കശ്മീരില് രണ്ടിടത്തായി നടന്ന ഏറ്റുമുട്ടലില് രണ്ട് ഭീകരരെ സുരക്ഷാ സേന വധിച്ചതായി പൊലീസ്
കശ്മീരില് രണ്ടിടത്തായി നടന്ന ഏറ്റുമുട്ടലില് രണ്ട് ഭീകരരെ സുരക്ഷാ സേന വധിച്ചതായി പൊലീസ് . മൂന്ന് മണിക്കൂറിനുള്ളില് ശ്രീനഗറിലും പുല്വാമയിലുമാണ് ഏറ്റുമുട്ടല് നടന്നത്.
നിരോധിത സംഘടനയായ ലഷ്കര്-ഇ-ത്വയ്ബ പ്രവര്ത്തകരാണ് കൊല്ലപ്പെട്ടവര്. ശ്രീനഗറില് അടുത്തിടെ നടന്ന പൊലീസുകാരന്റെയും സിവിലിയന്റെയും കൊലപാതകത്തില് ഇവര് പങ്കളായായിട്ടുണ്ടെന്നും പൊലീസ് . 'സൈന്യവും പൊലീസും സി.ആര്.പി.എഫും ചേര്ന്ന് പുല്വാമയിലെ വഹിബഗ് മേഖലയിലാണ് ആദ്യ എന്കൗണ്ടര് ആരംഭിച്ചത്.
ഗ്രാമത്തില് ഒളിച്ചിരുന്ന ഭീകരരോട് ആദ്യം കീഴടങ്ങാന് ആവശ്യപ്പെട്ടെങ്കിലും ഇവര് സുരക്ഷാ സേനക്ക് നേരെ വെടിയുതിര്ത്തതിനെ തുടര്ന്നുണ്ടായ ഏറ്റുമുട്ടലില് ഷാഹിദ് ബഷീര് ഷെയ്ഖ് എന്ന ഭീകരന് കൊല്ലപ്പെടുകയായിരുന്നു' .
ഒക്ടോബര് രണ്ടിന് ശ്രീനഗറിലെ ബറ്റാമലൂവില് മുഹമ്മദ് ഷാഫി ദാറിനെ കൊലപ്പെടുത്തിയതില് ഷാഹിദ് ബഷീറിന് പങ്കുണ്ടെന്ന് പൊലീസ് പറയുന്നു. ഇയാള് നാട്ടുകാരെ ഭീഷണിപ്പെടുത്തി പ്രദേശവാസികള്ക്കിടയില് ഭീതി സൃഷ്ടിക്കുകയും ചെയ്തിരുന്നു.
ശ്രീനഗറിലെ ഹംദാനിയ കോളനി ബെമിന പ്രദേശത്താണ് ശ്രീനഗര് പൊലീസിന്റെ നേതൃത്വത്തില് രണ്ടാമത്തെ ഓപ്പറേഷന് നടക്കുന്നത്. തന്സീല് അഹമ്മദ് എന്ന ഭീകരനാണ് ഇവിടെ കൊല്ലപ്പെട്ടത്. ഇയാള് അടുത്തിടെയാണ് തീവ്രവാദ സംഘങ്ങള്ക്കൊപ്പം ചേരുന്നത്.
സെപ്റ്റംബര് 12ന് ശ്രീനഗറിലെ ഖനിയാര് പ്രദേശത്ത് സബ് ഇന്സ്പെക്ടര് അര്ഷിദ് അഷ്റഫിനെ കൊലപ്പെടുത്തിയതില് ഇയാള്ക്ക് പങ്കുണ്ടെന്നും പൊലീസ് പറഞ്ഞു. ഏറ്റുമുട്ടല് നടന്ന സ്ഥലത്തുനിന്ന് രണ്ട് എ.കെ 47 തോക്കുകള് ഉള്പ്പെടെ ആയുധങ്ങളും വെടിക്കോപ്പുകളും കണ്ടെടുത്തു.
"
https://www.facebook.com/Malayalivartha