തന്നെ ലൈംഗികമായി ഉപദ്രവിച്ചെന്ന് സ്വപ്നാസുരേഷ് വെളിപ്പെടുത്തിയ മുന്‍ മന്ത്രിമാരായ കടകംപള്ളി സുരേന്ദ്രന്‍, ഡോ.തോമസ് ഐസക്, മുന്‍ സ്പീക്കറും ഇപ്പോള്‍ നോര്‍ക്കയുടെ വൈസ് ചെയര്‍മാനുമായ പി.ശ്രീരാമകൃഷ്ണന്‍ എന്നിവര്‍ക്കെതിരേ പൊലീസിന് കേസെടുക്കേണ്ടി വരും. തന്നെ ലൈംഗിക മൃഗമായി കണ്ടെന്നാണ് കടകംപള്ളിയെക്കുറിച്ച് സ്വപ്ന പറഞ്ഞത്. ദുരുദ്ദേശത്തോടെ വീട്ടിലേക്കും ഹോട്ടല്‍ മുറിയിലേക്കും വിളിച്ചെന്നും സ്വപ്ന വെളിപ്പെടുത്തി. മൂന്നാര്‍ സുന്ദരമാണെന്നും അവിടേക്ക് പോവാമെന്നും വ്യംഗമായി അറിയിക്കുകയാണ് തോമസ് ഐസക് ചെയ്തത്. ചാനലിലൂടെ സ്വപ്ന ഇക്കാര്യങ്ങള്‍ വെളിപ്പെടുത്തിയ സ്ഥിതിക്ക് അവര്‍ പരാതി നല്‍കിയില്ലെങ്കിലും സ്വമേധയാ പൊലീസിന് കേസെടുക്കാം.

നിര്‍ഭയ കേസിനുശേഷം 2013ഏപ്രില്‍ 2നുണ്ടായ ക്രിമിനല്‍ നിയമ ഭേദഗതിയാണ് നേതാക്കള്‍ക്ക് വിനയായത്. സ്ത്രീകള്‍ക്ക് നേരെയുള്ള പുരുഷന്റെ നോട്ടം,വാക്ക്, ചേഷ്ട എന്നിവയെല്ലാം ലൈംഗികക്കുറ്റത്തിന്റെ പരിധിയിലാക്കി ശിക്ഷാര്‍ഹമാക്കി. നാല്പതോളം ലൈംഗിക ചേഷ്ടകള്‍ ബലാത്സംഗത്തിന്റെ പരിധിയിലാക്കി. ഇതോടെ സ്വപ്നയ്ക്ക് അശ്ലീല സന്ദേശമയയ്ക്കുകയും ആഗ്യം കാട്ടുകയും ചെയ്തതെല്ലാം പീഡനക്കേസിന് കാരണമാവും.

നിയമഭേദഗതിയില്‍ ഇരയുടെ മൊഴി സാഹചര്യതെളിവുകളുടെ പിന്‍ബലത്തോടെ, പ്രധാനതെളിവായി അംഗീകരിക്കപ്പെട്ടതോടെ വൈദ്യപരിശോധനാ റിപ്പോര്‍ട്ട് ബലാത്സംഗക്കേസുകളില്‍ അനിവാര്യമല്ലാതായി മാറി. കുറ്റം തെളിയിക്കാനുള്ള ബാദ്ധ്യത വാദിക്കില്ല. ലൈംഗികാരോപണങ്ങളില്‍ പ്രതിയാക്കപ്പെടുന്നവര്‍ സ്വന്തം നിലയില്‍ താന്‍ കുറ്റവാളിയല്ലെന്ന് തെളിയിക്കേണ്ട സ്ഥിതിയായി. സോളാര്‍ കേസില്‍ യു.ഡി.എഫ് നേതാക്കള്‍ക്ക് കുരുക്കായത് ഈ വ്യവസ്ഥയാണ്.

