പലര്ക്കും നിര്ണായകം... സംസ്ഥാനത്ത് പരസ്യ പ്രചാരണത്തിന് ഇന്ന് കൊട്ടിക്കലാശം; തെരഞ്ഞെടുപ്പ് വെള്ളിയാഴ്ച; 12 സംസ്ഥാനങ്ങളിലെയും ജമ്മുവിലെയും അടക്കം 88 മണ്ഡലങ്ങളില് വെള്ളിയാഴ്ച തെരഞ്ഞെടുപ്പ് നടക്കും; ജയിക്കാനായി അവസാന അങ്കവും പയറ്റി മുന്നണികള്
ഏറെ നാളത്തെ കാത്തിരിപ്പിന് വിരാമമാകുകയാണ്. സംസ്ഥാനത്ത് പരസ്യ പ്രചാരണത്തിന് ഇന്ന് കൊട്ടിക്കലാശം. ഇന്ന് സ്ഥാനാര്ത്ഥികളുടെ മണ്ഡലപര്യടനം പൂര്ത്തിയാകും. 12 സംസ്ഥാനങ്ങളിലെയും ജമ്മുവിലെയും അടക്കം 88 മണ്ഡലങ്ങളിലാണ് വെള്ളിയാഴ്ച തെരഞ്ഞെടുപ്പ് നടക്കുന്നത്.
യഥാര്ത്ഥ ചൂടിനൊപ്പം ഈ പ്രചാരണ ചൂടുംതാണ്ടിയാണ് ഇന്ന് ആവേശക്കൊടുമുടിയില് കലാശക്കൊട്ട്. രാവിലെ മുതല് മണ്ഡലത്തെ ഇളക്കിമറിച്ച് സ്ഥാനാര്ത്ഥികളുടെ റോഡ് ഷോ നടക്കും. മൂന്ന് മണിയോടെ മണ്ഡലകേന്ദ്രങ്ങളിലായിരിക്കും കലാശക്കൊട്ട്. വര്ണക്കടലാസുകള് വാരിവിതരുന്ന പോപ്അപ്പുകള്ക്കും വാദ്യമേളങ്ങളോടെ കൊടികള് വീശി, ബലൂണുകള്പറത്തി പരസ്യപ്രചാരണം അവസാന നിമിഷങ്ങളിലേക്ക് കടക്കും.
കൃത്യം അഞ്ചിന് പരസ്യപ്രചാരണം നിര്ത്തും. നാളെ നിശബ്ദപ്രചാരണത്തിന്റെ ഒരു ദിവസം കൂടി പിന്നിട്ടാല് കേരളം പോളിങ് ബൂത്തിലെത്തും. നിശബ്ദ പ്രചാരണം കഴിഞ്ഞ് മറ്റന്നാളാണ് കേരളം വിധിയെഴുതുന്നത്. കൊട്ടിക്കലാശത്തിന് ആവേശം പകരാന് പ്രിയങ്ക ഗാന്ധി ഇന്ന് വയനാട് ലോക്സഭ മണ്ഡലത്തിലെത്തും. രാവിലെ പതിനൊന്നുമണിക്ക് കമ്പളക്കാടാണ് ജില്ലയിലെ ആദ്യ പരിപാടി. മൂന്നുമണിക്ക് വണ്ടൂരില് പൊതുയോഗമുണ്ട്.
എന്ഡിഎ പ്രചാരണം കൊഴുപ്പിക്കാന് അണ്ണാമലൈ ഇന്ന് വയനാട്ടിലെത്തും. രാവിലെ 10 മണിക്ക് മാനന്തവാടിയില് റോഡ് ഷോയില് അദ്ദേഹം പങ്കെടുക്കും. ആനിരാജയ്ക്കും രാവിലെ റോഡ് ഷോയുണ്ട്. അതേസമയം, കേന്ദ്ര ആഭ്യന്തര മന്ത്രി അമിത് ഷാ ഇന്ന് ആലപ്പുഴയില് ബിജെപി സ്ഥാനാര്ത്ഥി ശോഭ സുരേന്ദ്രന്റെ തെരെഞ്ഞെടുപ്പ് പ്രചാരണത്തില് പങ്കെടുക്കും.
പുന്നപ്ര കാര്മല്ഗിരി എഞ്ചിനീയറിംഗ് കോളേജ് മൈതാനത്താണ് അദ്ദേഹം രാവിലെ പത്തുമണിയോടെ പ്രസംഗിക്കുക. പരിപാടിയില് പങ്കെടുക്കുന്നതിനായി ഇന്നലെ രാത്രി പതിനൊന്ന് മണിയോടെ അദ്ദേഹം നെടുമ്പാശേരി വിമാനത്താവളത്തില് എത്തി. രാവിലെ ഹെലികോപ്ടറില് ആലപ്പുഴയിലെത്തുന്ന കേന്ദ്ര ആഭ്യന്തര മന്ത്രി പ്രസംഗത്തിനു ശേഷം ദില്ലിക്ക് മടങ്ങും. സംസ്ഥാനത്ത് ഇന്ന് അമിത് ഷാ പങ്കെടുക്കുന്ന ഏക തെരെഞ്ഞെടുപ്പ് പ്രചാരണ പരിപാടി ആലപ്പുഴയിലേത് മാത്രമാണ്.
അതേസമയം പ്രധാനമന്ത്രി നരേന്ദ്ര മോദിയുടെ രാജസ്ഥാന് പ്രസംഗം സുപ്രീംകോടതിയില് ഉന്നയിക്കാന് സിപിഎം. ഇന്ന് സുപ്രീംകോടതി വിദ്വേഷപ്രസംഗങ്ങള്ക്കെതിരായ ഹര്ജികള് പരിഗണിക്കുമ്പോള് സിപിഎം പിബി അംഗം നേതാവ് വൃന്ദ കാരാട്ടിന്റെ അഭിഭാഷകന് വിഷയം കോടതിയില് ഉന്നയിക്കും. വിദ്വേഷ പ്രസംഗ വിഷയത്തില് മോദിക്കെതിരെ കേസ് രജിസ്റ്റര് ചെയ്യണമെന്ന് ആവശ്യപ്പെട്ട് ദില്ലി മന്ദിര്മാര്ഗ് പൊലീസ് സ്റ്റേഷനില് വൃന്ദ കാരാട്ട് പരാതി നല്കിയിരുന്നു. എന്നാല് ആ പരാതി സ്വീകരിക്കാന് പൊലീസ് തയ്യാറായില്ല. ഈക്കാര്യവും കോടതിയുടെ ശ്രദ്ധയില് പെടുത്തും. ജസ്റ്റിസ് സഞ്ജീവ് ഖന്ന അധ്യക്ഷനായ ബെഞ്ചാണ് ഹര്ജി.
അതേ സമയം, രാജ്യത്തിന്റെ സമ്പത്ത് കോണ്ഗ്രസ് മുസ്ലിംങ്ങള്ക്ക് നല്കുമെന്ന പ്രധാനമന്ത്രിയുടെ പ്രസംഗത്തിന്റെ ദൃശ്യങ്ങള് തെരഞ്ഞെടുപ്പ് കമ്മീഷന് തേടി. രാജസ്ഥാനിലെ ബന്സ്വാറില് ഞായറാഴ്ച നടന്ന റാലിയിലാണ് മോദി വിവാദ പ്രസംഗം. ഒന്നരമണിക്കൂറോളം ദൈര്ഘ്യമുളള പ്രസംഗത്തിന്റെ ദൃശ്യങ്ങള് നാളേക്കുള്ളില് ഹാജരാക്കാനും, ഉള്ളടക്കം എഴുതി നല്കാനുമാണ് ബന്സ്വാര് ഇലക്ട്രല് ഓഫീസര്ക്കുള്ള നിര്ദ്ദേശം. പെരുമാറ്റ ചട്ട ലംഘനം തെളിഞ്ഞാല് സാധാരണ നിലക്ക് താക്കീത് നല്കാം, പ്രചാരണത്തില് നിന്ന് വിലക്കുകയും ചെയ്യാം. പ്രധാനമന്ത്രിയുടെ കാര്യത്തില് കമ്മീഷന് നിഷ് പക്ഷമായി ഇടപെടുമോയെന്നാണ് പ്രതിപക്ഷം ഉറ്റുനോക്കുന്നത്.
അതിനിടെ പ്രസംഗത്തെ പ്രധാനമന്ത്രി ആവര്ത്തിച്ച് ന്യായീകരിച്ചു. സര്വേ നടത്തി രാജ്യത്തെ സമ്പത്ത് കൊള്ളയടിച്ച് വേണ്ടപ്പെട്ടവര്ക്ക് മറിച്ച് നല്കാനാണ് കോണ്ഗ്രസിന്റെ നീക്കം. മുസ്ലീംങ്ങള്ക്കായി എസ്എസി, എസ്ടി, ഒബിസി സംവരണം അട്ടിമറിക്കാന് കോണ്ഗ്രസ് ശ്രമിച്ചുവെന്നും, സുപ്രീംകോടതി ഇടപെടലില് നീക്കം പരാജയപ്പെടുകയായിരുന്നുവെന്നും മോദി ആരോപിച്ചു.
"
https://www.facebook.com/Malayalivartha