സിപിഎം പാര്‍ട്ടികോണ്‍ഗ്രസ് നാളെ സമാപിക്കും. എന്നാല്‍ സെക്രട്ടറി ആരാണെന്നുള്ള കാര്യത്തെക്കുറിച്ച് ഇതുവരെ തീരുമാനമായില്ല. എന്നാല്‍ സെക്രട്ടറിസ്ഥാനത്തേക്ക് മത്സരത്തിന് സാധ്യതയുണ്ടെന്ന് റിപ്പോര്‍ട്ടുകളുണ്ട്. പുതിയ സെക്രട്ടറിയെ നിര്‍ദ്ദേശിക്കുന്നത് സ്ഥാനമൊഴിയുന്ന സെക്രട്ടറിയാണെന്നും എന്നാല്‍ കേന്ദ്രകമ്മിറ്റി അംഗങ്ങള്‍ക്കും സെക്രട്ടറിയെ നിര്‍ദ്ദേശിക്കാമെന്നും പിബി അംഗം സീതാറാം യെച്ചൂരി പറഞ്ഞു.
രാഷ്ട്രീയ നയസമീപനങ്ങള്‍ രൂപീകരിച്ചതിലും അവ നടപ്പാക്കിയതിലും പാര്‍ട്ടി നേതൃത്വത്തിന് വീഴ്ച പറ്റിയെന്നും ഇത് പരിഹരിക്കുന്നതിനായി പാര്‍ട്ടി പ്‌ളീനം വിളിച്ചു ചേര്‍ക്കുമെന്നും യെച്ചൂരി വാര്‍ത്താ സമ്മേളനത്തില്‍ അറിയിച്ചു.
പാര്‍ട്ടി കോണ്‍ഗ്രസില്‍ പ്രതിനിധികളില്‍ നിന്നുണ്ടായ വിമര്‍ശനങ്ങളെ സഹിഷ്ണുതയോടെ കാണും. പാര്‍ട്ടി കോണ്‍ഗ്രസിലെ ചര്‍ച്ച കൊണ്ടു മാത്രം അവസാനിക്കുന്ന പ്രകിയ അല്ല സി.പി.എമ്മിന്റേത്. വിമര്‍ശനങ്ങളെ കുറിച്ച് ഗൗരവമായ ചര്‍ച്ച നടത്തുന്നതിന് പ്‌ളീനം വിളിച്ചു ചേര്‍ക്കുമെന്നും യെച്ചൂരി വിശദീകരിച്ചു. പുതിയ ജനറല്‍ സെക്രട്ടറിയെ തിരഞ്ഞെടുക്കുന്നത് സംബന്ധിച്ച നാടകീയത ഉണ്ടാവില്ലെന്നും അദ്ദേഹം ഒരു ചോദ്യത്തിന് മറുപടിയായി പറഞ്ഞു. സാധാരണ നിലവിലെ ജനറല്‍ സെക്രട്ടറിയാണ് പുതിയ സെക്രട്ടറിയെ നിര്‍ദ്ദേശിക്കുന്നത്. എന്നാല്‍ കേന്ദ്ര കമ്മിറ്റി അംഗങ്ങള്‍ക്ക് വേണമെങ്കിലും ജനറല്‍ സെക്രട്ടറിയുടെ സ്ഥാനത്തേക്ക് പേര് നിര്‍ദ്ദേശിക്കാമെന്നും അദ്ദേഹം കൂട്ടിച്ചേര്‍ത്തു.
എന്നാല്‍ കഴിഞ്ഞ ദിവസം സംഘടനാതലത്തില്‍ മാറ്റം വേണമെന്ന് കരട് രാഷ്ട്രീയ പ്രമേയത്തിന്റെ ചര്‍ച്ചയ്ക്കിടെ പ്രതിനിധികള്‍ ആവശ്യപ്പെട്ടിരുന്നു. പഞ്ചാബ്, ഹിമാചല്‍പ്രദേശ്, മഹാരാഷ്ട്ര എന്നിവിടങ്ങളില്‍ നിന്നുള്ള പ്രതിനിധികളാണ് വിമര്‍ശനം ഉന്നയിച്ചത്. യുവാക്കളെ ആകര്‍ഷിക്കാന്‍ പാര്‍ട്ടിക്ക് കഴിയുന്നില്ലെന്നും വിമര്‍ശനമുണ്ടായി. കേന്ദ്ര നേതൃത്വത്തിന് ഉണ്ടായ പിഴവാണ് പാര്‍ട്ടിയെ ഇന്നത്തെ അവസ്ഥയില്‍ എത്തിച്ചത്. 2009 ലും 2014 ലും നടന്ന ലോക്‌സഭാ തിരഞ്ഞെടുപ്പില്‍ പാര്‍ട്ടി, സഖ്യങ്ങള്‍ ഉണ്ടാക്കുന്നതിലും ആ സഖ്യങ്ങള്‍ ജനങ്ങള്‍ക്കു മുന്നില്‍ അവതരിപ്പിക്കുന്നതിലും പരാജയപ്പെട്ടതായും പ്രതിനിധികള്‍ വിമര്‍ശനമുന്നയിച്ചു. പാര്‍ട്ടി സംവിധാനത്തില്‍ തന്നെ പൊളിച്ചെഴുത്തു വേണമെന്നും പ്രതിനിധികള്‍ ആവശ്യപ്പെട്ടു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha