സ്ഥാനത്തിന് പുതിയ കളി... ലോക്സഭാ തെരഞ്ഞെടുപ്പ് അടുത്തതോടെ പഴയപോലെ സ്ഥാനമാനങ്ങള് നേടിയെടുക്കാനായി തുഷാര് വെള്ളാപ്പള്ളി കളി തുടങ്ങി; സുരേഷ് ഗോപിയെപ്പിടിച്ച് രംഗം കൊഴുപ്പിക്കുന്നു; തെലുങ്കാന പോലീസ് പുറകേയുള്ളതിനാല് തുഷാര് വെള്ളാപ്പള്ളി പേടിക്കണം
മുന് തെരഞ്ഞെടുപ്പ് സമയത്ത് എന്നപോലെ തുഷാര് വെള്ളാപ്പള്ളി കളി തുടങ്ങിയിരിക്കുകയാണ്. സ്ഥാനങ്ങള് എണ്ണിയെണ്ണി ചോദിക്കും. മുന്നണി മാറ്റം പോലും തുഷാര് എടുത്തിട്ടിട്ടുണ്ട്. അതേസമയം തുഷാറിനെ ആദ്യം അനുനയിപ്പിക്കാനാണ് നോക്കുന്നത്. രക്ഷയില്ലെങ്കില് പഴയ തെലുങ്കാന ഉള്പ്പെടെയുള്ള കേസുകള് ഉണ്ടല്ലോ.
അതേസമയം ആദ്യഘട്ടമെന്ന നിലയില് ബിജെപിയോട് ഇടയുന്ന ബിഡിജെഎസിനെ അനുനയിപ്പിക്കാന് ബിജെപി ദേശീയ നേതൃത്വം ഇടപെടുകയാണ്. ബിഡിജെഎസ് നേതാക്കളെ ചര്ച്ചയ്ക്കായി 21നു ഡല്ഹിയിലേക്കു ബിജെപി നേതാക്കള് ക്ഷണിച്ചതായാണ് വിവരം.
മുന്നണി വിടുന്ന കാര്യം ആലോചിക്കുമെന്നു വരെ സൂചിപ്പിച്ച ബിഡിജെഎസ് നേതാക്കളുടെ പരിഭവം തീര്ക്കാനുള്ള ചര്ച്ചയില് ബിജെപി ദേശീയ പ്രസിഡന്റ് ജെ.പി.നഡ്ഡയും കേന്ദ്ര ആഭ്യന്തരമന്ത്രി അമിത് ഷായും പങ്കെടുത്തേക്കും. കൊച്ചിയില് നടന്ന ബിഡിജെഎസ് സംസ്ഥാന പഠന ശിബിരത്തില് പങ്കെടുക്കാമെന്ന് അറിയിച്ചിരുന്ന ബിജെപി നേതാക്കള് എത്താഞ്ഞതിനെ ബിഡിജെഎസ് നേതാക്കള് വിമര്ശിച്ചിരുന്നു.
അതിനു മുന്പ് കേന്ദ്ര ആഭ്യന്തരമന്ത്രി അമിത് ഷാ പങ്കെടുത്ത സമ്മേളനത്തില് സുരേഷ് ഗോപി സ്വയം സ്ഥാനാര്ഥിത്വവും സീറ്റും പ്രഖ്യാപിക്കുന്ന വിധം പ്രസംഗിച്ചതിലും ബിഡിജെഎസിനു പ്രതിഷേധമുണ്ട്. ആറു മാസത്തിനകം സംസ്ഥാന കണ്വന്ഷന് നടത്തി കരുത്തുകാട്ടുമെന്ന് ശിബിരം ഉദ്ഘാടനം ചെയ്തു സംസ്ഥാന പ്രസിഡന്റ് തുഷാര് വെള്ളാപ്പള്ളി പറഞ്ഞത് ബിജെപിക്കു കൂടിയുള്ള മുന്നറിയിപ്പാണ്.
