മരിക്കാന് അനുവദിക്കണമെന്നാവശ്യപ്പെട്ട് രാഷ്ട്രപതിക്ക് മെഡിക്കല് വിദ്യാര്ഥികളുടെ കത്ത്
വ്യാപം കേസില് നീതി നേടിത്തരികയോ അല്ലെങ്കില് മരിക്കാന് അനുവദിക്കുകയോ ചെയ്യണമെന്നാവശ്യപ്പെട്ടുകൊണ്ട്്് കേസില് കുറ്റാരോപിതരായ വിദ്യാര്ഥികള് രാഷ്ട്രപതിക്ക് കത്തെഴുതി. ഈയാവശ്യമുന്നയിച്ച് രാഷ്ട്രപതി പ്രണബ് മുഖര്ജിക്ക് കത്തയച്ചത്് ഭോപ്പാലിലെ ഗജ്ര രാജ മെഡിക്കല് കോളജിലെ അഞ്ചു മെഡിക്കല് വിദ്യാര്ഥികളാണ്്. വ്യാപം കേസില് കുറ്റാരോപിതരായ തങ്ങള്ക്ക്്് കേസില് പങ്കില്ലെന്ന് തെളിയിച്ചെങ്കിലും കോളജിലെ അധ്യാപകരും സഹപാഠികളും ഇപ്പോഴും വിവേചനപരമായ സമീപനം തുടരുകയാണെന്നും രാഷ്ട്രപതിക്കയച്ച കത്തില് അഞ്ചംഗ സംഘം ആരോപിക്കുന്നു.
മെഡിക്കല് കോഴ്സുകളിലേക്ക് പ്രവേശനം നേടുന്നതിനുള്ള പിഎംടി പരീക്ഷ 2010ല് തന്നെ തങ്ങള് പാസായതാണെന്ന് രാഷ്ട്രപതിക്കയച്ച കത്തില് ഇവര് വ്യക്തമാക്കുന്നു. പിന്നീട്, മൂന്നു വര്ഷത്തിനുശേഷം കേസുമായി ബന്ധപ്പെട്ട് നടത്തിയ അന്വേഷണത്തില് ഇവരുടെ അഡ്മിറ്റ് കാര്ഡിലെ ചിത്രങ്ങളും ഒപ്പും കോളജ് തിരിച്ചറിയല് കാര്ഡിലെ ചിത്രങ്ങളും ഒപ്പുമായി ചേരാതെ വന്നതോടെയാണ് വ്യാപം അഴിമതിക്കേസില് ഇവരും പങ്കുകാരായി മുദ്ര കുത്തപ്പെട്ടത്.
പരീക്ഷാര്ഥികള്ക്ക് പകരം പുറത്തുനിന്നുള്ളവര് പരീക്ഷയെഴുതി എന്ന ആരോപണമാണ് ഇവരുള്പ്പെടെയുള്ള 95 ല് അധികം വരുന്ന വിദ്യാര്ഥികളുടെ പേരില് ഉയര്ന്നുവന്നത്. ഇതേത്തുടര്ന്ന് വിരലടയാള പരിശോധനയ്ക്ക് വിധേയരായ ഇവര് കേസില് തങ്ങളുടെ നിരപരാധിത്വം തെളിയിച്ചിരുന്നു. പഠനം തുടരുന്നതിന് ഹൈക്കോടതിയില്നിന്ന് അനുമതി സമ്പാദിക്കുകയും തങ്ങള്ക്കെതിരായ കേസില് സ്റ്റേ സമ്പാദിക്കുകയും ചെയ്തു. ഇത്രയൊക്കെ ചെയ്തിട്ടും കോളജില്നിന്നും തങ്ങള് നേരിടുന്നത് കഠിനമായ വിവേചനമാണെന്ന് ചൂണ്ടിക്കാട്ടിയാണ് നീതി നേടിത്തരികയോ അല്ലെങ്കില് മരിക്കാന് അനുവദിക്കുകയോ ചെയ്യണമെന്നാവശ്യപ്പെട്ട് ഇവര് രാഷ്ട്രപതിക്ക് കത്തയച്ചത്.
സംസ്ഥാനത്തെയാകെ പിടിച്ചുകുലുക്കിയ വ്യാപം അഴിമതിക്കേസില് ഇതുവരെ 2500ല് അധികം പേരാണ് കുറ്റാരോപിതരായിട്ടുള്ളത്. കേസുമായി ബന്ധമുള്ള ആളുകള് ദുരൂഹ സാഹചര്യങ്ങളില് കൊല്ലപ്പെടുന്നത് പതിവായതോടെയാണ് സംഭവം ദേശീയ ശ്രദ്ധ നേടിയത്. ഇതേത്തുടര്ന്ന് വ്യാപം അഴിമതിക്കേസ് അന്വേഷണം സിബിഐയ്ക്ക് വിട്ട് സുപ്രീം കോടതി ഉത്തരവിട്ടിരുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
