പൊലീസ് എയ്ഡ് കേന്ദ്രത്തില്‍ വച്ച് മോഡലിനെ ബലാത്സംഗം ചെയ്ത സംഭവത്തില്‍ കൂടുതല്‍ പേര്‍ അറസ്റ്റില്‍. ഒരു സ്ത്രീയടക്കം രണ്ട് പേരെ കൂടിയാണ് ഇന്നലെ പൊലീസ് അറസ്റ്റു ചെയ്തത്. ഇതോടെ കേസില്‍ അറസ്റ്റിലായവരുടെ എണ്ണം എട്ടായി. ഇവരില്‍ മൂന്നുപേര്‍ പൊലീസുകാരാണ്. 28കാരിയായ മോഡലാണ് പരാതിക്കാരി. സഞ്ചരിച്ചിരുന്ന വാഹനം തടഞ്ഞുനിര്‍ത്തി അടുത്തുള്ള പൊലീസ് സേവനകേന്ദ്രത്തിലേക്ക് കൊണ്ടുപോയി പീഡിപ്പിക്കുകയും കൈവശം ഉണ്ടായിരുന്ന അഞ്ച് ലക്ഷത്തോളംരൂപ കവര്‍ച്ച ചെയ്യുകയും ചെയ്തതായി മോഡലിന്റെ പരാതിയില്‍ ആരോപിക്കുന്നു. മുംബൈയിലെ സാക്കിനാക്ക സ്‌റ്റേഷനിലാണ് സംഭവം.
ഈ സംഭവത്തെക്കുറിച്ച് ഏപ്രില്‍ 21ന് പൊലീസ് കമ്മീഷണര്‍ രാകേഷ് മാരിയയ്ക്ക് എസ്.എം.എസ്. വഴി മോഡല്‍ പരാതി അയയ്ക്കുകയായിരുന്നു. പൊലീസ് കമ്മീഷണര്‍ പരാതി എം.ഐ.ഡി.സി. പൊലീസ് സ്‌റ്റേഷനിലേക്ക് കൈമാറി. സുനില്‍ കതാപെ, സുരേഷ് സൂര്യവംശി, യോഗേഷ് പോണ്ടെ എന്നീ പൊലീസുകാരും ജാവേദ് ശൈഖ്, സഞ്ജയ് രംഗെ, തന്‍വീര്‍ ഹഷ്മി, അയേഷ മാള്‍വിയ എന്നിവരുമാണ് അറസ്റ്റിലായവര്‍.
എന്നാല്‍, അസാന്മാര്‍ഗിക പ്രവര്‍ത്തനങ്ങള്‍ക്ക് പിടികൂടിയ യുവതി കള്ളപ്പരാതി ഉന്നയിക്കുകയാണെന്ന് പ്രതികളുടെ അഭിഭാഷകര്‍ കോടതിയില്‍ വാദിച്ചു. മുംബൈയിലെ പഞ്ചനക്ഷത്ര ഹോട്ടലില്‍ ഒരു സിനിമയുടെ ഓഡിഷനില്‍ പങ്കെടുത്ത് മടങ്ങവെയാണ് വനിതാ മോഡലിനെയും സുഹൃത്തിനെയും അനാശാസ്യം ആരോപിച്ച് കസ്റ്റഡിയില്‍ എടുത്തത്... വേശ്യാവൃത്തി നടത്തുന്നതിനാണ് ഇവര്‍ ഹോട്ടലില്‍ എത്തിയതെന്ന് പരാതി ലഭിച്ചിട്ടുണ്ടെന്ന് പറഞ്ഞ് ഇരുവരെയും സ്‌റ്റേഷനില്‍ കൊണ്ടുപോയി. മോഡലിനും സുഹൃത്തിനുമെതിരെ അനാശാസ്യത്തിന് കേസ്സെടുക്കുമെന്നും കേസ്സില്‍ നിന്നും ഒഴിവാകണമെങ്കില്‍ അഞ്ച് ലക്ഷം രൂപ നല്‍കണമെന്നും പൊലീസുകാര്‍ ആവശ്യപ്പെട്ടു.
ഇരുവരും എതിര്‍ത്തെങ്കിലും ഫലമുണ്ടായില്ല. തുടര്‍ന്ന് പണം കണ്ടെത്താന്‍ സുഹൃത്ത് പുറത്ത് പോയ ഇടവേളയിലാണ് മോഡലിനെ പൊലീസുകാര്‍ ചേര്‍ന്ന് സ്‌റ്റേഷനുള്ളില്‍ ബലാല്‍സംഗം ചെയ്തത്. കൈയിലെ സ്വര്‍ണ്ണാഭരണങ്ങളും ഊരി വാങ്ങി. സുഹൃത്ത് രാത്രിയില്‍ നിരവധി എ.ടി.എമ്മുകളില്‍ കയറി പണം എടുത്ത ശേഷം തിരികെ സ്‌റ്റേഷനില്‍ വന്ന് പൊലീസിന് പണം നല്‍കി. തുടര്‍ന്നാണ് ഇരുവരെയും പൊലീസ് വിട്ടയച്ചത്. എന്നാല്‍ പെണ്‍കുട്ടി കഴിഞ്ഞ ദിവസം കമ്മീഷണര്‍ക്ക് എസ്എംഎസ് സന്ദേശം അയച്ചതോടെയാണ് ഈ വിവരം പുറത്തറിഞ്ഞത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha