മരിച്ചുപോയ സഹോദരിയുടെ ബാങ്ക് അക്കൗണ്ടിലെ തുക പിന്‍വലിക്കാന്‍ എത്തിയപ്പോള്‍ അക്കൗണ്ട് ഉടമ നേരിട്ട് വരണമെന്ന് പറഞ്ഞതിന് അസ്ഥികൂടം ബാങ്കില്‍ ഹാജരാക്കി വയോധികന്‍. ഒഡിഷയിലെ ക്യോന്‍ജര്‍ ജില്ലയിലെ പട്ടാനയിലാണ് സംഭവം. ജീതു മുണ്ട എന്ന ആദിവാസി വയോധികനാണ് പണം വിട്ടുകിട്ടാനായി 'കടുംകൈ' ചെയ്യേണ്ടി വന്നത്. ജീതുവിന്റെ സഹോദരി കല്‍റ മുണ്ടയ്ക്ക് പട്ടാനയിലെ മാലിപോസിയിലുള്ള ഗ്രാമീണ്‍ ബാങ്ക് ശാഖയില്‍ അക്കൗണ്ടുണ്ടായിരുന്നു. ഈ വര്‍ഷം ജനുവരി 26ന് കല്‍റ മരിച്ചു. ഇതിനുശേഷം കല്‍റയുടെ അക്കൗണ്ടിലുണ്ടായിരുന്ന 20,000 രൂപ പിന്‍വലിക്കാന്‍ ജീതു ബാങ്കിനെ സമീപിച്ചിരുന്നു. എന്നാല്‍ അക്കൗണ്ട് ഉടമ നേരിട്ടു ഹാജരായാലേ പണം പിന്‍വലിക്കാനാകൂ എന്ന് ബാങ്ക് അധികൃതര്‍ ജീതുവിനെ അറിയിച്ചു. സഹോദരി മരിച്ചെന്ന് ജീതു പറഞ്ഞിട്ടും അധികൃതര്‍ കേള്‍ക്കാന്‍ തയാറായില്ല. തുടര്‍ന്ന് പലതവണ ജീതു ബാങ്കിലെത്തിയെങ്കിലും അധികൃതര്‍ ഇതേ മറുപടി ആവര്‍ത്തിച്ചു. ഒടുവില്‍ സഹോദരിയുടെ അസ്ഥികൂടവുമായി ജീതു ബാങ്കിലെത്തുകയായിരുന്നു.

'ഞാന്‍ ഒരുപാട് തവണ ബാങ്കിനെ സമീപിച്ചു. അക്കൗണ്ട് ഉടമ നേരിട്ടു വരണമെന്നാണ് അവിടുത്തെ ആളുകള്‍ പറഞ്ഞത്. സഹോദരി മരിച്ചുപോയെന്ന് പറഞ്ഞിട്ടും കേള്‍ക്കാന്‍ തയാറാകാതെ അവര്‍ നേരിട്ടു വന്നാലേ പണം നല്‍കൂയെന്ന് ബാങ്കുകാര്‍ ആവര്‍ത്തിച്ചു. ഇതുകേട്ട് ദേഷ്യം വന്നതോടെ സഹോദരിയുടെ കുഴിമാടത്തില്‍ അസ്ഥികൂടം കുഴിച്ചെടുത്ത് ബാങ്കില്‍ തെളിവിനായി കൊണ്ടുവന്നതാണ്'–നിരക്ഷരനായ ജീതു മാധ്യമങ്ങളോടു പറഞ്ഞു.

അതേസമയം, പണം പിന്‍വലിക്കാനുള്ള വ്യവസ്ഥകളെക്കുറിച്ചും നോമിനിയെക്കുറിച്ചും ജീതുവിനെ പറഞ്ഞു മനസ്സിലാക്കാന്‍ ബാങ്ക് അധികൃതര്‍ ശ്രമിച്ചിട്ടും അതിന് സാധിച്ചില്ലെന്ന് പട്ടാന പൊലീസ് ഇന്‍സ്‌പെക്ടര്‍ കിരണ്‍ പ്രസാദ് സാഹു പറഞ്ഞു. കല്‍റയുടെ നോമിനിയും മരിച്ചുപോയ സാഹചര്യത്തില്‍, ഏക അവകാശി എന്ന നിലയില്‍ ജീതുവിന് പണം കൈമാറാനുള്ള നടപടികള്‍ ബാങ്കുമായി ബന്ധപ്പെട്ട് സ്വീകരിക്കുമെന്നും അദ്ദേഹം കൂട്ടിച്ചേര്‍ത്തു.