കോവിഡ് വാക്‌സിന്റെ അടിയന്തര ഉപയോഗത്തിന് അനുമതി തേടിക്കൊണ്ടുള്ള സെറം ഇന്‍സ്റ്റിറ്റ്യൂട്ടിന്റേയും ഭാരത് ബയോടെകിന്റേയും അപേക്ഷകള്‍ വിദഗ്ധ സമിതി തള്ളിയെന്ന മാദ്ധ്യമ വാര്‍ത്തകള്‍ വ്യാജമെന്ന് കേന്ദ്ര ആരോഗ്യ കുടുംബക്ഷേമ മന്ത്രാലയം.

മതിയായ സുരക്ഷയും ആവശ്യമായ തെളിവുകളും ഇല്ലാത്തതിനാലാണ് അപേക്ഷകള്‍ തള്ളിയത് എന്നതരത്തിലായിരുന്നു വ്യാജവാര്‍ത്തകള്‍ പ്രചരിച്ചിരുന്നത്. അതേസമയം വാക്‌സിന്‍ ഉപയോഗം സംബന്ധിച്ച കൂടുതല്‍ വിവരങ്ങള്‍ സമര്‍പ്പിക്കാനാണ് വിദഗ്ധ സംഘം കമ്ബനികളോട് ആവശ്യപ്പെട്ടതെന്നാണ് റിപ്പോര്‍ട്ട്. ഭാരത് ബയോടെക്, സെറം ഇന്‍സ്റ്റിറ്റ്യൂട്ട്, ഫൈസര്‍ എന്നീ കമ്ബനികളുടെ കൊറോണ വാക്‌സിന് അംഗീകാരം നല്‍കാനായി ചേര്‍ന്ന വിദഗ്ധ സമിതി യോഗത്തിലാണ് നിര്‍ദ്ദേശം. സെന്‍ട്രല്‍ ഡ്രഗ്‌സ് സ്റ്റാന്‍ഡേര്‍ഡ് കണ്‍ട്രോള്‍ ഓര്‍ഗനൈസേഷന്‍ അഞ്ചു മണിക്കൂറോളം നേരമാണ് വാക്‌സിനുകള്‍ പരിശോധിച്ചത്. അതേസമയം ഫൈസര്‍ സമര്‍പ്പിച്ച അപേക്ഷ സമിതി ഇന്ന് പരിഗണിച്ചില്ല.

കൊവാക്‌സിന്റെ ഒന്നു രണ്ടും ഘട്ട പരീക്ഷണങ്ങള്‍ സംബന്ധിച്ച വിവരങ്ങളാണ് ഭാരത് ബയോടെക് ഹാജരാക്കിയിരുന്നത്. മൂന്നാംഘട്ട പരീക്ഷണത്തിനുള്ള വാക്‌സിന്‍ ഫലപ്രാപ്തി വിശദീകരിക്കാനായി ഭാരത് ബയോടെക് കൂടുതല്‍ സമയം തേടിയിട്ടുണ്ട്.