തന്റെ സുരക്ഷാ ക്രമീകരണങ്ങളുമായി ബന്ധപ്പെട്ട വിവരങ്ങള്‍ നല്‍കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോഡിയുടെ ഭാര്യ യശോദാബെന്‍ വീണ്ടും രംഗത്ത്. സമാന വിഷയത്തില്‍ നാലു മാസങ്ങള്‍ക്കു മുമ്പ് താന്‍ നല്‍കിയ വിവരാവകാശ അപേക്ഷ തള്ളിയ അധികൃതര്‍ വിഷയത്തില്‍ സ്വീകരിച്ച തുടര്‍നടപടികളെ കുറിച്ച് വ്യക്തമാക്കണമെന്നാണ് പുതിയ അപേക്ഷയില്‍ ആവശ്യപ്പെട്ടിരിക്കുന്നത്. സംസ്ഥാന വിവരാവകാശ കമ്മീഷണര്‍ മുമ്പാകെയാണ് വിവരാവകാശ നിയമ പ്രകാരമുള്ള അപേക്ഷ യശോദാബെന്‍ സമര്‍പ്പിച്ചത്.
2014 നവംബറിലാണ് പ്രധാനമന്ത്രിയുടെ ഭാര്യയെന്ന നിലയില്‍ തനിക്ക് നിയമപ്രകാരം അനുവദിച്ചിട്ടുള്ള സുരക്ഷാ ക്രമീകരണങ്ങളുടെ വിശദ വിവരം ആവശ്യപ്പെട്ട് യശോദാബെന്‍ ആദ്യമായി രംഗത്തെത്തിയത്. തുടര്‍ന്ന് അവര്‍ വിവരാവകാശ നിയമപ്രകാരം മെഹ്‌സാനാ പോലീസില്‍ അപേക്ഷ നല്‍കി. എന്നാല്‍ വിഷയം ലോക്കല്‍ ഇന്റലിജന്‍സ് ബ്യൂറോയുടെ കീഴില്‍ വരുന്നതാണെന്നു ചൂണ്ടിക്കാട്ടി പോലീസ് അപേക്ഷ തള്ളി. വിഷയം ചൂണ്ടിക്കാട്ടി ജില്ലാ പോലീസ് മേധാവിക്ക് യശോദാബെന്‍ നല്‍കിയ അപേക്ഷയും നിരസിക്കിപ്പെട്ടു. ഈ സാഹചര്യത്തിലാണ് യശോദാബെന്‍ സംസ്ഥാന വിവരാവകാശ കമ്മീഷണറെ സമീപിച്ചിരിക്കുന്നത്.
പ്രധാനമന്ത്രിയുടെ ഭാര്യയെന്ന നിലയില്‍ പത്ത് പോലീസ് ഉദ്യോഗസ്ഥരെയാണ് മെഹ്‌സാനാ പോലീസ് യശോദാബെന്നിന്റെ സുരക്ഷയ്ക്കായി നിലവില്‍ അനുവദിച്ചിരിക്കുന്നത്. ഇതില്‍ ആര്‍മിഡ് ഉദ്യോഗസ്ഥരും ഉള്‍പ്പെടുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha