95 വയസ്സായ ആ സ്വാമിജിയുടെ വാക്കാണ് നരേന്ദ്ര മോഡിക്ക് എല്ലാം. കൊല്‍ക്കത്തയിലെ ബേലൂര്‍ മഠിലുള്ള രാമകൃഷ്ണ മിഷന്‍ ആശ്രമത്തിലെ സന്യാസി ശ്രേഷ്ഠനായ സ്വാമി ആത്മസ്ഥാനന്ദയാണ് മോഡിയുടെ വളര്‍ച്ചയ്ക്ക് പിന്നിലുള്ള ശക്തി കേന്ദ്രം.
കൊല്‍ക്കത്തയിലെത്തിയാല്‍ മോഡി ബേലൂര്‍ മഠത്തില്‍ പോകാറുണ്ട്. ഏറ്റവുമൊടുവില്‍ പോയത് 2013ലാണ്. ഗുജറാത്ത് മുഖ്യമന്ത്രിയായിരുന്നു അപ്പോള്‍ മോഡിയെങ്കിലും, പോയത് ലോക്‌സഭാ തെരഞ്ഞെടുപ്പിന് മുന്നോടിയായി അനുഗ്രഹം തേടിയാണ്. 
2014 മെയ് 26ന് പ്രധാനമന്ത്രിയായി മോഡി സത്യപ്രതിജ്ഞ ചെയ്തപ്പോള്‍ അദ്ദേഹം ധരിച്ചിരുന്ന കോട്ടിന്റെ പോക്കറ്റില്‍ ഒരു പൂവ് ഉണ്ടായിരുന്നു. ബേലൂര്‍ മഠത്തില്‍നിന്ന് ആത്മസ്ഥാനന്ദ അനുഗ്രഹിച്ച് അയച്ചുകൊടുത്തതായിരുന്നു ആ പൂവ്. നരേന്ദ്ര ഭായ് എന്ന് സംബോധന ചെയ്തുകൊണ്ടുള്ള ഒരു കത്തും പൂവിനൊപ്പമുണ്ടായിരുന്നു.
ആത്മസ്ഥാനന്ദയും മോഡിയുമായുള്ള ബന്ധത്തിന് ഏറെ വര്‍ഷത്തെ പഴക്കമുണ്ട്. 1966ല്‍ രാമകൃഷ്ണ മിഷന്റെ ഗുജറാത്തിലെ രാജ്‌കോട്ടിലുള്ള ആശ്രമത്തിന്റെ ചുമതലക്കാരനായി ആത്മസ്ഥാനന്ദ എത്തിയപ്പോള്‍ മുതല്‍ക്കുള്ളതാണ് ആ ബന്ധം. സ്വാമി വിവേകാനന്ദനില്‍ ആകൃഷ്ടനായ നരേന്ദ്ര മോഡിയെന്ന യുവാവ് ഈ ആശ്രമത്തില്‍ അഭയം തേടിയെത്തി.
തനിക്ക് സന്യാസിയാകണമെന്ന ആഗ്രഹം ആത്മസ്ഥാനന്ദയ്ക്ക് മുന്നില്‍ മോഡി അവതരിപ്പിച്ചെങ്കിലും, രാജ്‌കോട്ടിലെ ആശ്രമത്തിന് സന്യാസി ദീക്ഷ നല്‍കാനുള്ള അധികാരമുണ്ടായിരുന്നില്ല. ബേലൂര്‍ മഠത്തിലെ അന്നത്തെ മുഖ്യ സന്യാസി മാധവാനന്ദയ്ക്കുള്ള ഒരു കത്തുമായി മോഡിയെ അദ്ദേഹം കൊല്‍ക്കത്തയ്ക്ക് അയച്ചു. എന്നാല്‍, സന്യാസമല്ല, ജനങ്ങള്‍ക്കിടയില്‍ പ്രവര്‍ത്തിക്കാനാണ് നിയോഗമെന്ന് പറഞ്ഞ് മാധവാനന്ദ മോഡിയുടെ ആവശ്യം നിരാകരിച്ചു.
തിരികെ രാജ്‌കോട്ടിലെത്തിയ മോഡി കുറച്ചുനാള്‍ കൂടി ആത്മസ്ഥാനന്ദയ്‌ക്കൊപ്പം ആശ്രമത്തില്‍ കഴിഞ്ഞു. പിന്നീട് രാഷ്ട്രീയ സ്വയം സേവക് സംഘത്തില്‍ ചേരുകയായിരുന്നു. ഭാവിയില്‍ പലതവണ ആത്മസ്ഥാനന്ദയുടെ അനുഗ്രഹം തേടി മോഡിയെത്തിയിട്ടുണ്ട്. 
ഇക്കുറി ആശുപത്രിയിലെത്തിയാകും മോദി ആത്മസ്ഥാനന്ദയെ സന്ദര്‍ശിക്കുക. ഫെബ്രുവരി മുതല്‍ ചികിത്സയിലാണ് ഈ സന്യാസി വര്യന്‍. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha