രണ്ട് ദിവസത്തെ സന്ദര്‍ശനത്തിനായി ബുധനാഴ്​ച ബംഗാളിലെത്തിയ ബി.ജെ.പി ദേശീയ അധ്യക്ഷന്‍ ജെ.പി. നദ്ദയുടെ വാഹനവ്യൂഹത്തിന് നേരെ ആക്രമണം. പാര്‍ട്ടിപ്രവര്‍ത്തകരുടെ യോഗത്തില്‍ പ​ങ്കെടുക്കാന്‍​ സൗത്ത് 24 പാര്‍ഗനാസ് ജില്ലയിലെ ഡയമണ്ട് ഹാര്‍ബറിലേക്കുള്ള യാത്രക്കിടയിലാണ് കല്ലേറുണ്ടായത്. ബി.ജെ.പി ജന. സെക്രട്ടറി കൈലാഷ്​ വിജയ്​വര്‍ഗിയ ഉള്‍പ്പെടെ നിരവധിപേര്‍ക്ക്​ പരിക്കേറ്റതായി പാര്‍ട്ടിവൃത്തങ്ങള്‍ പറഞ്ഞു. എന്നാല്‍, ബുള്ളറ്റ്​പ്രൂഫ്​ കാറിലായിരുന്ന നദ്ദക്ക്​ പരിക്കില്ല. ദുര്‍ഗാദേവിയുടെ അനുഗ്രഹം കൊണ്ടാണ്​ രക്ഷപ്പെട്ടതെന്ന്​ നദ്ദ പ്രതികരിച്ചു.

ആക്രമണത്തിന് പിന്നില്‍ തൃണമൂല്‍ കോണ്‍ഗ്രസാണെന്ന് ബി.ജെ.പി ആരോപിച്ചു. അസഹിഷ്ണുത നിറഞ്ഞ സംസ്ഥാനമായി ബംഗാള്‍ മാറിയെന്ന്​ ജെ.പി. നദ്ദ പ്രതികരിച്ചു. മമത സര്‍ക്കാറിന് അധികകാലം നിലനില്‍പില്ലെന്നും ഗുണ്ടാരാജ് അവസാനിപ്പിക്കുമെന്നും നദ്ദ വ്യക്തമാക്കി.

സുരക്ഷാവീഴ്ച ചൂണ്ടിക്കാട്ടി കേന്ദ്ര ആഭ്യന്തര മന്ത്രി അമിത് ഷാക്കും സംസ്ഥാന സര്‍ക്കാറിനും കത്തയച്ചിട്ടുണ്ടെന്ന്​ ബംഗാളിലെ ബി.ജെ.പി നേതാവ്​ ദിലീപ് ഘോഷ് വ്യക്തമാക്കി. സംഭവത്തില്‍ കേന്ദ്ര ആഭ്യന്തര മന്ത്രാലയം സംസ്ഥാന സര്‍ക്കാറിനോട് റിപ്പോര്‍ട്ട് തേടിയിട്ടുണ്ട്. 'സ്​പോണ്‍സേഡ്​ വയലന്‍സ്​' എന്നാണ്​ അമിത്​ഷാ സംഭവത്തെ വിശേഷിപ്പിച്ചത്​.

നദ്ദക്കെതിരായ ആക്രമണത്തില്‍ ഗവര്‍ണര്‍ ജഗ്​ദീപ്​ ധന്‍ഖര്‍ ആശങ്ക പ്രകടിപ്പിച്ചു. ക്രമസമാധാന തകര്‍ച്ചക്കെതിരെ ജാഗ്രത പാലിക്കാന്‍ ചീഫ്​ സെ​ക്രട്ടറിയോടും പൊലീസ്​ മേധാവിയോടും ഗവര്‍ണര്‍ നിര്‍ദേശിച്ചു. അതേസമയം, ആരോപണം തൃണമൂല്‍ കോണ്‍ഗ്രസ് നിഷേധിച്ചു. പാര്‍ട്ടിക്ക് പങ്കില്ലെന്നും ബി.ജെ.പിയുടെ ഗുണ്ടകളാണ് അക്രമണത്തിന് പിന്നിലെന്നും ടി.എം.സി നേതാവ് മദന്‍ മിത്ര പറഞ്ഞു.