കണ്ണീരോടെ കോണ്ഗ്രസ്... കോണ്ഗ്രസിനും സിപിഐയ്ക്കും തൃണമൂല് കോണ്ഗ്രസിനും പിന്നാലെ സിപിഎമ്മിനും ആദായ നികുതി വകുപ്പിന്റെ നോട്ടീസ്; 15 കോടി അടയ്ക്കണം; ആദായ നികുതി അടക്കാനുള്ള നോട്ടീസിനെതിരെ കോണ്ഗ്രസ് സുപ്രീം കോടതിയിലേക്ക്
ഇലക്ടറല് ബോണ്ടിന് പിന്നാലെ പോയ സിപിഎമ്മിനെ ഉത്തരം മുട്ടിച്ച് ആദായനികുതി വകുപ്പ്.കോണ്ഗ്രസിനും സിപിഐയ്ക്കും തൃണമൂല് കോണ്ഗ്രസിനും പിന്നാലെ സിപിഎമ്മിനും ആദായ നികുതി വകുപ്പിന്റെ നോട്ടീസ്. 15 കോടി അടയ്ക്കാനാവശ്യപ്പെട്ടാണ് ആദായ നികുതി വകുപ്പ് നോട്ടീസ് നല്കിയത്. ഒരു ബാങ്ക് അക്കൗണ്ടിന്റെ വിവരങ്ങള് രേഖപ്പെടുത്തിയില്ല എന്ന് ചൂണ്ടിക്കാട്ടിയാണ് നടപടി.
22 കോടി രൂപയുടെ വരുമാനം കണക്കാക്കി 15.59 കോടി രൂപ പിഴയിട്ടു. ആദായനികുതി വകുപ്പ് നടപടിക്കെതിരെ ദില്ലി ഹൈക്കോടതിയെ സമീപിച്ചതായി സിപിഎം അറിയിച്ചു. ലോക്സഭാ തെരഞ്ഞെടുപ്പ് അടുത്തിരിക്കെയാണ് കോണ്ഗ്രസ്, സിപിഎം, സിപിഐ, തൃണമൂല് കോണ്ഗ്രസ് അടക്കം പ്രതിപക്ഷ പാര്ട്ടികള്ക്കെതിരെ കേന്ദ്ര ഏജന്സിയുടെ നടപടി.
തെരഞ്ഞെടുപ്പ് പടിവാതിലില് നില്കുമ്പോള് 1823.08 കോടി രൂപ ഉടന് അടയ്ക്കണം എന്നാവശ്യപ്പെട്ടാണ് ആദായനികുതി വകുപ്പ് കോണ്ഗ്രസിന് നോട്ടീസ് നല്കിയത്. ബാങ്ക് അക്കൗണ്ടുകള് മരവിച്ച് തെരഞ്ഞെടുപ്പ് പ്രചാരണ രംഗത്ത് പ്രതിസന്ധിയിലായി നില്ക്കുന്ന കോണ്ഗ്രസിന് അടുത്ത ആഘാതമായാണ് ആദായ നികുതി വകുപ്പിന്റെ പുതിയ നോട്ടീസ്. 2017-18 സാമ്പത്തിക വര്ഷം മുതല് 2020-21 സാമ്പത്തിക വര്ഷം വരെയുള്ള പിഴയും പലിശയുമടക്കമാണ് തുക.
കോണ്ഗ്രസിന് പിന്നാലെ സിപിഐക്കും ആദായ നികുതി വകുപ്പ് നോട്ടീസ് നല്കിയിട്ടുണ്ട്. 11 കോടി രൂപ തിരിച്ചടയ്ക്കണമെന്നാണ് നിര്ദ്ദേശം. കഴിഞ്ഞ കുറച്ച് വര്ഷങ്ങളായി പഴയ പാന് കാര്ഡ് ഉപയോഗിച്ച് ടാക്സ് റിട്ടേണ് ചെയ്തതിനാലുളള 'കുടിശ്ശിക'യും പാന് കാര്ഡ് തെറ്റായി രേഖപ്പെടുത്തിയതിനാണ് പിഴയുമടക്കമാണ് 11 കോടിയെന്നാണ് നോട്ടീസില് പറയുന്നത്.
നോട്ടീസ് കിട്ടിയെന്ന് തൃണമൂല് കോണ്ഗ്രസ് നേതാവും 72 മണിക്കൂറിനിടെ 11 ഐടി നോട്ടീസുകള് കിട്ടിയെന്ന് സാകേത് ഗോഖലെ എംപി പ്രതികരിച്ചു. ലോക്സഭാ തെരെഞ്ഞെടുപ്പില് പ്രതിപക്ഷത്തെ സമ്മര്ദത്തിലാക്കാന് എല്ലാ വഴികളും നോക്കുകയാണ് ബിജെപി. ഇഡി നടപടി നടക്കാതായപ്പോള് ആദായനികുതി വകുപ്പിനെ ഇറക്കി. മോദി പരിഭ്രാന്തനാണെന്നും ഗോഖല കൂട്ടിച്ചേര്ത്തു.
അതേസമയം ആദായ നികുതി നോട്ടീസുകളില് സുപ്രീം കോടതിയില് അടുത്തയാഴ്ച കോണ്ഗ്രസ് ഹര്ജി നല്കും. 30 വര്ഷം മുമ്പുള്ള നികുതി ഇപ്പോള് ചോദിച്ചതില് തര്ക്കം ഉന്നയിച്ചാവും കോടതിയെ സമീപിക്കുക. ലോക്സഭാ തെരഞ്ഞെടുപ്പ് നടക്കുന്നതിനിടെ കേന്ദ്ര ഏജന്സികളുടെ നീക്കം ചട്ടലംഘനമാണെന്നും പരമോന്നത കോടതിയില് വാദിക്കും. ഒപ്പം ബിജെപിയില് നിന്ന് നികുതി പിരിക്കാത്തതും ചൂണ്ടിക്കാട്ടുമെന്നും നേതാക്കള് അറിയിച്ചു.
സംഭവത്തില് ഇന്ന് രാജ്യവ്യാപകമായി കോണ്ഗ്രസ് പ്രതിഷേധിക്കും. ജില്ലകള് കേന്ദ്രീകരിച്ചുള്ള പ്രതിഷേധത്തിനാണ് ആഹ്വാനം. കേരളത്തില് ആദായ നികുതി വകുപ്പിന്റെ തിരുവനന്തപുരം, കൊച്ചി, കോഴിക്കോട് ഓഫീസുകള്ക്ക് മുന്നില് ധര്ണ നടത്തും. സീതാറാം കേസരിയുടെ കാലം മുതല്, ആദായ നികുതിയിലെ പിഴയും പലിശയുമടക്കം 1823 കോടി രൂപയടക്കാന് നോട്ടീസ് നല്കിയതിലാണ് പ്രതിഷേധം.
പ്രതിപക്ഷ രാഷ്ട്രീയ പാര്ട്ടികള്ക്കെതിരായ ആദായ നികുതി വകുപ്പിന്റെ നടപടിയില് പ്രതികരിച്ച് കോണ്ഗ്രസ് നേതാവ് രാഹുല് ഗാന്ധി രംഗത്തെത്തി. സര്ക്കാര് മാറിയാല് ജനാധിപത്യത്തെ നശിപ്പിക്കുന്നവര്ക്കെതിരെ കര്ശന നടപടിയുണ്ടാകുമെന്ന് രാഹുല് വ്യക്തമാക്കി. ഇനി ഇത്തരം പ്രവര്ത്തികള് ചെയ്യാന് ആരും ധൈര്യപ്പെടാത്ത നടപടിയായിരിക്കും സ്വീകരിക്കുക. ഇത് തന്റെ ഗ്യാരണ്ടിയാണെന്നും രാഹുല് വ്യക്തമാക്കി.
"
https://www.facebook.com/Malayalivartha