വാളകത്ത്‌ അധ്യാപകനെ മര്‍ദ്ദിച്ചതിനു പിന്നില്‍ പിള്ളയോ ഗണേഷോ അല്ല, സിബിഐ അന്വേഷണം ജ്യോത്സ്യനിലേക്ക്‌... വഴിവിട്ട ബന്ധവും പുറത്താവുന്നു
വാളകം സംഭവത്തില്‍ അധ്യാപകര്‍ കൃഷ്‌ണകുമാറിനെ മര്‍ദ്ദിച്ച്‌ വഴിയില്‍ തള്ളിയത്‌ ബാലകൃഷ്‌ണപിള്ളയോ ഗണേഷ്‌കുമാറോ അല്ലെന്ന്‌ സി.ബി.ഐ നിഗമനം.
സംഭവദിവസം കൃഷ്‌ണകുമാര്‍ സന്ദര്‍ശിച്ച ജ്യോത്സ്യന്‍ ശ്രീ കുമാറാണ്‌ സംഭവത്തിന്‌ പിന്നിലെന്നും സി.ബി.ഐ സംശയിക്കുന്നു. ഇതിന്റെ ഭാഗമായാണ്‌ കൃഷ്‌ണകുമാര്‍, ഭാര്യ ഗീത, ശ്രീ കുമാര്‍, അദ്ദേഹത്തിന്റെ കുടുംബാംഗങ്ങള്‍ എന്നിവരെ ഒരുമിച്ചിരുത്തി സി.ബി.ഐ ചോദ്യം ചെയ്‌തത്‌.
സംഭവദിവസം രാത്രി ശ്രീകുമാറിന്റെ വീട്ടില്‍ നിന്നും മടങ്ങുമ്പോഴാണ്‌ കൃഷ്‌ണകുമാറിനെ അജ്ഞാതസംഘം മര്‍ദ്ദിച്ചത്‌. കൃഷ്‌ണകുമാര്‍ ശ്രീ കുമാറിന്റെ വസതിയില്‍ നിത്യസന്ദര്‍ശകനായിരുന്നു. ശ്രീകുമാറിന്റെ ഒരു കുടുംബാംഗവുമായി കൃഷ്‌ണകുമാറിന്‌ ബന്ധമുണ്ടെന്നാണ്‌ സി.ബി.ഐക്ക്‌ ലഭിച്ച വിവരം. ഈ ബന്ധത്തിന്റെ വാശി തീര്‍ക്കാനാണ്‌ മറ്റൊരു കുടുംബാംഗം ക്വട്ടേഷന്‍ സംഘത്തെ ഏര്‍പ്പാട്‌ ചെയ്‌തതും കൃഷ്‌ണ കുമാറിന്‌ അടികൊടുത്തതും.
കഴിഞ്ഞദിവസം നടന്ന ചോദ്യം ചെയ്യലില്‍ ജ്യോത്സ്യന്‍ ശ്രീകുമാര്‍ പരസ്‌പര വിരുദ്ധമായി മൊഴി നല്‍കിയിരുന്നു. സ്‌ക്കൂള്‍ മാനേജ്‌മെന്റിനെതിരെ ദുര്‍മന്ത്രവാദം നടത്താനാണ്‌ കൃഷ്‌ണകുമാര്‍ എത്തിയതെന്നായിരുന്നു ശ്രീകുമാറിന്റെ ആദ്യ മൊഴി. എന്നാല്‍ ഭാര്യ ഗീതയുടെ അസുഖം സംബന്ധിച്ച പൂജകള്‍ക്കാണ്‌ കൃഷ്‌ണകുമാര്‍ എത്തിയതെന്ന്‌ ശ്രീകുമാര്‍ കഴിഞ്ഞ ദിവസം മൊഴി നല്‍കിയിരുന്നു. കൃഷ്‌ണകുമാറിന്റെയും ശ്രീകുമാറിന്റെയും കുടുംബത്തെ ഒരുമിച്ചിരുത്തിയാണ്‌ സി.ബി.ഐ ചോദ്യം ചെയ്‌തത്‌. ഉച്ചയ്‌ക്ക്‌ ഒരു മണിയോടെയാണ്‌ കൃഷ്‌ണകുമാറിനെയും ഭാര്യയെയും കടയ്‌ക്കലെത്തിച്ചത്‌. ഇരു കുടുംബങ്ങളെ ഒരുമിച്ചും പ്രത്യേകമായും ചോദ്യം ചെയ്‌തിരുന്നു. രാവിലെ എട്ടു മണിക്ക്‌ തുടങ്ങിയ ചോദ്യം ചെയ്യല്‍ വൈകിട്ട്‌ വരെ നീണ്ടു.
കൃഷ്‌ണകുമാറിനെ മര്‍ദ്ദിച്ചത്‌ ആര്‍. ബാലകൃഷ്‌ണപിള്ള ഏര്‍പ്പാട്‌ ചെയ്‌ത ക്വട്ടേഷന്‍ സംഘമാണെന്ന്‌ നേരത്തെ ആരോപണം ഉയര്‍ന്നിരുന്നു. സംഭവസമയത്ത്‌ തടവിലായിരുന്ന പിള്ള തിരുവനന്തപുരം കിംസ്‌ ആശുപത്രിയില്‍ ചികിത്സയിലായിരുന്നു. സംഭവസമയത്തിനുശേഷം പിള്ളയുടെ ഫോണില്‍ നിന്നും ചില കോളുകള്‍ കൊട്ടാരക്കരയിലെത്തിയതാണ്‌ സംശയങ്ങള്‍ക്ക്‌ വഴിവച്ചത്‌.
എന്നാല്‍ കൃഷ്‌ണകുമാര്‍ സംഭവത്തിന്‌ പിന്നില്‍ അധ്യാപകന്റെ അപഥസഞ്ചാരമാണ്‌ കാരണമെന്നും പ്രചാരണങ്ങളുണ്ടായിരുന്നു. പക്ഷേ സംഭവത്തിനു പിന്നില്‍ പിള്ളയാണെന്ന്‌ വരുത്തി തീര്‍ക്കുന്നതില്‍ കൃഷ്‌ണകുമാറും ഭാര്യ ഗീതയും വിജയിച്ചു. ബാലകൃഷ്‌ണപിള്ളയുടെ കഷ്‌ടകാലം അവര്‍ക്ക്‌ അനുകൂലമായി മാറുകയായിരുന്നു.
https://www.facebook.com/Malayalivartha
