സുപ്രീംകോടതിയില് അഭിഭാഷകനെ മാറ്റി ദേവസ്വം ബോര്ഡ്
ശബരിമല യുവതി പ്രവേശന വിഷയത്തില് സുപ്രീംകോടതിയിലെ നിലപാട് മാറ്റത്തിന് പിന്നാലെ നിയമപോരാട്ടത്തിനായി മുതിര്ന്ന അഭിഭാഷകനെ മാറ്റി തിരുവിതാംകൂര് ദേവസ്വം ബോര്ഡ്. യുവതി പ്രവേശനത്തെ അനുകൂലിച്ച മുതിര്ന്ന അഭിഭാഷകന് രാകേഷ് ദ്വിവേദിയെ മാറ്റിയാണ് ബോര്ഡിന്റെ നിര്ണ്ണായക നീക്കം. പകരം പ്രമുഖ അഭിഭാഷകന് അഭിഷേക് മനു സിംഗ്വി ഇനി ദേവസ്വം ബോര്ഡിന് വേണ്ടി സുപ്രീംകോടതിയില് ഹാജരാകും.
നേരത്തെ യുവതി പ്രവേശനത്തെ അനുകൂലിക്കുന്ന നിലപാടാണ് രാകേഷ് ദ്വിവേദി കോടതിയില് ബോര്ഡിന് വേണ്ടി സ്വീകരിച്ചിരുന്നത്. എന്നാല് കേസില് പുനഃപരിശോധനാ ഹര്ജികള് പരിഗണനയ്ക്ക് വരുമ്പോള് ബോര്ഡിന്റെ പരിഷ്കരിച്ച നിലപാട് ശക്തമായി അവതരിപ്പിക്കാനാണ് സിംഗ്വിയെ നിയോഗിച്ചിരിക്കുന്നത്. ശബരിമലയിലെ ആചാര സംരക്ഷണവുമായി ബന്ധപ്പെട്ട നിയമപരമായ വാദങ്ങളില് സിംഗ്വിയുടെ സാന്നിധ്യം ബോര്ഡിന് ഗുണകരമാകുമെന്നാണ് വിലയിരുത്തല്.
ശ്രദ്ധേയമായ കാര്യം, മുന്പ് ഇതേ വിഷയത്തില് യുവതി പ്രവേശനത്തെ എതിര്ത്ത് കോടതിയില് വാദിച്ച വ്യക്തിയാണ് അഭിഷേക് മനു സിംഗ്വി എന്നതാണ്. ദേവസ്വം ബോര്ഡ് മുന് പ്രസിഡന്റും കോണ്ഗ്രസ് നേതാവുമായിരുന്ന പരേതനായ പ്രയാര് ഗോപാലകൃഷ്ണന് വേണ്ടിയായിരുന്നു അദ്ദേഹം അന്ന് ഹാജരായത്. പഴയ നിലപാടുകളിലേക്ക് ബോര്ഡ് തിരികെ പോകുന്നു എന്ന സൂചനകള്ക്കിടെയാണ് സിംഗ്വിയുടെ ഈ പുനപ്രവേശനം രാഷ്ട്രീയനിയമ വൃത്തങ്ങളില് ചര്ച്ചയാകുന്നത്.
https://www.facebook.com/Malayalivartha
