ദൃശ്യങ്ങള് പകര്ത്തുന്നതിനിടെ കാട്ടാനയുടെ ആക്രമണത്തില് മരിച്ച മാതൃഭൂമി ന്യൂസ് സീനിയര് ക്യാമറാമാന് എ.വി. മുകേഷിന്റെ സംസ്കാരം ഇന്ന്
ദൃശ്യങ്ങള് പകര്ത്തുന്നതിനിടെ കാട്ടാനയുടെ ആക്രമണത്തില് മരിച്ച മാതൃഭൂമി ന്യൂസ് സീനിയര് ക്യാമറാമാന് എ.വി. മുകേഷിന്റെ സംസ്കാരച്ചടങ്ങുകള് ഇന്ന് രാവിലെ പത്തുമണിക്ക് ചെട്ടിപ്പടിയിലെ വീട്ടുവളപ്പില് നടക്കും.
മൃതദേഹം ബുധനാഴ്ച രാത്രി വീട്ടിലെത്തിച്ചു. മലമ്പുഴ കൊട്ടേക്കാട് വേനോലി എളമ്പരക്കാടിന് സമീപത്തെ ജനവാസമേഖലയില് ഇന്നലെ രാവിലെ എട്ടുമണിയോടെയാണ് കാട്ടാനയുടെ ആക്രമണത്തില് മുകേഷിന് പരിക്കേല്ക്കുന്നത്. ഉടന് ആശുപത്രിയില് എത്തിച്ചുവെങ്കിലും രക്ഷിക്കാനായില്ല.
ജോലി ചെയ്തയിടങ്ങളിലെല്ലാം, മുകേഷ് പാര്ശ്വവത്കരിക്കപ്പെട്ട മനുഷ്യരെ അടയാളപ്പെടുത്തിയിട്ടുണ്ടായിരുന്നു. പാലക്കാട്ടെ പ്രധാന പ്രശ്നങ്ങളിലൊന്നായ ജനവാസമേഖലയിലെ കാട്ടാനശല്യത്തിന്റെ ദൃശ്യങ്ങള് പകര്ത്തുന്നതിനിടെ ആനയുടെ അപ്രതീക്ഷിത ആക്രമണത്തില് പരിക്കേറ്റാണ് എ.വി. മുകേഷ് മരിച്ചത്. കൃഷിയിടത്തില് പുലര്ച്ചെ കാട്ടാനയിറങ്ങിയെന്ന് നാട്ടുകാരില് നിന്ന് ലഭിച്ച വിവരത്തിന്റെ അടിസ്ഥാനത്തിലാണ് മാതൃഭൂമി ന്യൂസ് സംഘം ദൃശ്യങ്ങള് പകര്ത്താനെത്തിയത്.
കാട്ടാനകള് കോരയാര് കടക്കുന്ന ദൃശ്യങ്ങള് പകര്ത്താനായി ശ്രമിക്കുന്നതിനിടെ ആനകളിലൊന്ന് തിരിഞ്ഞ് ആക്രമിക്കുകയായിരുന്നു. ആന അതിവേഗം ഓടിയെത്തിയതോടെ സംഘം ചിതറിയോടി.
പക്ഷെ സംഘാംഗങ്ങള് പിന്നീട് തിരഞ്ഞെത്തിയപ്പോഴാണ് ആനയുടെ ചവിട്ടേറ്റ നിലയില് മുകേഷിനെ കണ്ടെത്തിയത്. ഇടുപ്പിനും തുടയ്ക്കും ഗുരുതര പരിക്കേറ്റ മുകേഷിനെ ഉടന് ജില്ലാ ആശുപത്രിയിലെത്തിച്ചെങ്കിലും രക്ഷിക്കാന് കഴിഞ്ഞില്ല.
"
https://www.facebook.com/Malayalivartha