നിശബ്ദ പ്രചാരണം അവസാനിച്ചു.ഇന്ന് വിധിയെഴുത്ത്. പതിനാറാം നിയമസഭയിലേക്കുള്ള 140 പ്രതിനിധികളെ തെരഞ്ഞെടുക്കാൻ ഇന്ന് ബൂത്തിലേക്ക്.

883 സ്ഥാനാർഥികളെ തിരഞ്ഞെടുക്കാനായി 53984 സർവീസ് വോട്ടർമാർ ഉൾപ്പെടെ 2,71,42,952 സമ്മതിദായകരാണുള്ളത്. ഇന്ന് രാവിലെ 7 മുതൽ വൈകിട്ട് 6 വരെയാണു വോട്ടെടുപ്പ്.

140 മണ്ഡലങ്ങളിലെ 30495 പോളിങ് ബൂത്തുകളിലേക്കുള്ള പോളിങ് സാധനങ്ങളുടെ വിതരണം ഇന്നലെ വൈകിട്ടോടെ പൂർത്തിയായി. ഇവയിൽ 24 എണ്ണം അനുബന്ധ ബൂത്തുകളാണ്. ഒരു ബൂത്തിൽ പരമാവധി 1200 വോട്ടർമാർ എന്ന നിബന്ധന പാലിക്കാനായി കഴിഞ്ഞ ലോക്സഭാ തിരഞ്ഞെടുപ്പിനെ അപേക്ഷിച്ച് അയ്യായിരത്തിലേറെ ബൂത്തുകൾ വർധിപ്പിച്ചതിനാൽ ഇത്തവണ വോട്ടർമാർ ഏറെനേരം ക്യൂ നിൽക്കേണ്ടി വരില്ലെന്ന പ്രതീക്ഷയിലാണു തിരഞ്ഞെടുപ്പ് കമ്മിഷൻ‌. സുരക്ഷാ ഉദ്യോഗസ്ഥരും സജ്ജരാണ്.

കേരളം പത്തുവർഷത്തെ ഭരണനേട്ടങ്ങൾ ഉയർത്തിക്കാട്ടി തുടർഭരണം പ്രതീക്ഷിക്കുകയാണ് ഇടതുമുന്നണി. എന്നാൽ, സർക്കാരിനെതിരായ ഭരണവിരുദ്ധവികാരം അനുകൂലമാകുമെന്നും ഭരണമാറ്റം ഉണ്ടാകുമെന്നുമാണ് യു.ഡി.എഫിന്റെ കണക്കുകൂട്ടൽ. നിയമസഭയിൽ ഒരിക്കൽ പൂട്ടിപ്പോയ അക്കൗണ്ട് തുറക്കാമെന്ന ആത്മവിശ്വാസത്തിലാണ് എൻ.ഡി.എ.

കഠിനമായ ചൂടാണെങ്കിലും ഇത്തവണ പോളിങ് ശതമാനം 85-നു മുകളിലെത്തിക്കാനാണ് തിരഞ്ഞെടുപ്പ് കമ്മിഷന്റെ ശ്രമം. ഉത്സവപ്രതീതിയിലാണ് വോട്ടെടുപ്പ്.

വോട്ടുചെയ്യാൻ വിവിധ തിരിച്ചറിയൽ രേഖകളിൽ ഏതെങ്കിലും ഒന്ന് കരുതേണ്ടതാണ്

• തിരഞ്ഞെടുപ്പു കമ്മിഷൻ നൽകിയ വോട്ടർ ഐ.ഡി. കാർഡ് (എപിക് കാർഡ്)
• ആധാർകാർഡ്
• തൊഴിലുറപ്പ് പദ്ധതിയുടെ തൊഴിൽകാർഡ്
• ഫോട്ടോപതിച്ച ബാങ്കിന്റെയോ പോസ്‌റ്റോഫീസിന്റെയോ പാസ് ബുക്ക്
• സർക്കാർ ജീവനക്കാരുടെ സർവീസ് തിരിച്ചറിയൽകാർഡ്

• കേന്ദ്ര/സംസ്ഥാന സർക്കാർ/പൊതുമേഖലാ സ്ഥാപനങ്ങൾ/പൊതുമേഖലാ ലിമിറ്റഡ് കമ്പനികളും നൽകുന്ന തിരിച്ചറിയൽ കാർഡ്

• എം.പി./എം.എൽ.എ./എം.എൽ.സി. എന്നിവർക്ക് നൽകുന്ന ഔദ്യോഗിക തിരിച്ചറിയൽ കാർഡുകൾ

•  ഭിന്നശേഷി കാർഡ്.
• ഡ്രൈവിങ് ലൈസൻസ്
• ആരോഗ്യ ഇൻഷുറൻസ് സ്മാർട്ട് കാർഡോ ആയുഷ്മാൻ ഭാരത് ഹെൽത്ത് കാർഡോ
• പാൻകാർഡ്
• പാസ്‌പോർട്ട്
• എൻ.പി.ആർ. കാർഡ്
•  ഫോട്ടോപതിച്ച പെൻഷൻരേഖ ഇവയിൽ ഏതെങ്കിലും ഒന്ന് കൈയ്യിൽ കരുതേണ്ടതാണ്.

അതേസമയം അസമിലും പുതുച്ചേരിയിലും ഇന്നാണ് വോട്ടെടുപ്പ്.