍ക്കാന്‍ ശ്രമിക്കുന്നുണ്ട്. ഇത്തരത്തില്‍ വില്‍പ്പന നടത്തുന്നവരുടെ ഫ്രാഞ്ചെസി തിരിച്ചെടുക്കുമെന്നും ധര്‍മ്മജന്‍ കൂട്ടിച്ചേര്‍ത്തു.

അദ്ദേഹം പ്രമുഖ മാധ്യമത്തോട് പറഞ്ഞത് ഇങ്ങനെയാണ്.. ''കോട്ടയത്ത് പിടിച്ചെടുത്തത് ധര്‍മ്മൂസ് ഫിഷ് ഹബ്ബിന്റെ മീനല്ല. ഫ്രഷ് ആയ മീനാണ് ഞങ്ങള്‍ ഫ്രാഞ്ചൈസികള്‍ക്ക് എത്തിച്ചുകൊടുക്കാറുള്ളത്. ഫ്രാഞ്ചൈസിയുടെ പേര് വെച്ച് ചിലര്‍ ഞങ്ങള്‍ എത്തിക്കാത്ത മീനും വില്‍ക്കാന്‍ ശ്രമിക്കുന്നുണ്ട്. ലാഭം കൂട്ടാന്‍ വേണ്ടി ചെയ്യുന്നതാണത്. ഞങ്ങള്‍ വിതരണം ചെയ്യാത്ത മീന്‍ ധര്‍മ്മൂസ് ഫിഷ് ഹബ്ബിന്റെ പേരില്‍ വില്‍ക്കുന്നവരുടെ ഫ്രാഞ്ചൈസി തിരിച്ചെടുക്കും''. ഇങ്ങനെയാണ് ധര്‍മ്മജന്‍ ചൂണ്ടിക്കാട്ടിയത്.

നേരത്തെ ധര്‍മ്മൂസ് ഫിഷ് ഹബിന്റെ മറവില്‍ 43 ലക്ഷം രൂപയിലേറെ തട്ടിപ്പ് നടത്തിയെന്നുള്ള കേസും നിലനില്‍ക്കുന്നുണ്ട്. ധര്‍മജന്‍ ഉള്‍പ്പടെ 11 പേര്‍ക്കെതിരെയാണ് പരാതി.

അതേസമയം സംസ്ഥാനത്ത് ഭക്ഷ്യ സുരക്ഷാ വകുപ്പിന്റെ ഓപ്പറേഷന്‍ മത്സ്യയുടെ ഭാഗമായി കര്‍ശന പരിശോധന നടക്കുകയാണ്. ഇതുവരെ 7229 കിലോ പഴകിയതും രാസവസ്തുക്കള്‍ കലര്‍ത്തിയതുമായ മത്സ്യം പിടിച്ചെടുത്ത് നശിപ്പിച്ചിട്ടുണ്ട്. 114 പേര്‍ക്കാണ് ഇത് വഴി നോട്ടീസ് നല്‍കിയത്. ഭക്ഷണ വിതരണ സ്ഥാപനങ്ങളില്‍, ഹോട്ടലുകളില്‍,ബേക്കറികളില്‍ അടക്കവും പരിശോധനകള്‍ നടക്കുന്നുണ്ട്.