കോണ്‍ഗ്രസ് അപകടകാരിയായി മാറിയിരിക്കുകയാണെന്ന് പ്രധാനമന്ത്രി നരേന്ദ്ര മോദി. അസമിലെ തിരഞ്ഞെടുപ്പ് പ്രചാരണത്തിന്റെ ഭാഗമായി ധേമാജിയിലെ ഗോഗാമുഖില്‍ നടന്ന റാലിയില്‍ പ്രസംഗിക്കുകയായിരുന്നു അദ്ദേഹം. '2014ലെ തിരഞ്ഞെടുപ്പിനു മുന്‍പ്, തങ്ങളുടെ സ്ഥിരം വോട്ട് ബാങ്കിനെ പ്രീണിപ്പിക്കുന്നതിനായി കോണ്‍ഗ്രസ് നേതൃത്വത്തിലുള്ള കേന്ദ്ര സര്‍ക്കാര്‍ വര്‍ഗീയ കലാപ നിയമം കൊണ്ടുവരാന്‍ ശ്രമിച്ചു. കലാപങ്ങള്‍ക്ക് ഉത്തരവാദികള്‍ ഭൂരിപക്ഷ സമുദായമാണെന്നും മതന്യൂനപക്ഷങ്ങള്‍ എപ്പോഴും ഇരകളാണെന്നും വരുത്തിത്തീര്‍ക്കുന്നതായിരുന്നു ആ ബില്ല്. അതുതന്നെ വര്‍ഗീയമായിരുന്നു. ബിജെപിഎന്‍ഡിഎ സഖ്യം അതു പാസാക്കാന്‍ അനുവദിച്ചില്ല. ഇപ്പോള്‍ 12 വര്‍ഷത്തിനു ശേഷം അസം കോണ്‍ഗ്രസ് സമാനമായ നിയമം പ്രഖ്യാപിക്കുകയാണ്. അധികാരം നേടാന്‍ കോണ്‍ഗ്രസ് എന്തും ചെയ്യുമെന്ന് ഇതില്‍ നിന്ന് വ്യക്തമാണ്'– മോദി പറഞ്ഞു.

'അസമില്‍ മൂന്നാം തവണയും ഭരണം ലക്ഷ്യമിടുന്ന ബിജെപി, മതപരമായ സ്വത്വത്തിനൊപ്പം വികസിത ഭാരതം എന്ന ലക്ഷ്യത്തോടെയുള്ള വികസനത്തിനാണ് മുന്‍ഗണന നല്‍കും. 69 വര്‍ഷത്തിനിടെ ബ്രഹ്മപുത്ര നദിക്ക് കുറുകെ കോണ്‍ഗ്രസ് നിര്‍മിച്ചത് 3 പാലങ്ങളാണ്. എന്നാല്‍ കഴിഞ്ഞ 10 വര്‍ഷത്തിനുള്ളില്‍ ബിജെപി സര്‍ക്കാര്‍ അഞ്ച് പ്രധാന പാലങ്ങള്‍ നിര്‍മിച്ചു.

ആറ് പതിറ്റാണ്ടിലെ കോണ്‍ഗ്രസ് ഭരണത്തില്‍ അസമിനു ലഭിച്ചത് 6 മെഡിക്കല്‍ കോളജുകള്‍ മാത്രമാണ്. ഇപ്പോള്‍ സംസ്ഥാനത്ത് 14 എണ്ണമുണ്ട്. 10 എണ്ണത്തിന്റെ പണി നടക്കുന്നു. ബ്രഹ്മപുത്ര നദിക്കടിയിലൂടെ രാജ്യത്തെ ആദ്യത്തെ അണ്ടര്‍ വാട്ടര്‍ റോഡും റെയില്‍വേ ടണലും ഉടന്‍ യാഥാര്‍ഥ്യമാകും. വെള്ളപ്പൊക്കം, മണ്ണൊലിപ്പ് തുടങ്ങിയ പ്രശ്‌നങ്ങള്‍ക്ക് പരിഹാരം കാണാന്‍ ശ്രമിക്കുകയാണ്. ഏകീകൃത സിവില്‍ കോഡ്, ഗോത്ര ആചാരങ്ങളുടെ സംരക്ഷണം എന്നിവയിലൂടെ സ്ത്രീകളുടെ അന്തസും സുരക്ഷയും ഉറപ്പാക്കി' – നരേന്ദ്ര മോദി പറഞ്ഞു.