നിരവധി മോഷണക്കേസുകളിലെ പ്രതികളായ ഭാര്യയേയും ഭര്‍ത്താവിനേയും ചോറ്റാനിക്കര പോലീസ് അറസ്റ്റ് ചെയ്തു. തിരുവനന്തപുരം കരകുളം ഇരുമ്പ മരുതംകോട് സക്കീനത്ത് ബീവി(ഗായത്രി 50), വാഴക്കുളം എഴിപ്രംമാറംപിള്ളി കാരപ്പറമ്പില്‍ സന്തോഷ് (37) എന്നിവരാണ് അറസ്റ്റിലായത്.

ഹോം നഴ്‌സായി ജോലിക്കെത്തിയാണു ഗായത്രി തട്ടിപ്പിനു കളമൊരുക്കിയിരുന്നത്. പിന്നീട് ഭര്‍ത്താവിന്റെ സഹായത്തോടെ മോഷ്ടിക്കുകയാണു പതിവെന്നാണു പോലീസ് ഭാഷ്യം. തലക്കോട്ടെ ഒരു വീട്ടില്‍ നടത്തിയ മോഷണത്തിന്റെ പേരിലാണ് അറസ്റ്റിലായത്. ഇവിടെനിന്നു വിദേശ കറന്‍സികളുമായാണ് ഇവര്‍ മുങ്ങിയത്. ഇരുവരെയും ചോറ്റാനിക്കര ദേവസ്വം കംഫര്‍ട്ട് സ്‌റ്റേഷനു സമീപം സംശയാസ്പദമായ സാഹചര്യത്തില്‍ പോലീസ് കണ്ടെത്തുകയായിരുന്നു.

വിദേശ കറന്‍സികളെക്കുടാതെ സ്വര്‍ണമാലയും നാല് ഐ ഫോണുകളും കണ്ടെടുത്തു. കേരളത്തില്‍ പല ഭാഗങ്ങളിലായി ബൈക്ക്, ലാപ്‌ടോപ്പ്, പണം തുടങ്ങിയവ മോഷ്ടിച്ച കേസുകളില്‍ ഇവര്‍ പ്രതികളാണെന്നു പോലീസ് പറഞ്ഞു.

തൃപ്പൂണിത്തുറയിലെ ഒരു ഏജന്‍സി മുഖേനയാണ് ഇവര്‍ ജോലി സംഘടിപ്പിച്ചിരുന്നത്. എസ്.ഐ: നീഷ, എ.എസ്.ഐ: നിയാസ്, ജയദീവ്, ശശിധരന്‍, ബിനു തോമസ് എന്നിവരുടെ നേതൃത്വത്തിലുള്ള സംഘമാണു പ്രതികളെ അറസ്റ്റ് ചെയ്തത്. ഇവര്‍ ജോലി ചെയ്തിരുന്ന വീടുകളില്‍നിന്നു മോഷണം നടന്നിട്ടുണ്ടെങ്കില്‍ ചോറ്റാനിക്കര സ്‌റ്റേഷനുമായി ബന്ധപ്പെടണമെന്നു പോലീസ് അറിയിച്ചു.