ഇന്നലെയാണ് കേന്ദ്ര മന്ത്രി ഗിരിരാജ് സിംങ് കോണ്‍ഗ്രസ് അദ്ധ്യക്ഷ സോണിയാ ഗാന്ധിയ്‌ക്കെതിരെ പ്രസ്താവന ഉന്നയിച്ചത്. ഗിരിരാജ് സിംഗിന് മറുപടിയുമായി സോണിയാ ഗാന്ധി രംഗത്തെത്തി. ഗിരിരാജിന് ഇടുങ്ങിയ ചിന്താഗതിയാണെന്നും അത്തരം ഇടുങ്ങിയ ചിന്താഗതികളുള്ളവര്‍ നടത്തുന്ന പ്രസ്താവനകള്‍ക്ക് മറുപടി പറയേണ്ടതില്ലെന്നും സോണിയ വ്യക്തമാക്കി.

മദ്ധ്യപ്രദേശില്‍ കര്‍ഷകര്‍ക്ക് ഉണ്ടായ നാശനഷ്ടങ്ങള്‍ നേരിട്ട് കണ്ട് മനസിലാക്കാന്‍ എത്തിയപ്പോഴാണ് മറുപടിയുമായി സോണിയ എത്തിയത്. കോണ്‍ഗ്രസ് ഉപാദ്ധ്യക്ഷന്‍ രാഹുല്‍ ഗാന്ധി ഉടന്‍ തന്നെ പാര്‍ട്ടി പ്രവര്‍ത്തനത്തിലേക്ക് മടങ്ങി വരുമെന്നും സോണിയ പറഞ്ഞു. ജനങ്ങള്‍ക്കൊപ്പം രാഹുല്‍ എപ്പോഴും ഉണ്ടാകുമെന്നും സോണിയ വ്യക്തമാക്കി.
രാജീവ് ഗാന്ധി, വെള്ളക്കാരിക്കു പകരം ഒരു നൈജീരിയക്കാരിയെയായിരുന്നു വിവാഹം കഴിച്ചിരുന്നെങ്കില്‍ അവരെ കോണ്‍ഗ്രസ് നേതാവായി അംഗീകരിക്കുമായിരുന്നോ എന്ന് ഒരു സ്വകാര്യ ചടങ്ങില്‍ ഗിരിരാജ് നടത്തിയ പ്രസംഗമാണ് വിവാദമായിരിക്കുന്നത്.

സോണിയയുടെ നേതൃത്വം കോണ്‍ഗ്രസുകാര്‍ അംഗീകരിച്ചത് അവരുടെ വെളുപ്പു നിറം കണ്ടിട്ടാണെന്നാണ് ഗിരിരാജ് സിംങ് പറഞ്ഞത്. പാര്‍ലമെന്റില്‍ പോലും ഹാജരാകാതെ അനിശ്ചിതകാലത്തേക്ക് അവധിയെടുത്ത് പോയ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിക്കെതിരെയും ഗിരിരാജ് സിങ്ങ് വിമര്‍ശനമുയര്‍ത്തി. എവിടെപ്പോയെന്നു പോലും ഇനിയും കണ്ടെത്താനാകാത്ത മലേഷ്യന്‍ എയല്‍ലൈന്‍സ് വിമാനത്തിന്റെ അവസ്ഥ പോലെയാണ് രാഹുലിന്റേത് എന്നായിരുന്നു മന്ത്രിയുടെ പരിഹാസം.

എന്നാല്‍, ഗിരിരാജ് സിങിന്റെ പ്രസ്താവനയെ ബി.ജെ.പി തള്ളിപ്പറിഞ്ഞിരുന്നു. ബി.ജെ.പി ദേശീയ അദ്ധ്യക്ഷന്‍ അമിത് ഷാ ഗിരിരാജിനെ ശാസിക്കുകയും ചെയ്തു. പാര്‍ട്ടിയെ നാണം കെടുത്തുന്ന പ്രസ്താവനകള്‍ നടത്തരുതെന്നും ഷാ നിര്‍ദ്ദേശിച്ചിരുന്നു. എന്നാല്‍ ഇതിന് പിന്നാലെ സിങ് ഖേദം പ്രകടിപ്പിക്കുകയും ചെയ്തു.

ആളുകള്‍ സ്വകാര്യമായി പലതും പറയുമെന്നും തന്റെ പ്രസ്താവന സോണിയയെയും രാഹുലിനെയും വിഷമിപ്പിച്ചെങ്കില്‍ ഖേദം പ്രകടിപ്പിക്കുന്നു എന്നുമായിരുന്നു അദ്ദേഹത്തിന്റെ വിശദീകരണം. കഴിഞ്ഞ വര്‍ഷം ലോക്‌സഭാ തിരഞ്ഞെടുപ്പ് സമയത്ത് പ്രധാനമന്ത്രി നരേന്ദ്ര മോഡിയെ എതിര്‍ക്കുന്നവരെല്ലാം പാക്കിസ്ഥാനിലേക്ക് പോകണമെന്ന് പറഞ്ഞു രംഗത്ത് വന്ന ഗിരിരാജ് സിങ്ങ് വിവാദമുയര്‍ത്തിയിരുന്നു. ഇതിന് പിന്നാലെയാണ് പുതിയൊരു വിവാദം കൂടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha