വിദേശികളായ ആ ചീറ്റകള്‍ ഇന്ത്യന്‍ കാടുകളില്‍ വാഴില്ലെന്ന് ഉറപ്പായിരിക്കുന്നു. നമീബിയയില്‍ നിന്നും ദക്ഷിണാഫ്രിക്കയില്‍ നിന്നും വാങ്ങി മധ്യപ്രദേശിലെ കുനോ ദേശീയ ഉദ്യാനത്തില്‍ തുറന്നുവിട്ട ചീറ്റകളില്‍ ഏഴെണ്ണം ഇതോടകം ചത്തു. ശേഷിക്കുന്നവയും ചാകാനുള്ള സാധ്യതയേറെയതോടെ ആകെ കേന്ദ്ര പരിസ്ഥിതി വനം വകുപ്പ് ആകെ അങ്കലാപ്പിലായിരിക്കുന്നു. അരിക്കൊമ്പനുമേല്‍ പിടിപ്പിച്ച മാതിരിയുള്ള റേഡിയോ കോളര്‍ കഴുത്തില്‍ അണിയിച്ചാണ് ചീറ്റകളെ കുനോ ദേശീയോദ്യാനത്തില്‍ തുറന്നു വിട്ടത്.

റേഡിയോ കോളറില്‍ നിന്നുള്ള അണുബാധയാകാം ചീറ്റകളുടെ അന്തകനായതെന്നാണ് കേന്ദ്ര വനം വകുപ്പിന്റെ നിഗമനം. ഇനിയുള്ള ഓരോ ദിവസവും ചീറ്റകളുടെ ആരോഗ്യനില നിരീക്ഷിത്താനാണ് കേന്ദ്ര സര്‍ക്കാരിന്റെ തീരുമാനം. ആഫ്രിക്കന്‍ ചീറ്റകള്‍ ഇന്ത്യന്‍ കാടുകളിലെ കാലാവസ്ഥയോട് ഇണങ്ങിപ്പോകില്ലെന്നതാണ് അടിസ്ഥാന പ്രശ്മമായിരിക്കുന്നത്.

മധ്യപ്രദേശില്‍ മാറിമാറിവരുന്ന പെരുമഴയും കൊടുംചൂടും കൊടുംതണുപ്പും സഹിക്കാന്‍ ആഫ്രിക്കന്‍ ചീറ്റകള്‍ക്ക് സാധിക്കാതെ വന്നതാണ് കൂട്ടച്ചാകലിന് കാരണമായതെന്ന് ഒരു വിഭാഗം പറയുന്നു. അതല്ല പോഷകാഹാരത്തിന്റെ കുറവും ഇര പിടിക്കാനുള്ള പ്രാപ്തിക്കുറവുമാകാം കാരണെന്ന് മറ്റു ചിലര്‍ വിലയിരുത്തുന്നു. വിദേശത്തുനിന്ന് വിമാനത്തിലെത്തിച്ച ചീറ്റകള്‍കളുടെ രോഗാവസ്ഥ മാത്രമല്ല തുറന്നുവിട്ട ചീറ്റകള്‍ പരസ്പരം പോരടിക്കുന്നതും പരിക്കേല്‍ക്കുന്നതും എന്തുകൊണ്ടാണെന്ന് വനംവകുപ്പിന് മനസിലാകുന്നില്ല.

ഇണകളെ വനത്തില്‍ തുറന്നുവിട്ടിട്ടും ഇവയൊന്നും ഇണചേരുകയോ നിശ്ചിതവേളകളില്‍ പ്രസവിക്കുകയോ ചെയ്യുന്നില്ലെന്നതിനാല്‍ ചീറ്റാ പരിക്ഷണം നിറുത്തിവയ്ക്കാനാണ് സാധ്യത. പ്രധാനമന്ത്രി നരേന്ദ്രമോദി വനപാലക വേഷം അണിഞ്ഞ് ആഘോഷത്തോടെ തുറന്നുവിട്ട ചീറ്റകളാണ് ഇതോടകം ചത്തുപോയത്. കരയിലെ ഏറ്റവും വേഗം കൂടിയ കാട്ടുമൃഗമായ ചീറ്റകളുടെ വംശം ഇന്ത്യയില്‍ അന്യംനിന്ന സാഹചര്യത്തിലാണ് ആഫ്രിക്കയില്‍ നിന്ന് നയതന്ത്രബന്ധത്തിന്റെ തണലില്‍ ചീറ്റകളെ എത്തിക്കാന്‍ കരാറായത്.

ചീറ്റകള്‍ അകാലത്തില്‍ ചത്തുകൊണ്ടിരിക്കെയും ചീറ്റപ്പുലികളെ മാറ്റി സ്ഥാപിക്കില്ലെന്നാണ് കേന്ദ്ര വനം മന്ത്രി ഭൂപേന്ദര്‍ യാദവ് പ്രഖ്യാപിച്ചിരിക്കുന്നത്. ചീറ്റപ്പുലി പദ്ധതിയില്‍ ചില വിദഗ്ധര്‍ ആശങ്ക പ്രകടിപ്പിച്ച സാഹചര്യത്തിലാണ് കേന്ദ്ര മന്ത്രി ഭൂപേന്ദര്‍ യാദവിന്റെ അഭിപ്രായപ്രകടനമുണ്ടായിരിക്കുന്നത്ച. ചീറ്റയുടെ കഴുത്തില്‍ ഘടിപ്പിച്ച റേഡിയോ കോളറില്‍ നിന്നുള്ള സെപ്റ്റിസീമിയയാണ് ചീറ്റകളുടെ മരണത്തിന് കാരണമെന്ന് എന്‍ടിസിഎ രൂപീകരിച്ച ചീറ്റ മോണിറ്ററിംഗ് കമ്മിറ്റി മേധാവി രാജേഷ് ഗോപാല്‍ വ്യക്തമാക്കുന്നു.