ബൂത്ത് തലം മുതല് സമ്മേളനങ്ങള് നടത്തിയ ശേഷമുള്ള കണ്വന്ഷനില് പാര്ട്ടി പുതിയ രാഷ്ട്രീയ നിലപാട് പ്രഖ്യാപിച്ചേക്കുമെന്നും അറിയുന്നു. 27ന് എന്ഡിഎ നടത്താനിരിക്കുന്ന സെക്രട്ടേറിയറ്റ് മാര്ച്ചില് പാര്ട്ടി പങ്കെടുക്കണോ എന്നതു പുനരാലോചിക്കണമെന്നു പോലും പഠന ശിബിരത്തില് ചില നേതാക്കള് അഭിപ്രായപ്പെട്ടിരുന്നു. ഒരു ഓട്ടോറിക്ഷയില് കയറാന് മാത്രം ആളുള്ള പാര്ട്ടികള് അധികാരത്തിലിരിക്കുമ്പോള് വലിയ ജനകീയ അടിത്തറയുള്ള ബിഡിജെഎസ് സാമൂഹികനീതിക്കായി പോരാടുകയാണ് എന്ന തുഷാറിന്റെ വാക്കുകളെ ഒരേ സമയം ബിജെപിക്കുള്ള വിമര്ശനവും എല്ഡിഎഫിനോടുള്ള അനുഭാവവുമായി വ്യാഖ്യാനിക്കുന്നവര് പാര്ട്ടിയിലുണ്ട്.
പഠന ശിബിരം ഉദ്ഘാടനം ചെയ്യാമെന്നേറ്റ ബിജെപി ദേശീയ ജനറല് സെക്രട്ടറി ബി.എല്.സന്തോഷ് ഉള്പ്പെടെ ബിജെപിയില് നിന്ന് ആരും പരിപാടിയില് പങ്കെടുക്കാഞ്ഞതില് ബിഡിജെഎസിനുള്ള അമര്ഷം പല നേതാക്കളും വെളിപ്പെടുത്തുന്നുണ്ട്. വിട്ടുനിന്നതിന്റെ കാരണം ബിജെപി നേതാക്കള് പറഞ്ഞിട്ടില്ല.
എന്നാല്, ബിഡിജെഎസ് സംസ്ഥാന ട്രഷറര് അനിരുദ്ധ് കാര്ത്തികേയന്റെ ഫെയ്സ്ബുക് പോസ്റ്റ് ഉള്പ്പെടെ വിട്ടുനില്ക്കലിനു കാരണമാണെന്ന് അറിയുന്നു. തൃശൂരില് സുരേഷ് ഗോപി സ്വയം സ്ഥാനാര്ഥിത്വം പ്രഖ്യാപിച്ചതിനെ പരിഹസിച്ചും വിമര്ശിച്ചുമായിരുന്നു അനിരുദ്ധിന്റെ കുറിപ്പ്.
തങ്ങള് വഴങ്ങിയാല് താലത്തില് കൊണ്ടുപോകാന് എല്.ഡി.എഫും യു.ഡി.എഫും വരുമെന്ന് തുഷാര് വെള്ളാപ്പള്ളി പറഞ്ഞിരുന്നു. ഹിന്ദുത്വംകൊണ്ട് മാത്രം കേരളം ഭരിക്കാനാവില്ലെന്നും ന്യൂനപക്ഷ പിന്തുണ ആവശ്യമാണെന്നും കേരളത്തിലെ എന്.ഡി.എ. കണ്വീനറും ബി.ഡി.ജെ.എസ്. അധ്യക്ഷനുമായ തുഷാര് വെള്ളാപ്പള്ളി പറഞ്ഞു.
ആറ് മാസത്തിനുള്ളില് സംസ്ഥാന സമ്മേളനം നടത്തി പാര്ട്ടി കരുത്തുകാണിക്കും. വരുന്ന പാര്ലമെന്റ് തിരഞ്ഞെടുപ്പില് പാര്ട്ടി നിര്ണായക ശക്തിയാകുമെന്നും അദ്ദേഹം പറഞ്ഞു.
അതേസമയം ബിജെപി മുന്നണി വിട്ടാല് തുഷാറിനെ കേസുകള് അലട്ടും. തെലങ്കാന ഭരണകക്ഷിയായ ടി.ആര്.എസിന്റെ എംഎല്എമാരെ കൂറുമാറ്റാന് ശ്രമിച്ചെന്ന കേസില് തുഷാര് വെള്ളാപ്പള്ളിക്കെതിരെ ലുക്കൗട്ട് നോട്ടീസ് ഇപ്പോഴുമുണ്ട്. അതിനാല് തന്നെ തീരുമാനം ശ്രദ്ധിച്ചേയെടുക്കൂ.
"
https://www.facebook.com/Malayalivartha