ഇന്ത്യ സൈന്യത്തിന് ആരാധകര്‍ അങ്ങ് പാക്കിസ്ഥാനിലും. പാക് മാധ്യമങ്ങളില്‍ ചര്‍ച്ചയാകുന്ന ഇന്ത്യന്‍ സൈന്യത്തിന്റെ ഹൃദയ വിശാലതയുടെയും കരുതലിന്റെയും കഥ ഇങ്ങനെ. പാക് അധിനിവേശ കാശ്മീരില്‍ നിന്ന് അബദ്ധത്തില്‍ അതിര്‍ത്തി കടന്ന് രണ്ടു പെണ്‍കുട്ടികള്‍ അടുത്തിടെ ഇന്ത്യയുടെ ഭാഗത്ത് എത്തിയിരുന്നു. അതിര്‍ത്തിക്ക് അപ്പുറത്തുള്ള അബ്ബാസ്പൂര്‍ ഗ്രാമത്തില്‍ നിന്നുള്ളവരാണ് പെണ്‍കുട്ടികളെന്ന് സൈന്യത്തിന്റെ അന്വേഷണത്തില്‍ വ്യക്തമായിരുന്നു. 17കാരിയായ ലൈബ സബെയര്‍, 13 കാരിയായ സന സബെയര്‍ എന്നിവരാണ് അശ്രദ്ധമായി അതിര്‍ത്തി കടന്നത് . തുടര്‍ന്ന് ഇരുവര്‍ക്കും പ്രത്യേക സുരക്ഷ ഏര്‍പ്പെടുത്തി സുരക്ഷിതമായി ഇന്ത്യന്‍ സൈന്യം രക്ഷപ്പെടുത്തി തിരികെ അയച്ചു. കൈ നിറയെ സമ്മാനങ്ങള്‍ നല്‍കിയാണ് ഇന്ത്യ പാക് സഹോദരിമാരെ യാത്രയാക്കിയത്.

തിരിച്ച് പാകിസ്ഥാനിലെത്തിയ പെണ്‍കുട്ടികളുടെ വാക്കുകള്‍ ഇങ്ങനെ 'ഞങ്ങള്‍ക്ക് വഴി തെറ്റി അബദ്ധവശാല്‍ അതിര്‍ത്തി കടന്ന് ഇന്ത്യയിലേക്ക് എത്തുകയായിരുന്നു. അവിടെയുള്ള സൈനികര്‍ ഞങ്ങളെ തല്ലുമെന്ന് ഞങ്ങള്‍ ഭയപ്പെട്ടു. എന്നാല്‍ അവരെല്ലാവരും ഞങ്ങളുമായി നല്ല ബന്ധം പുലര്‍ത്തുകയും ഞങ്ങള്‍ക്ക് ഭക്ഷണവും താമസിക്കാനുള്ള സ്ഥലവും നല്‍കി. ഞങ്ങളെ തിരികെ അയക്കാന്‍ എല്ലാവരും നിരന്തരം ശ്രമിച്ചുകൊണ്ടിരുന്നു. ആദ്യം അവര്‍ ഞങ്ങളെ വീട്ടിലേക്ക് പോകാന്‍ അനുവദിക്കില്ലെന്നാണ് ഞങ്ങള്‍ കരുതിയത്, അവര്‍ ശരിക്കും നല്ലവരാണ്. ' ഇങ്ങനെ പോകുന്നു പെണ്‍കുട്ടികളുടെ വാക്കുകള്‍. ഇരുപത്തിനാല് മണിക്കൂറോളം ഈ പെണ്‍കുട്ടികള്‍ ഇന്ത്യന്‍ സൈന്യത്തിന്റെ സംരക്ഷണയിലായിരുന്നു.

അതേസമയം അന്വേഷണത്തില്‍ ഇന്ത്യന്‍ സൈനിക ഉദ്യോഗസ്ഥര്‍ക്ക് പെണ്‍കുട്ടികളുടെ ദയനീയ ജീവിതത്തെ കുറിച്ചുള്ള വിവരമാണ് ലഭിച്ചത്. ആറു മാസം മുന്‍പ് പെണ്‍കുട്ടികളുടെ പിതാവ് മരണപ്പെട്ടുവെന്നും, അതിന് ശേഷം കുടുംബത്തില്‍ എന്നും കലഹമായിരുന്നുവെന്നുമാണ് പാകിസ്ഥാന്‍ പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തത്. ഇന്ത്യന്‍ സൈനികരുടെ കരുതലിന് ഇപ്പോള്‍ പാകിസ്ഥാനില്‍ ആരാധകര്‍ ഏറുകയാണ്. യുദ്ധ സമയത്തെ വീര്യവും സമാധാനകാലത്തെ സംയമനത്തിലും അച്ചടക്കത്തിലും ഇന്ത്യന്‍ സൈനികര്‍ ഒരു പടി മുന്നിലാണ്.