മകനെ കേസില്‍ കുടുക്കുമെന്ന് ഭീഷണിപ്പെടുത്തി 45 ലക്ഷം രൂപ തട്ടിയെടുക്കാനുള്ള സൈബര്‍ തട്ടിപ്പ് ശ്രമം ബാങ്ക് ജീവനക്കാരുടെ സമയോചിതമായ ഇടപെടലിലൂടെ പരാജയപ്പെട്ടു. തിങ്കളാഴ്ചയാണ് സംഭവം. പത്തനംതിട്ട കിടങ്ങന്നൂരിലെ ഫെഡറല്‍ ബാങ്കിലാണ് 70 വയസ്സുകാരന്‍ അടിയന്തരമായി പണം ആവശ്യപ്പെട്ട് എത്തിയത്. ബാങ്കിലെത്തിയ 70 വയസ്സുകാരന്റെ പരിഭ്രാന്തി നിറഞ്ഞ പെരുമാറ്റമാണ് തട്ടിപ്പ് സംഘത്തിന്റെ നീക്കത്തെ തിരിച്ചറിയാന്‍ ബാങ്ക് അധികൃതരെ സഹായിച്ചത്.

മകനെ കേസില്‍ കുടുക്കാതിരിക്കാന്‍ പണം നല്‍കണമെന്ന് ആവശ്യപ്പെട്ടായിരുന്നു തട്ടിപ്പുസംഘം വയോധികനെ സമീപിച്ചത്. ഈ 'വെര്‍ച്വല്‍ അറസ്റ്റ്' ഭീഷണിയില്‍ പരിഭ്രാന്തനായ അദ്ദേഹം രാവിലെ പത്ത് മണിയോടെ ബാങ്കിലെത്തി 45 ലക്ഷം രൂപയുടെ സ്ഥിരം നിക്ഷേപം സേവിങ്‌സ് അക്കൗണ്ടിലേക്ക് മാറ്റണമെന്ന് ആവശ്യപ്പെട്ടു. വീട്ടാവശ്യത്തിനാണ് പണം എന്നാണ് ആദ്യം പറഞ്ഞതെങ്കിലും, പെട്ടെന്നുള്ള ഈ മാറ്റത്തില്‍ ജീവനക്കാര്‍ക്ക് സംശയം തോന്നി. അക്കൗണ്ടിലേക്ക് പണം മാറ്റിയ ശേഷം തിരികെ വീട്ടിലേക്ക് പോയ വയോധികന്‍, ഉടന്‍ തന്നെ മുംബൈയിലെ 'അമിക്കോ മറൈന്‍ സര്‍വീസ്' എന്ന അക്കൗണ്ടിലേക്ക് 45 ലക്ഷം അയയ്ക്കാന്‍ ആവശ്യപ്പെട്ട് വീണ്ടും ബാങ്കില്‍ എത്തുകയായിരുന്നു.

വീണ്ടും ചോദ്യം ചെയ്തപ്പോള്‍ മുംബൈയില്‍ സ്ഥലം വാങ്ങാനാണ് പണം എന്ന മറുപടി നല്‍കിയതോടെ ബാങ്ക് അധികൃതര്‍ക്ക് സംശയം ഇരട്ടിയായി. പണം അയയ്ക്കാന്‍ ബാങ്ക് ജീവനക്കാര്‍ മടിച്ചപ്പോള്‍ വയോധികന്‍ വീണ്ടും വീട്ടിലേക്ക് മടങ്ങി. ഈ സമയം അദ്ദേഹത്തിന്റെ ഭാര്യയും വീട്ടിലെത്തി. തട്ടിപ്പ് സംഘത്തിന്റെ ആവശ്യം ഭാര്യയെ ധരിപ്പിച്ചതോടെ, തട്ടിപ്പാണ് നടക്കുന്നതെന്ന് മനസ്സിലാക്കി ഇരുവരും ബ്രാഞ്ച് മാനേജര്‍ ജി. വിനീതയോടും മറ്റ് ജീവനക്കാരോടും വിവരം പറയുകയായിരുന്നു. സൈബര്‍ തട്ടിപ്പാണെന്ന് തിരിച്ചറിഞ്ഞതോടെ, ഉടന്‍തന്നെ വിവരങ്ങള്‍ സൈബര്‍ സെല്ലിന് കൈമാറുകയും ആറന്‍മുള പോലീസ് സ്‌റ്റേഷനില്‍ പരാതി നല്‍കുകയും ചെയ്തു.

തട്ടിപ്പ് സംഘത്തിന്റെ നിര്‍ദ്ദേശപ്രകാരം വയോധികന്‍ കിടങ്ങന്നൂരിലെ കേരള ബാങ്കില്‍ നിന്ന് 19 ലക്ഷം രൂപ പിന്‍വലിച്ചിരുന്നു. ഈ പണം മറ്റൊരു ബാങ്കില്‍ നിക്ഷേപിച്ച് തട്ടിപ്പ് സംഘത്തിന് അയയ്ക്കാന്‍ ആയിരുന്നു നിര്‍ദ്ദേശം. എന്നാല്‍ സാങ്കേതിക തടസ്സങ്ങള്‍ കാരണം കേരള ബാങ്കില്‍ നിന്ന് പണം നല്‍കാന്‍ വൈകിയത് കാരണം, ഈ പണം തട്ടിപ്പ് സംഘം നിര്‍ദേശിച്ച അക്കൗണ്ടില്‍ നിക്ഷേപിക്കാന്‍ കഴിഞ്ഞില്ല. ഇതുവഴി ആ പണവും നഷ്ടപ്പെടാതെ രക്ഷപ്പെട്ടു.