പിങ്ക് ചായമടിച്ച ആനപ്പുറത്ത് അര്‍ദ്ധ നഗ്‌നയായ മോഡല്‍ ഇരിക്കുന്ന ചിത്രങ്ങള്‍ കഴിഞ്ഞ ദിവസങ്ങളില്‍ സോഷ്യല്‍ മീഡിയയില്‍ വൈറലായിരുന്നു. ഇപ്പോഴിതാ ഫോട്ടോഷൂട്ടില്‍ പങ്കെടുത്ത ചഞ്ചല്‍ എന്ന 65 വയസുള്ള പിടിയാന കഴിഞ്ഞ മാസം ചരിഞ്ഞ വിവരങ്ങളുമായി ചേര്‍ത്ത് വീണ്ടും ചര്‍ച്ചകള്‍ നടക്കുകയാണ്. ധാരാളം പേര്‍ ചിത്രങ്ങളെ അഭിനന്ദിച്ചിരുന്നെങ്കിലും ആനയുടെ ശരീരത്തില്‍ പെയിന്റിടിച്ചതിനെ വിമര്‍ശിച്ച് പലരും രംഗത്തെത്തിയിരുന്നു. മൃഗങ്ങളോടുള്ള ക്രൂരതയാണ് ഇതെന്നാരോപിച്ചാണ് മൃഗസ്‌നേഹികള്‍ അടക്കമുള്ളവര്‍ രംഗത്ത് വന്നത്. റഷ്യന്‍ ഫോട്ടോഗ്രാഫര്‍ ജൂലിയ ബുരുലേവയാണ് ചിത്രങ്ങള്‍ പകര്‍ത്തിയത്.

എന്നാല്‍ ഫോട്ടോഷൂട്ടും ആന ചരിഞ്ഞതും തമ്മില്‍ യാതൊരു ബന്ധവുമില്ലെന്നാണ് ഉടമയും വനംവകുപ്പ് ഉദ്യോഗസ്ഥരും വ്യക്തമാക്കിയിരിക്കുന്നത്. വാര്‍ദ്ധക്യ സഹജമായ കാരണങ്ങളാലാണ് ആന ചരിഞ്ഞതെന്നാണ് വിശദീകരണം. പിങ്ക് നിറം നല്‍കിയ സംഭവം പുറത്തുവന്നതോടെ മൃഗ സംരക്ഷണ സംഘടനയായ പെറ്റ ഇന്ത്യ വിയോജിപ്പുമായി രംഗത്തെത്തിയിരുന്നു.

അതേസമയം ഫോട്ടോ ഷൂട്ട് വെറും 10 മിനിട്ട് മാത്രമാണ് നീണ്ടുനിന്നതെന്നും ഹോളി ആഘോഷങ്ങള്‍ക്ക് ഉപയോഗിക്കുന്ന അപകടമൊന്നും ഇല്ലാത്ത ഗുലാല്‍ പൊടിയാണ് ഉപയോഗിച്ചതെന്നും ആനയുടെ ഉടമയായ സാദിഖ് ഖാന്‍ പിന്നീട് വിശദീകരിച്ചിരുന്നു. അത് ഉടന്‍ തന്നെ കഴുകിക്കളഞ്ഞെന്നും ആനയുടെ ഒരു വശത്ത് മാത്രമാണ് നിറം പൂശിയതെന്നും അദ്ദേഹം വ്യക്തമാക്കുകയും ചെയ്തു.