ഇതാണ് ഒന്നൊന്നര കളി... സണ്റൈസേഴ്സ് ഹൈദരാബാദ് ഉയര്ത്തിയ 278 റണ്സിന്റെ റെക്കോര്ഡ് വിജയലക്ഷ്യം നേടാനാകാതെ കീഴടങ്ങി മുംബൈ ഇന്ത്യന്സ്; സണ്റൈസേഴ്സിന് 31 റണ്സിന്റെ ജയം; ജയിക്കുമായിരുന്ന മത്സരം കളഞ്ഞ് കുളിച്ചത് ഹാര്ദിക് പാണ്ഡെ ബാറ്റ് വീശിയ ഓവറുകളില്
സണ്റൈസേഴ്സ് ഹൈദരാബാദ് ഉയര്ത്തിയ 278 റണ്സിന്റെ റെക്കോര്ഡ് വിജയലക്ഷ്യം മുംബൈ ഇന്ഡ്യ നിസാരമായി പിന്തുടരുമെന്നാണ് കണ്ടത്. എന്നാല് അവസാനം ബോളുകളില്ലാതെ തോറ്റുപോയി. ജയിക്കുമായിരുന്ന മത്സരം കളഞ്ഞ് കുളിച്ചത് ഹാര്ദിക് പാണ്ഡെ ബാറ്റ് വീശിയ ഓവറുകളിലാണ്. അടിയ്ക്കാമായിരുന്ന പന്തുകള് അലക്ഷ്യമായി കളിച്ച് ഓവറുകള് കളഞ്ഞു.
സണ്റൈസേഴ്സിനെ അതേ നാണയത്തില് തിരിച്ചടിക്കാന് ഇറങ്ങിയ മുംബൈയുടെ ഇന്നിങ്സ് 5 വിക്കറ്റ് നഷ്ടത്തില് 246 റണ്സില് അവസാനിച്ചു. 31 റണ്സിനാണ് ഹൈദരാബാദിന്റെ സീസണിലെ ആദ്യ ജയം. 34 പന്തില് 64 റണ്സ് നേടിയ തിലക് വര്മയാണ് മുംബൈയുടെ ടോപ് സ്കോറര്. ജയത്തോടെ സണ്റൈസേഴ്സ് പോയിന്റ് പട്ടികയില് മൂന്നാമതെത്തി. സ്കോര്: സണ്റൈസേഴ്സ് ഹൈദരാബാദ് 20 ഓവറില് 3ന് 277, മുംബൈ ഇന്ത്യന്സ് 20 ഓവറില് 5ന് 246.
മറുപടി ബാറ്റിങ്ങില് ഇഷാന് കിഷനും രോഹിത് ശര്മയും ചേര്ന്ന് മിന്നുന്ന തുടക്കമാണ് മുംബൈയ്ക്ക് നല്കിയത്. 3.2 ഓവറില് 56 റണ്സ് നേടിയാണ് ആദ്യ വിക്കറ്റ് പിരിഞ്ഞത്. 13 പന്തില് 34 റണ്സ് നേടിയ ഇഷാന് എയ്ഡന് മാര്ക്രത്തിന് ക്യാച്ച് നല്കി മടങ്ങി. 12 പന്തില് 26 റണ്സ് നേടിയ രോഹിത് ശര്മയെ പാറ്റ് കമിന്സ് കൂടാരം കയറ്റി. മൂന്നാമനായി ക്രീസിലെത്തിയ നമന് ധിര് തകര്ത്തടിച്ചെങ്കിലും വ്യക്തിഗത സ്കോര് 30ല് നില്ക്കേ കമിന്സു ക്യാച്ച് നല്കി മടങ്ങി. 11ാമത്തെ ഓവറില് ടീം സ്കോര് 150 കടത്തിയാണ് താരം മടങ്ങിയത്.
34 പന്തില് 64 റണ്സ് നേടിയ തിലക് വര്മ വമ്പനടികളുമായി കളം നിറഞ്ഞു. 6 സിക്സും 2 ഫോറും ഉള്പ്പെടുന്നതാണ് ഇന്നിങ്സ്. ക്യാപ്റ്റന് ഹാര്ദിക് പാണ്ഡ്യ 20 പന്തില് 24 റണ്സുമായി മടങ്ങി. അവസാന ഓവറുകളില് ടിം ഡേവിഡും (22 പന്തില് 42) റൊമാരിയോ ഷെപേര്ഡും (6 പന്തില് 15) വമ്പനടികള് പുറത്തെടുത്തെങ്കിലും 246ല് ലക്ഷ്യത്തിനു 32 റണ്സ് അകലെ ഇന്നിങ്സ് അവസാനിച്ചു. സണ്റൈസേഴ്സിനു വേണ്ടി പാറ്റ് കമിന്സും ജയദേവ് ഉനദ്കതും 2 വിക്കറ്റുവീതം പിഴുതു.