അങ്ങനെയെങ്കില്‍ റേഡിയോ കോളര്‍ എങ്ങനെ അണുവിമുക്തമാക്കുന്ന കാര്യത്തില്‍ വിദഗ്ധര്‍ക്ക് വ്യക്തമായ ധാരണകളില്ല. ചീറ്റകളെ മയക്കുവെടി വച്ചാല്‍ അവ വേഗം ചത്തൊടുമെന്ന സാഹചര്യത്തില്‍ റേഡിയോ കോളര്‍ തിരികെയെടുത്ത് അണുവിമുക്തമാക്കുക പ്രായോഗികമല്ല. കുനോ ദേശീയോദ്യാനത്തിനു സമീപം താമസിക്കുന്ന ആദിവാസികള്‍ ചീറ്റകളുടെ വരവോടെ നിലവില്‍ ആശങ്കയിലാണ്.

ജനവാസ കേന്ദ്രത്തിലേക്ക് ചീറ്റകള്‍ കടന്നുവന്ന ഗോത്രവാസികളെ ആക്രമിക്കുമോ എന്നതിലാണ് ആശങ്ക. ആ സാഹചര്യത്തില്‍ റേഡിയോ കോളര്‍ നീക്കം ചെയ്യുകയെന്നത് ഒരിക്കലും സുരക്ഷിതവും പ്രായോഗികവുമല്ല. ചീറ്റകള്‍ വനാതിര്‍ത്തിയെ സമീപിക്കുമ്പോള്‍ റേഡിയോ കോളറില്‍ നിന്നുള്ള സന്ദേശം കൃത്യമായി വനപാലകര്‍ നിരീക്ഷിക്കുകയും ദേശവാസികള്‍ക്ക് മുന്നറിയിപ്പ് നല്‍കുകയും ചെയ്യുന്നുണ്ട്.

ചീറ്റകള്‍ ഒന്നോന്നായി ചത്തുകൊണ്ടിരിക്കെ മധ്യപ്രദേശിലെ കുനോ ദേശീയ ഉദ്യാനത്തിലെ ചീറ്റപ്പുലികള്‍ തുടരുമെന്നും പദ്ധതി വിജയിക്കുമെന്നുമാണ് മന്ത്രി ഭൂപേന്ദര്‍ യാദവ് പറയുന്നത്. റേഡിയോ കോളര്‍ മൂലമുണ്ടാകുന്ന അണുബാധ മൂലമുണ്ടാകുന്ന ചില സമീപകാല മരണങ്ങള്‍ വളരെ അസാധാരണമാണെങ്കിലും രണ്ട് പതിറ്റാണ്ടിലേറെയായി ഇന്ത്യയില്‍ വന്യജീവി സംരക്ഷണത്തില്‍ കോളര്‍ ഉപയോഗിച്ചുവരുന്നു. ഈ നിലയില്‍ റേഡിയോ കോളറും അണുബാധയുമാണ് ചീറ്റകളുടെ അന്തകനെന്ന് നിരീക്ഷണം പൂര്‍ണമായി ശരിയാകാനിടയില്ല.

വ്യതിയാനങ്ങളും ഈര്‍പ്പമുള്ള കാലാവസ്ഥയും റേഡിയോ കോളര്‍ ഉപയോഗത്തില്‍ നിന്ന് അണുബാധയ്ക്ക് കാരണമാകുമെന്നാണ് സര്‍ക്കാരിന്റെ വിശദീകരണം. ഈ ആഴ്ചയില്‍ മാത്രം മധ്യപ്രദേശില്‍ രണ്ട് ആണ്‍ ചീറ്റകള്‍ ചത്തതിന് പിന്നിലെ കാരണം പോസ്റ്റ്‌മോര്‍ട്ടം റിപ്പോര്‍ട്ട് വന്നതിനുശേഷമേ വ്യക്തമാവുകയുള്ളു.

നനവുള്ള സാഹചര്യങ്ങള്‍ റേഡിയോ കോളറുകളില്‍ അണുബാധയുണ്ടാക്കുന്നുവെന്നും ഒരുപക്ഷെ അതാവാം ചീറ്റകളുടെ മരണത്തിന് കാരണമായതെന്നും ദക്ഷിണാഫ്രിക്കന്‍ ചീറ്റ മെറ്റാപോപ്പുലേഷന്‍ വിദഗ്ധര്‍ പറയുന്നു. ചീറ്റകള്‍ക്ക് ദഹനക്കേടും ഉദരസംബന്ധമായ രോഗങ്ങളും ബാധിച്ചിട്ടുണ്ടാകുമെന്നും ചിലര്‍ വിലയിരുത്തുന്നു. അഞ്ച് ആണ്‍ചീറ്റകളെയും മൂന്ന് പെണ്‍ചീറ്റകളെയുമാണ് രണ്ടു ഘട്ടമായി കുനോ കാടുകളില്‍ തുറന്നുവിട്ടത്. പന്ത്രണ്ടു വയസുവരെ ശരാശരി ആയുസുള്ള ജീവികളാണ് ചീറ്റകള്‍.