മദ്യപിച്ച് ഡ്യൂട്ടിക്കെത്തുന്ന കെഎസ്ആര്ടിസി ജീവനക്കാരെ പിടികൂടാനുള്ള പരിശോധന കര്ശനമാക്കുമെന്ന് മന്ത്രി കെബി ഗണേശ് കുമാര്
യാത്രക്കാരുടെ സുരക്ഷയ്ക്കാണ് സര്ക്കാര് പ്രധാന്യം നല്കുന്നതെന്ന് ഗതാഗത വകുപ്പ് മന്ത്രി കെബി ഗണേശ് കുമാര്. മദ്യപിച്ച് ഡ്യൂട്ടിക്കെത്തുന്ന കെഎസ്ആര്ടിസി ജീവനക്കാരെ പിടികൂടാനുള്ള പരിശോധന കര്ശനമാക്കുമെന്ന് അദ്ദേഹം പറഞ്ഞു. പരിശോധന കര്ശനമാക്കിയ ശേഷം കെഎസ്ആര്ടിസിയില് അപകടം കുറഞ്ഞിട്ടുണ്ട്. സ്വകാര്യ ബസ് ജീവനക്കാരെ പരിശോധിച്ചപ്പോള് ഒരാള് പോലും മദ്യപിച്ചതായി കണ്ടെത്തിയിട്ടില്ലെന്നും അദ്ദേഹം വ്യക്തമാക്കി.
'പരിശോധന തുടങ്ങിയ ശേഷം കെഎസ്ആര്ടിസിയില് അപകടം കുറഞ്ഞിട്ടുണ്ട്. പരിശോധന ഫലം കാണുന്നു എന്നാണ് മനസിലാക്കേണ്ടത്. കഴിഞ്ഞ ദിവസം കാന്തല്ലൂരില് പോയി അഞ്ച് വണ്ടി പരിശോധിച്ചിരുന്നു. അവിടെ പത്ത് ജീവനക്കാരുണ്ടായിരുന്നു. അതില് ഒമ്പത് പേരും മദ്യപിച്ചിരിക്കുകയായിരുന്നു. പത്താമത്തെയാള് ഒരു മാന്യനാണെന്ന് കരുതി ബാഗ് പരിശോധിച്ചപ്പോള് അതില് വലിയൊരു കുപ്പി മദ്യം കണ്ടെത്തി. അവിടെ ഒരു മദ്യപാന സദസ് നടക്കുന്നതായാണ് വിജിലന്സ് കണ്ടെത്തിയിരിക്കുന്നത്'.
'എനിക്ക് അത്ഭുതമായി തോന്നിയത്, കേരളത്തിലെ 1009 സ്വകാര്യ ബസുകള് പരിശോധിച്ചു. അതില് ഒരാള് പോലും മദ്യപിച്ചിരുന്നില്ല. മദ്യത്തിന് പകരം ഇനി വേറെ എന്തെങ്കിലും സാധനമാണോ ഉപയോഗിക്കുന്നത് എന്നറിയില്ല. ആ പരിശോധനയും കര്ശനമാക്കുകയാണ്. 1009 ബസ് പരിശോധിച്ചപ്പോള് എംവിഡി ഉദ്യോഗസ്ഥര് പറയുന്നത് ഒരാളെ പോലും പിടിച്ചിട്ടില്ല എന്നാണ്. അതിന്റെ കാരണം, മദ്യപിച്ച് ജോലിക്കെത്തിയാല് ഉടമസ്ഥന് വണ്ടിയില് കയറ്റില്ല'- മന്ത്രി പറഞ്ഞു.
https://www.facebook.com/Malayalivartha