ഓപ്പണര് ട്രാവിസ് ഹെഡും അഭിഷേക് ശര്മയും തുടങ്ങിവച്ച വെടിക്കെട്ട് ബാറ്റിങ് അവസാന ഓവറുകളില് ഹെന്റിച് ക്ലാസന് ഏറ്റെടുത്തതോടെയാണ് മുംബൈ ഇന്ത്യന്സിനു മുന്നില് സണ്റൈസേഴ്സ് ഹൈദരാബാദ് പടുകൂറ്റന് വിജയലക്ഷ്യമുയര്ത്തിയത്. മൂവരും ഹൈദരാബാദിനായി അര്ധ ശതകം കണ്ടെത്തി. 34 പന്തില് 80 റണ്സ് നേടിയ ക്ലാസനാണ് സണ്റൈസേഴ്സിന്റെ ടോപ് സ്കോറര്. നിശ്ചിത 20 ഓവറില് 3 വിക്കറ്റ് നഷ്ടത്തില് ഐപിഎലിലെ എക്കാലത്തെയും ഉയര്ന്ന സ്കോറായ 277 റണ്സാണ് സണ്റൈസേഴ്സ് അടിച്ചുകൂട്ടിയത്! 19 ഫോറും 18 സിക്സുമാണ് ഹൈദരാബാദ് ഇന്നിങ്സില് പിറന്നത്. 2013ല് പുണെ വാരിയേഴ്സിനെതിരേ റോയല് ചാലഞ്ചേഴ്സ് ബെംഗളൂരു 5 വിക്കറ്റ് നഷ്ടത്തില് നേടിയ 263 റണ്സാണ് പഴങ്കഥയായത്.
ടോസ് നഷ്ടമായെങ്കിലും ബാറ്റിങ്ങിന് കിട്ടിയ അവസരം മുതലാക്കാനുള്ള ഉദ്ദേശ്യത്തോടെയാണ് സണ്റൈസേഴ്സ് താരങ്ങള് ക്രീസിലെത്തിയത്. അഞ്ചാമത്തെ ഓവറിലെ ആദ്യ പന്തില് ഓപ്പണര് മയാങ്ക് അഗര്വാളിനെ (11) നഷ്ടമായെങ്കിലും ഇതിനകം അവര് 45 റണ്സ് നേടിയിരുന്നു. പിന്നാലെയിറങ്ങിയ അഭിഷേക് ശര്മ ട്രാവിസ് ഹെഡിനൊപ്പം തകര്ത്തടിച്ചതോടെ സ്കോര് കുത്തനെ ഉയര്ന്നു. 24 പന്തില് 9 ഫോറും 3 സിക്സും സഹിതം 62 റണ്സ് നേടിയ ഹെഡ് 8ാം ഓവറില് നമന് ധിറിന് ക്യാച്ച് നല്കിയാണ് പുറത്തായത്. ടീം സ്കോര് 100 കടത്തിയാണ് ഹെഡ് മടങ്ങിയത്.
23 പന്തില് 3 ഫോറും 7 സിക്സിന്റെയും അകമ്പടിയോടെ 63 റണ്സ് നേടിയ അഭിഷേക് ശര്മയായിരുന്നു കൂടുതല് അപകടകാരി. പിയുഷ് ചൗളയെറിഞ്ഞ 11ാം ഓവറിലാണ് താരം പുറത്തായത്. എന്നാല് അവിടെ നിര്ത്താന് സണ്റൈസേഴ്സ് ഒരുക്കമായിരുന്നില്ല. പ്രോട്ടീസ് ബാറ്റര്മാരായ എയ്ഡന് മാര്ക്രവും ഹെന്റിച് ക്ലാസനും ചേര്ന്ന് 15ാം ഓവറില് ടീം സ്കോര് 200 കടത്തി. അവസാന ഓവറുകളില് തകര്ത്തടിച്ചതോടെ സ്കോര് 250 കടന്നു. 34 പന്തില് 4 സിക്സും 7 ഫോറും ഉള്പ്പെടെയാണ് ക്ലാസന് 80 റണ്സ് കണ്ടെത്തിയത്. മാര്ക്രം 28 പന്തില് 42 റണ്സ് നേടി. പിരിയാത്ത നാലാം വിക്കറ്റില് ഇരുവരും ചേര്ന്ന് 54 പന്തില് 116 റണ്സാണ് കൂട്ടിച്ചേര്ത്തത്.
"
https://www.facebook.com/Malayalivartha