ശബരിമലയില്‍ പത്തിനും അന്‍പതിനും ഇടയ്ക്ക് പ്രായമുള്ള വനിതകളെ പ്രവേശിപ്പിക്കുന്നത് സംബന്ധിച്ച കാര്യത്തില്‍ ദേവസ്വംബോര്‍ഡിലെ പുതിയ അംഗം കെ.രാഘവന് യോജിപ്പ്. ഈ പ്രായത്തിലുള്ള സ്തീകളെ പ്രവേശിപ്പിക്കണം എന്നാവശ്യപ്പെടുന്ന സര്‍ക്കാരിന്റെ നിലപാടിനൊപ്പമാണ് താനെന്ന് അദ്ദേഹം പത്തനംതിട്ടയില്‍ മാധ്യമങ്ങളോട് പറഞ്ഞു.

തന്നെ ബോര്‍ഡംഗമായി തിരഞ്ഞെടുത്തത് മുഖ്യമന്ത്രി പിണറായി വിജയനും വി.എസ്.അച്യുതാനന്ദനുമൊക്കെയടങ്ങുന്നവരാണ്. അവരുടെ നിലപാടിന് ഒപ്പമായിരിക്കും താന്‍.

സുപ്രീംകോടതിയില്‍ ദേവസ്വം ബോര്‍ഡ് നല്‍കിയിരിക്കുന്ന സത്യവാങ്മൂലത്തിന് എതിരാണല്ലോ അംഗത്തിന്റെ അഭിപ്രായം എന്ന് ചോദിച്ചപ്പോള്‍ തന്റെ അഭിപ്രായമാണ് താന്‍ പറയുന്നതെന്നായിരുന്നു മറുപടി.
ശബരിമല ക്ഷേത്രത്തിന്റെ പേര് ശ്രീ അയ്യപ്പസ്വാമി ക്ഷേത്രം എന്നാക്കി മാറ്റിയതില്‍ അദ്ദേഹം ശക്തമായ എതിര്‍പ്പ് രേഖപ്പെടുത്തി. ഇക്കാര്യത്തില്‍ ബോര്‍ഡിലെ രണ്ടുപേര്‍ മാത്രം ചേര്‍ന്ന് അഭിപ്രായം പറയുന്നത് ശരിയല്ല. മത, സാമൂഹിക, സാംസ്‌കാരിക, ഭക്തപ്രസ്ഥാനങ്ങളും ആചാര്യന്‍മാരുമായി ചര്‍ച്ച ചെയ്ത് വേണം ഇത്തരം കാര്യങ്ങളില്‍ തീരുമാനമെടുക്കാന്‍. തന്റെ വിയോജിപ്പ് രേഖപ്പെടുത്തുന്ന കത്തും ബോര്‍ഡിന് കൈമാറിയതായി അദ്ദേഹം അറിയിച്ചു.
പേരുമാറ്റത്തില്‍ പന്തളം കൊട്ടാരവും തന്ത്രിയും തന്നോട് പറഞ്ഞ കാര്യങ്ങള്‍ ഇപ്പോള്‍ പുറത്തുപറയാന്‍ താല്‍പ്പര്യമില്ല. ആര്‍ക്കും ഇതിനോട് യോജിപ്പില്ലെന്നാണ് മനസ്സിലാകുന്നത്. ശബരിമല വെബ്‌സൈറ്റില്‍ പേര് എങ്ങനെയാണ് ചേര്‍ക്കുന്നതെന്ന് അറിയില്ല. പഴയ പേരല്ലെങ്കില്‍ ഉദ്ഘാടനചടങ്ങില്‍ പങ്കെടുക്കണോ എന്നത് ആലോചിക്കും. ഉത്തരവ് പുനഃപരിശോധിക്കണം എന്നാണ് തന്റെ അഭിപ്രായം അദ്ദേഹം പറഞ്ഞു.
സ്ത്രീപ്രവേശത്തിലും പേരുമാറ്റത്തിലും പ്രസിഡന്റ് പ്രയാര്‍ ഗോപാലകൃഷ്ണനും അംഗം അജയ് തറയിലും സ്വീകരിക്കുന്ന നിലപാടിന് വിപരീതമാണ് രാഘവന്‍ സ്വീകരിക്കുന്നത്. യുവതീപ്രവേശത്തിനെതിരെ ബോര്‍ഡ് തന്നെ പ്രാര്‍ഥനായജ്ഞങ്ങളും നിയമപോരാട്ടവും നടത്തുകയാണ്. പുതിയ അംഗം ഇതിന് ഒപ്പമല്ലെന്നുവരുന്നതോടെ ബോര്‍ഡില്‍ ഭിന്നതയാകും.