ഡോളര്‍ കടത്ത് കേസിന്റെ വിചാരണ കേരളത്തില്‍ നടത്തിയാല്‍ സത്യം തെളിയില്ലെന്നും ഇ.ഡി അന്വേഷണ ഉദ്യോഗസ്ഥനെ സര്‍ക്കാര്‍ സ്വാധീനിച്ചെന്നുമുള്ള സ്വപ്നയുടെ വെളിപ്പെടുത്തലും നിര്‍ണായകമാണ്. കേസ് ബാംഗ്ലൂരിലേക്ക് മാറ്റാന്‍ സ്വപ്നയും സരിത്തും ഹര്‍ജി നല്‍കിയിരിക്കുകയാണ്. ഇ.ഡിയും ഇതിനെ അനുകൂലിക്കുന്നു. കേസ് ബാംഗ്ലൂരിലേക്ക് മാറ്റരുതെന്നാണ് സര്‍ക്കാരിന്റെ നിലപാട്.

കടകംപള്ളി സുരേന്ദ്രന്‍ കൊച്ചിയില്‍ വച്ച് ഹോട്ടല്‍ മുറിയിലേക്ക് ക്ഷണിച്ചുവെന്നാണ് സ്വപ്ന ഉയര്‍ത്തുന്ന ആരോപണം. അതേസമയം പി.ശ്രീരാമകൃഷ്ണന്‍ ഔദ്യോഗിക വസതിയിലേക്ക് ഒറ്റക്ക് വരാന്‍ ആവശ്യപ്പെട്ടു. തോമസ് ഐസക് മൂന്നാറിലേക്ക് കൊണ്ടുപോകാമെന്ന് പറഞ്ഞുവെന്നും സ്വപ്ന പറഞ്ഞു.

ഗുരുതര ആരോപണമാണ് മുന്‍ ദേവസ്വം മന്ത്രി കടകംപള്ളി സുരേന്ദ്രനെതിരെ സ്വപ്നാ സുരേഷ് നടത്തിയത്. ഒരു എംഎല്‍എയോ മന്ത്രിയോ ആയിരിക്കാന്‍ യോഗ്യതയില്ലാത്ത വ്യക്തിയാണ് കടകംപള്ളി സുരേന്ദ്രനെന്ന് സ്വപ്ന ആരോപിക്കുന്നു. ഒരു കാരണവശാലും വീട്ടില്‍ കയറ്റാന്‍ കൊള്ളാത്തവനാണ് കടകംപള്ളി. കേറിപ്പിടിച്ചു, പീഡനം എന്നൊന്നും പറയാനില്ല. അതൊന്നും സംഭവിച്ചതായും പറയുന്നില്ല. ഫോണില്‍ കൂടി മോശമായി സംസാരിക്കുകയും ലൈംഗിക ചുവയോടെ പെരുമാറുകയും ചെയ്തിട്ടുണ്ട്. വീട്ടിലേക്ക് വരാമെന്നും ഹോട്ടലില്‍ റൂമെടുക്കാമെന്നും പറഞ്ഞു. സെക്ഷ്വല്‍ മെസേജുകള്‍ അയച്ചു. റൂമിലേക്ക് ചെല്ലാനായി നിര്‍ബന്ധിച്ചുവെന്നും സ്വപ്ന പറഞ്ഞു.

