നാഗാലാന്‍ഡില്‍ തീവ്രവാദി ആക്രമണത്തില്‍ എട്ടു ജവാന്മാര്‍ കൊല്ലപ്പെട്ടു. ആറുപേര്‍ക്ക് ഗുരുതരപരിക്കേറ്റു. നാല് അര്‍ധസൈനികരെ കാണാതായി. ഒരു തീവ്രവാദിയും കൊല്ലപ്പെട്ടിട്ടുണ്ട്. മോണ്‍ ജില്ലയില്‍ ഞായറാഴ്ച ഉച്ചകഴിഞ്ഞായിരുന്നു ആക്രമണം. 23 അസം റൈഫ്ള്‍സിലെ ജവാന്മാരാണ് കൊല്ലപ്പെട്ടത്. ഏകീകൃത നാഗാലാന്‍ഡ് ആവശ്യപ്പെടുന്ന നാഷനല്‍ സോഷ്യലിസ്റ്റ് കൗണ്‍സില്‍ ഓഫ് നാഗാലാന്‍ഡ്ഖാപ്ലാങ് (എന്‍.എസ്.സി.എന്‍കെ) വിഘടനവാദികളാണ് ആക്രമണത്തിനു പിന്നിലെന്ന് സംശയിക്കുന്നതായി സൈനികവൃത്തങ്ങള്‍ പറഞ്ഞു. ഉച്ചക്ക് 2.30ഓടെ ചങ്ങലാങ്‌സു വില്‌ളേജിലെ അരുവിയില്‍നിന്ന് വെള്ളം ശേഖരിക്കാനായി ട്രക്കില്‍ പോയ 18 ജവാന്മാരാണ് ആക്രമിക്കപ്പെട്ടത്. മൂന്ന് ജവാന്മാര്‍ സംഭവ സ്ഥലത്തുതന്നെ കൊല്ലപ്പെട്ടു.

ജവാന്മാര്‍ നടത്തിയ പ്രത്യാക്രമണത്തിലാണ് തീവ്രവാദി കൊല്ലപ്പെട്ടത്. 15 വര്‍ഷംമുമ്പ് കേന്ദ്രസര്‍ക്കാറുമായി ഉണ്ടാക്കിയ വെടിനിര്‍ത്തല്‍ കരാറില്‍നിന്ന് കഴിഞ്ഞമാസം പിന്‍വാങ്ങിയശേഷം എന്‍.എസ്.സി.എന്‍ (കെ)യുടെ ഭാഗത്തുനിന്ന് ഉണ്ടാവുന്ന രണ്ടാമത്തെ ആക്രമണമാണിത്. അരുണാചല്‍പ്രദേശിലെ തിരാപ് ജില്ലയില്‍ ഏപ്രില്‍ രണ്ടിന് നടന്ന ആക്രമണത്തില്‍ മൂന്നു സൈനികര്‍ കൊല്ലപ്പെടുകയും മൂന്നുപേര്‍ക്ക് പരിക്കേല്‍ക്കുകയും ചെയ്തിരുന്നു. ശനിയാഴ്ച സൈന്യവുമായുള്ള ഏറ്റുമുട്ടലില്‍ നാലു തീവ്രവാദികളും മരിച്ചിരുന്നു. വെടിനിര്‍ത്തല്‍ കരാര്‍ നീട്ടാന്‍ അടുത്തിടെ കേന്ദ്രസര്‍ക്കാറും വിസമ്മതിച്ചിരുന്നു. എന്‍.എസ്.സി.എന്‍ കെയുമായി നാഗാ വിഷയത്തില്‍ ഇനി ചര്‍ച്ചയില്‌ളെന്നും കേന്ദ്ര ആഭ്യന്തരമന്ത്രാലയം വെളിപ്പെടുത്തിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha