ആദ്യ വന്ദേഭാരതിന് ഒരു വയസ്സ്. തിരുവനന്തപുരം-കാസര്‍കോട്-തിരുവനന്തപുരം (20633/20634) വന്ദേഭാരത് ഓട്ടത്തിലും ജനപ്രീതിയിലും ഇപ്പോഴും ഹിറ്റാണ്. രാജ്യത്ത് സര്‍വീസ് നടത്തുന്ന 51 വന്ദേഭാരതുകളില്‍ യാത്രക്കാരുടെ എണ്ണത്തിലും ഒക്യുപ്പെന്‍സിയിലും മുന്നിലാണ് (ഇറങ്ങിയും കയറിയും ഓരോ 100 സീറ്റും ഇരുന്നൂറോളം യാത്രക്കാര്‍ ഉപയോഗിക്കുന്നു) .

ഇന്ത്യയില്‍ ഒക്യുപ്പെന്‍സി 200 ശതമാനത്തിനടുത്ത് തുടരുന്ന ഏക തീവണ്ടിയാണിത്. 16 റേക്കുള്ള വണ്ടിയില്‍ 1100-ഓളം സീറ്റുണ്ട്. 2023 ഏപ്രില്‍ 25-ന് പ്രധാനമന്ത്രി ഫ്‌ലാഗ് ഓഫ് ചെയ്ത വണ്ടി 28 മുതല്‍ സ്ഥിരം സര്‍വീസായി.റെയില്‍വേ പുറത്തുവിട്ട ആദ്യ ആറുദിവസത്തെ കണക്കുപ്രകാരം 2.7 കോടി രൂപയാണ് ടിക്കറ്റ് നിരക്കില്‍ ലഭിച്ചത്. എപ്പോഴും സീറ്റ് ഫുള്ളുമാണ്.


മംഗളൂരു-ഗോവ-മംഗളൂരു വന്ദേഭാരതിന്റെ ഒക്യുപ്പെന്‍സി നിരക്ക് 50 ശതമാനത്തില്‍ കീഴെയാണ്. കേരളത്തിലെ രണ്ടാം വന്ദേഭാരതിന്റെ (തിരുവനന്തപുരം-മംഗളൂരു-തിരുവനന്തപുരം) ഒക്യുപ്പെന്‍സി നിരക്ക് 165 ശതമാനത്തിന് മുകളിലാണ്.

വന്ദേഭാരത് വന്നതിനുശേഷമാണ് തീവണ്ടികളുടെ വേഗം വര്‍ദ്ധിപ്പിക്കാന്‍ പാളത്തില്‍ പണിയും തുടങ്ങിയത്. വേഗം 130 കിലോമീറ്ററില്‍ എത്തിക്കാന്‍ വളവുനികത്തല്‍, പുതിയ സിഗ്‌നലിങ് സംവിധാനം ഉള്‍പ്പെടെയുള്ളവയും ആരംഭിച്ചു. വണ്ടിയില്‍ ഓടിക്കയറുന്നതും വാതില്‍ക്കല്‍ ഇരിക്കുന്നതുമായ ചില ശീലങ്ങള്‍ക്കും വന്ദേഭാരത് മാറ്റംവരുത്തി.

ഓട്ടോമാറ്റിക് വാതിലുകളാണ് വന്ദേഭാരതിലുള്ളത്. ഭക്ഷണം, വെള്ളം എന്നിവയില്‍ ചില മാറ്റങ്ങള്‍ വന്നു. മാര്‍ച്ചുമുതല്‍ അരലിറ്റര്‍ കുപ്പിവെള്ളംകൂടി (റെയില്‍ നീര്) നല്‍കാന്‍ തുടങ്ങിയിരുന്നു. കറന്റ് ടിക്കറ്റില്‍ ഭക്ഷണം ബുക്ക് ചെയ്തവര്‍ക്ക് സാധാരണ നല്‍കുന്ന വേവിച്ച ആഹാരം നല്‍കുന്നത് നിര്‍ത്തി.

കറന്റ് ബുക്കിങ് യാത്രക്കാര്‍ക്ക് പാക്ക്‌ചെയ്ത ഭക്ഷണമാണ് നല്‍കുന്നത്. മറ്റുവണ്ടികളുടെ സമയക്രമങ്ങളെ ബാധിക്കാതിരിക്കാനായി വന്ദേഭാരതിന്റെ സമയക്രമം രണ്ടുതവണ മാറ്റിയിരുന്നു. നിലവില്‍ രാവിലെ 5.15-ന് തിരുവനന്തപുരത്തുനിന്ന് (20634) പുറപ്പെട്ട് ഉച്ചയ്ക്ക് 1.20-ന് കാസര്‍കോട്ടെത്തും. ഉച്ചയ്ക്ക് 2.30-ന് കാസര്‍കോടുനിന്ന് (20633) തിരുവനന്തപുരത്തേക്ക് പുറപ്പെടും. രാത്രി 10.40-ന് എത്തും. ഇപ്പോഴും ചില പിടിച്ചിടല്‍ മറ്റുവണ്ടികളിലെ യാത്രക്കാരെ വലയ്ക്കുന്നുണ്ട്.