ദേശീയ സുരക്ഷാ നിയമം ചുമത്തി യുപി സര്ക്കാര് ജയിലിലടച്ച ഡോ. കഫീല് ഖാനെ ഹൈക്കോടതി ഉത്തരവിനെത്തുടര്ന്നു വിട്ടയച്ചു
ദേശീയ സുരക്ഷാ നിയമം ചുമത്തി യുപി സര്ക്കാര് ജയിലിലടച്ച ഡോ. കഫീല് ഖാനെ ഹൈക്കോടതി ഉത്തരവിനെത്തുടര്ന്നു വിട്ടയച്ചു. ഇന്നലെ രാത്രി വൈകിയാണു മഥുര ജയിലില്നിന്നു വിട്ടയച്ചത്. ഡോ. കഫീല് ഖാനുമേല് നിയമവിരുദ്ധമായി ചുമത്തിയ ദേശസുരക്ഷ നിയമം (എന്.എസ്.എ) റദ്ദാക്കിയാണ് അലഹബാദ് ഹൈകോടതിയുടെ വിധി.
കഫീല് ഖാനെതിരെ ആരോപിച്ച കുറ്റങ്ങള് നിലനില്ക്കാത്തതും കേസുകള് അനാവശ്യവുമാണെന്നും ചീഫ് ജസ്റ്റിസ് ഗോവിന്ദ് മാഥൂര് അധ്യക്ഷനായ ബെഞ്ച് വ്യക്തമാക്കി. എന്.എസ്.എ ചുമത്തിയതുതന്നെ നിയമവിരുദ്ധമാണെന്ന് വ്യക്തമാക്കിയ ബെഞ്ച് രണ്ടാഴ്ച മുമ്ബ് ഉത്തര്പ്രദേശിലെ യോഗി സര്ക്കാര് കഫീലിന്റെ തടങ്കല് മൂന്നു മാസം കൂടി ദീര്ഘിപ്പിച്ചതും എടുത്തുകളഞ്ഞു. തനിക്കെതിരെ ഉന്നയിച്ച കുറ്റാരോപണങ്ങളില് സ്വന്തംഭാഗം പറയാന് ഒരവസരം കഫീല് ഖാന് കൊടുത്തില്ലെന്ന് ഹൈകോടതി കുറ്റപ്പെടുത്തി. ഡോ. ഖാന് അലിഗഡ് യൂണിവേഴ്സിറ്റിയില് നടത്തിയ പ്രസംഗത്തില് നിന്ന് 'വേണ്ടതുമാത്രം' ആണ് ജില്ലാ മജിസ്ട്രേട്ട് വായിച്ചെടുത്തതെന്നു നേരത്തേ ഹൈക്കോടതി വിമര്ശിച്ചു.
2019 ഡിസംബര് 13ന് അലീഗഢ് മുസ്ലിം സര്വകലാശാലയില് സി.എ.എ വിരുദ്ധ സമരത്തില് ഡോ. കഫീല് ഖാന് നടത്തിയ പ്രസംഗത്തിന്റെ പേരിലായിരുന്നു ദേശസുരക്ഷ നിയമപ്രകാരം ഏഴുമാസം തടവിലിട്ടത്. പൂര്ണമായി വായിച്ചാല് പ്രസംഗം വിദ്വേഷവും അക്രമവും പ്രോത്സാഹിപ്പിക്കുന്നതല്ലെന്നും ദേശീയ ഉദ്ഗ്രഥനത്തിന് ആഹ്വാനം ചെയ്യുന്നതാണെന്നും മനസ്സിലാവുമെന്ന് ചീഫ് ജസ്റ്റിസ് ഗോവിന്ദ് മാഥുര്, ജസ്റ്റിസ് സൗമിത്ര ദയാല് സിങ് എന്നിവരടങ്ങുന്ന ബെഞ്ച് പറഞ്ഞു. കഫീല് ഖാന്റെ മാതാവ് നുസ്റത്ത് പര്വീണ് നല്കിയ ഹര്ജി ആണ് കോടതി പരിഗണിച്ചത്. ഫെബ്രുവരിയില് കോടതി ജാമ്യം നല്കിയെങ്കിലും വിട്ടയയ്ക്കുന്നതിനു പകരം എന്എസ്എ ചുമത്തി വീണ്ടും അന്യായമായി തടങ്കലില് വച്ചതായി ഹര്ജിയില് മാതാവ് ചൂണ്ടിക്കാട്ടി.
ഡിസംബര് 12ന് ആയിരുന്നു പ്രസംഗം. ഫെബ്രുവരി 13 വരെ ആരും അതില് പ്രകോപനം കണ്ടെത്തിയില്ല. സിജെഎം കോടതി ജാമ്യം നല്കിയപ്പോഴാണ് പൊലീസും ജില്ലാ മജിസ്ട്രേട്ടും എന്എസ്എ ചുമത്തിയതെന്ന് കോടതി എടുത്തുപറഞ്ഞു.
"
https://www.facebook.com/Malayalivartha
