നാണക്കേടിന്റെ തോല്വി . ബാറ്റിങ്ങില് പാടേ തകര്ന്നുപോയ ഗുജറാത്ത് ടൈറ്റന്സിനെതിരെ ഡല്ഹി ക്യാപിറ്റല്സിന് അനായാസ ജയം; 67 പന്തും 6 വിക്കറ്റും ബാക്കിയാക്കി ഗുജറാത്തിനെതിരെ അനായാസം ഡല്ഹി ക്യാപിറ്റല്സ് വിജയിച്ചു
ഐപിഎല് മത്സരത്തില് ചെറിയ സ്കോര് നേടിയ ഗുജറാത്ത് ടൈറ്റന്സിനെതിരെ ഡല്ഹി ക്യാപിറ്റല്സിന് ജയം. പൊരുതാനുള്ള സ്കോര് പോലും നേടാനാകാതെ ബാറ്റിങ്ങില് പാടേ തകര്ന്നുപോയ ഗുജറാത്ത് ടൈറ്റന്സിനെതിരെ ഡല്ഹി ക്യാപിറ്റല്സിന് അനായാസ ജയമാണ് നേടിയത്.
ഐപിഎല് ചരിത്രത്തില് തങ്ങളുടെ ഏറ്റവും മോശം സ്കോറെന്ന നാണക്കേടുമായി ഗുജറാത്ത് ഉയര്ത്തിയ 90 റണ്സ് വിജയലക്ഷ്യം, 67 പന്തും ആറു വിക്കറ്റും ബാക്കിയാക്കി ഡല്ഹി മറികടന്നു. വന്നവരെല്ലാം തകര്ത്തടിച്ചതോടെ ഒരു വശത്ത് വിക്കറ്റുകള് കൊഴിഞ്ഞെങ്കിലും, നാലു വിക്കറ്റ് വീഴുമ്പോഴേയ്ക്കും ഡല്ഹി വിജയത്തിലെത്തി. 20 പന്തില് രണ്ടു വീതം സിക്സും ഫോറും സഹിതം 20 റണ്സെടുത്ത ജെയ്ക് ഫ്രേസന് മഗൂര്ക് ഡല്ഹിയുടെ ടോപ് സ്കോററായി.
അഭിഷേക് പോറല് (ഏഴു പന്തില് രണ്ടു ഫോറും ഒരു സിക്സും സഹിതം 15), ഷായ് ഹോപ്പ് (10 പന്തില് ഒരു ഫോറും രണ്ടു സിക്സും സഹിതം 19), ഓപ്പണര് പൃഥ്വി ഷാ (ആറു പന്തില് ഒരു ഫോര് സഹിതം ഏഴ്) എന്നിവരാണ് പുറത്തായത്. ക്യാപ്റ്റന് ഋഷഭ് പന്ത് 11 പന്തില് ഓരോ സിക്സും ഫോറും സഹിതം 16 റണ്സോടെയും സുമിത് കുമാര് ഒന്പതു പന്തില് രണ്ടു ഫോറുകള് സഹിതം ഒന്പതു റണ്സോടെയും പുറത്താകാതെ നിന്നു.
ഗുജറാത്ത് ടൈറ്റന്സിനായി അരങ്ങേറ്റം കുറിച്ച മലയാളി താരം മൂന്ന് ഓവറില് 40 റണ്സ് വഴങ്ങി രണ്ടി വിക്കറ്റ് വീഴ്ത്തി. സ്പെന്സര് ജോണ്സന് രണ്ട് ഓവറില് 22 റണ്സ് വഴങ്ങിയും റാഷിദ് ഖാന് രണ്ട് ഓവറില് 12 റണ്സ് വഴങ്ങിയും ഓരോ വിക്കറ്റെടുത്തു.
നേരത്തേ, ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ ഗുജറാത്ത്, ഡല്ഹി ക്യാപിറ്റല്സിനു മുന്നില് ഉയര്ത്തിയത് 90 റണ്സ് വിജയലക്ഷ്യം. ഐപിഎല് ചരിത്രത്തില് ഗുജറാത്ത് ടൈറ്റന്സിന്റെ ഏറ്റവും ചെറിയ സ്കോറാണിത്. ഈ സീസണില് ഏതൊരു ടീമും നേടുന്ന കുറഞ്ഞ സ്കോറും. ക്യാപ്റ്റന് ശുഭ്മന് ഗില് ഉള്പ്പെടെ പ്രമുഖ താരങ്ങളെല്ലാം കൂട്ടത്തോടെ നിറംമങ്ങിയ മത്സരത്തില് 17.3 ഓവറിലാണ് ഗുജറാത്ത് 89 റണ്സിന് എല്ലാവരും പുറത്തായത്. 24 പന്തില് രണ്ടു ഫോറും ഒരു സിക്സും സഹിതം 31 റണ്സെടുത്ത റാഷിദ് ഖാനാണ് ഗുജറാത്തിന്റെ ടോപ് സ്കോറര്.
റാഷിദ് ഖാന് ഉള്പ്പെടെ ഗുജറാത്ത് നിരയില് രണ്ടക്കത്തിലെത്തിയത് മൂന്നു പേര് മാത്രമാണ്. സായ് സുദര്ശന് ഒന്പതു പന്തില് 2 ഫോറുകളോടെ 12 റണ്സെടുത്തും രാഹുല് തെവാത്തിയ 15 പന്തില് ഒരേയൊരു ഫോര് സഹിതം 10 റണ്സെടുത്തും പുറത്തായി. റാഷിദ് ഖാന് നേടിയ ഒരേയൊരു സിക്സര് മാത്രമുള്ള ഗുജറാത്ത് ഇന്നിങ്സില്, ആകെ പിറന്നത് എട്ടു ഫോറുകള് മാത്രം.
ടീമിലേക്കു തിരിച്ചെത്തിയ ഓപ്പണര് വൃദ്ധിമാന് സാഹ (10 പന്തില് രണ്ട്), ഡേവിഡ് മില്ലര് (ആറു പന്തില് രണ്ട്) എന്നിവര് പൂര്ണമായും നിരാശപ്പെടുത്തി. ക്യാപ്റ്റന് ശുഭ്മന് ഗില് (ആറു പന്തില് എട്ട്), അഭിനവ് മനോഹര് (14 പന്തില് എട്ട്), ഷാരൂഖ് ഖാന് (0), മോഹിത് ശര്മ (14 പന്തില് രണ്ട്), നൂര് അഹമ്മദ് (ഏഴു പന്തില് ഒന്ന്) എന്നിവരും നിരാശപ്പെടുത്തി. സ്പെന്സര് ജോണ്സന് ഒറു റണ്ണുമായി പുറത്താകാതെ നിന്നു.
ഡല്ഹിക്കായി മുകേഷ് കുമാര് 2.3 ഓവറില് 14 റണ്സ് വഴങ്ങി മൂന്നു വിക്കറ്റ് വീഴ്ത്തി. ഇഷാന്ത് ശര്മ രണ്ട് ഓവറില് എട്ടു റണ്സ് മാത്രം വഴങ്ങിയും ട്രിസ്റ്റന് സ്റ്റബ്സ് ഒരു ഓവറില് 11 റണ്സ് വഴങ്ങിയും രണ്ടു വിക്കറ്റ് വീതം വീഴ്ത്തി. അക്ഷര് പട്ടേല്, ഖലീല് അഹമ്മദ് എന്നിവര്ക്ക് ഓരോ വിക്കറ്റ് ലഭിച്ചു.
"
https://www.facebook.com/Malayalivartha