സാധാരണ പല സ്ത്രീകളും ചെയ്യുന്നത് പോലെ എനിക്കും ആ മെസേജുകള്‍ ദുരുപയോഗം ചെയ്യാനും ബ്ലാക് മെയില്‍ ചെയ്യാനും കഴിയുമായിരുന്നു. എന്നാലത് ചെയ്തിട്ടില്ല. ഇക്കാര്യങ്ങള്‍ ശിവശങ്കറിന് അറിയാമായിരുന്നു. മന്ത്രിയല്ലേ ആരോടും പറയണ്ടെന്നാണ് ശിവശങ്കര്‍ പറഞ്ഞത്. ഇതിനെല്ലാം തെളിവുണ്ട്. അത് ഇഡിക്ക് കൈമാറിയിട്ടുമുണ്ട്. പറയുന്നത് ശരിയല്ലെങ്കില്‍ കടകംപള്ളി തനിക്കെതിരെ കേസ് കൊടുക്കട്ടെയെന്നും അതല്ലെങ്കില്‍ മാധ്യമങ്ങള്‍ക്ക് മുന്നില്‍ വരട്ടെയെന്നും സ്വപ്ന പറഞ്ഞു. ശിവശങ്കറുമായി ഉണ്ടായിരുന്നത് ആത്മബന്ധമായിരുന്നു എന്നും അവര്‍ പറഞ്ഞു. അതേസമയം മറ്റ് നേതാക്കള്‍ സെക്‌സിനായി വ്യഗ്രതപൂണ്ടിരിക്കയാണെന്നും സ്വപ്ന പറയുന്നു.

കൊച്ചി ബോള്‍ഗാട്ടിയിലെ ഹയാത്ത് ഹോട്ടല്‍ ഉദ്ഘാടനത്തിന് കടകംപള്ളി വന്നിരുന്നു. അവിടെ ഞാനുമുണ്ടായിരുന്നു. ഹോട്ടലില്‍ റൂമെടുക്കാമെന്ന് വരെ പറഞ്ഞിരുന്നു. കടംകംപള്ളിക്കെതിരെ പ്രതികരിച്ചിട്ടുണ്ട്. മര്യാദയോടെ പെരുമാറണമെന്നും പറഞ്ഞിട്ടുണ്ട്. അതിന് ശേഷം എന്നോട് കടകംപള്ളിക്ക് ദേഷ്യമായിരുന്നുവെന്നും അവര്‍ ആരോപിച്ചു.

അതേസമയം മുന്‍ സ്പീക്കര്‍ പി ശ്രീരാമകൃഷ്ണന്‍ കോളേജ് വിദ്യാര്‍ത്ഥിയെ പോലെയാണ് പെരുമാറിയിട്ടുള്ളതെന്നാണ് സ്വപ്നയുടെ ആരോപണം. ഔദ്യോഗിക വസതിയിലെ മദ്യപാന സദസിനിടെ മോശമായി പെരുമാറി. ഒറ്റയ്ക്ക് ഔദ്യോഗിക വസതിയിലെത്താന്‍ ആവശ്യപ്പെട്ടിട്ടുണ്ട്. 'കോളേജ് കുട്ടികളെപ്പോലെ ഐ ലവ് യൂ എന്നെല്ലാമുള്ള അനാവശ്യ മെസേജുകളയക്കുന്ന ബാലിശ സ്വഭാവക്കാരനാണ് മുന്‍ സ്പീക്കര്‍. ഇത്തരം 'ഫ്രസ്‌ട്രേഷനുകളുള്ളയാളാണ് ശ്രിരാമകൃഷണനുമെന്നും സ്വപ്ന സുരേഷ് പറഞ്ഞു.

മുന്‍ ധനമന്ത്രി തോമസ് ഐസക്ക് നേരിട്ട് സെക്‌സ് ആവശ്യപ്പെട്ടിട്ടില്ലെന്നാണ് സ്വപ്ന പറയുന്നത്. തോമസ് ഐസകും മോശമായി സംസാരിച്ചു. മറ്റുള്ളവരെ പോലെ ഡയറക്ടായി പറഞ്ഞിരുന്നില്ല. മൂന്നാറിലേക്ക് ക്ഷണിച്ചു. മൂന്നാര്‍ സുന്ദരമായ സ്ഥലമാണെന്ന് പറഞ്ഞു. സൂചനകള്‍ തന്നാണ് തോമസ് ഐസക്ക് പെരുമാറിയതെന്നും സ്വപ്ന വെളിപ്പെടുത്തി.