കരിക്കകം സ്വദേശിയായ ജെ ആര്‍ ശിവപ്രിയ പ്രസവശേഷം മരിച്ചത് അണുബാധ മൂലമെന്ന് വിദഗ്ധ സമിതിയുടെ റിപ്പോര്‍ട്ട്. സ്റ്റഫൈലോകോക്കസ് ബാക്ടീരിയയാണ് യുവതിയുടെ മരണത്തിന് കാരണമായതെന്നാണ് റിപ്പോര്‍ട്ടില്‍ പരാമര്‍ശിക്കുന്നത്. ഈ ബാക്ടീരിയ സാധാരണ പൊതുസ്ഥലങ്ങളിലും കാണപ്പെടാമെന്നും റിപ്പോര്‍ട്ടിലുണ്ട്. അതുകൊണ്ട് എവിടെ നിന്നാണ് യുവതിക്ക് അണുബാധയുണ്ടായതെന്ന് സ്ഥിരീകരിക്കാന്‍ സാധിക്കില്ലെന്നും റിപ്പോര്‍ട്ടില്‍ വ്യക്തമാക്കിയിട്ടുണ്ട്. എസ് എ ടി ആശുപത്രിയിലെ അണുബാധ സ്ഥിരീകരണവുമായി ബന്ധപ്പെട്ടുളള റിപ്പോര്‍ട്ടുകള്‍ വിദഗ്ദ സംഘം പരിശോധിച്ചിരുന്നു.

അതേസമയം, വിദഗ്ദ സമിതിയുടെ റിപ്പോര്‍ട്ടില്‍ വിശ്വാസമില്ലെന്നാണ് ശിവപ്രിയയുടെ സഹോദരന്‍ മാദ്ധ്യമങ്ങളോട് പറഞ്ഞു. ആശുപത്രിക്കും സര്‍ക്കാരിനുമെതിരെ പോരാടിയാലും മരിച്ചുപോയ സഹോദരിയെ തിരികെ കിട്ടില്ലെന്നും നീതി വേണമെന്നും സഹോദരന്‍ കൂട്ടിച്ചേര്‍ത്തു.

പ്രസവശേഷമുളള അണുബാധയെ തുടര്‍ന്ന് ചികിത്സയിലായിരുന്ന യുവതി ഞായറാഴ്ച രാവിലെ പതിനൊന്ന് മണിയോടെയാണ് മരിച്ചത്. സംഭവത്തില്‍ എസ് എ ടി ആശുപത്രി അധികൃതര്‍ വിശദീകരണവുമായി രംഗത്തെത്തിയിരുന്നു. ചികിത്സയിലുണ്ടായിരുന്ന ദിവസങ്ങളില്‍ ശിവപ്രിയയും കുഞ്ഞിനും യാതൊരുവിധ ആരോഗ്യപ്രശ്‌നങ്ങളുമുണ്ടായിരുന്നില്ലെന്ന് ആശുപത്രി സൂപ്രണ്ട് ഡോ. ബിന്ദു വ്യക്തമാക്കി. ശിവപ്രിയ ആരോഗ്യവതിയെന്ന് പരിശോധനയില്‍ വ്യക്തമായ ശേഷമാണ് ഡിസ്ചാര്‍ജ് ചെയ്തത്. ഗര്‍ഭസ്ഥ ശിശുവിന് ചലനം കുറവായിരുന്നുവെന്ന കാരണത്താലാണ് ഒക്ടോബര്‍ 19ന് ശിവപ്രിയയെ മറ്റൊരു ആശുപത്രിയില്‍ നിന്ന് എസ് എ ടി ആശുപത്രിയിലേയ്ക്ക് റഫര്‍ ചെയ്തത്.

തുടര്‍ന്ന് 37 ആഴ്ച പൂര്‍ത്തിയായ ശിവപ്രിയയെ പ്രസവിപ്പിക്കാന്‍ തീരുമാനിച്ചു. അതിനുവേണ്ട മരുന്നുകളും ചികിത്സയും നല്‍കുകയും 22 ന് പ്രസവിക്കുകയും ചെയ്തു. 24 ന് ഡിസ്ചാര്‍ജ് ചെയ്തശേഷം 26 ന് പനിയും വയറിളക്കവും ബാധിച്ച് ആശുപത്രിയിലെത്തിയ ശിവപ്രിയയ്ക്ക് നടത്തിയ പരിശോധനയില്‍ സെപ്ടിക് ഷോക്ക് എന്ന അവസ്ഥ സ്ഥിരീകരിച്ചു. തുടര്‍ന്ന് മെഡിക്കല്‍ ബോര്‍ഡ് ചേര്‍ന്ന് ചികിത്സ ഏകോപിപ്പിക്കുകയും മള്‍ട്ടി ഡിസിപ്ലിനറി ഐസിയുവില്‍ പ്രവേശിപ്പിച്ച് വിദഗ്ധ ചികിത്സ നല്‍കുകയും ചെയ്തുവെങ്കിലും രോഗാവസ്ഥ മൂര്‍ച്ഛിക്കുകയായിരുന്നുവെന്നും സൂപ്രണ്ട് പറഞ്ഞു.